Online Bible

Wlɔmʋ‑dunyʋä 3 - GOD - u2

Nyɩkpɔ ‑bhlo 'coo ‑wʋ ‑kʋ 'nɩ ɔ 'kä 'yigënyɔ plöö‑

¹ 'Zufʋyu ‑kä bhä 'nɩ ɔ zi bhä ɔ ‑liesɩɩ? ‑Aaa nä, nyɩkpɔɔ' 'kʋ ‑döölɩ gba ‑sɩɩ ‑kä bhää?

² 'Zufʋ‑plölɩɩ nä, ɩ ‑kʋ ‑bʋzʋɛ ‑bhutukpä 'mnö. 'Zufʋnyʋä 'mä Laagɔ ‑sää tɛɛ ʋʋ' nödöö.

³ ‑Mä sä ‑a yi bhä ‑pɛɛ ‑lää' 'klünö ci 'naa? Sä waa' nëëdëë' nyɩkpaa' ‑nanʋä ‑bha ylä pɔlötɛtɛɛ' ‑blɔɔ 'kʋ nä, kɩ plöö‑ bhä nynä ‑mä sä Laagɔ cii‑ lä nynä ‑mä ʋ yi nʋ nä, ʋʋ' ‑läyɩɔ sɔɔ nʋ ‑a?

⁴ Yio! Ɩɩ' ‑wʋ sɔɔ ‑kʋ! 'Ylʋzɔkʋnyʋa 'fɩɩn ‑kä ‑kpläkplä, ‑mä Laagɔ ‑glö ‑nʋawlɛ. Ɩ ‑jɩjlɔ nynä ‑mä, Laagɔ‑, Nyɩkpa yibhë sɔɔ nynä ‑mä, Kä ‑n ci ‑nʋawlɛ. ‑N gä 'tite ‑ku nä, ‑Naa wälɩɩ mɛɛ‑ 'kɔɔkɔ!

⁵ ‑Mä ‑anyɩa gbenyenyii 'mɩɩ‑ gä pana nynä kä Laagɔ gëë‑ 'yi nä, sa ‑a yi bhä cii? Kɩ plöö‑ bhä nynä ‑mä Laagɔ ka‑anyɩ ʋʋ' gbʋgblɛɛ yëku fään nä, ʋʋ' bhä 'Yigëë‑Laagɔ plöö‑ ‑a? Sä 'ylʋzɔkʋnyɔ sää lä 'mʋ nä, sɔɔ n sää ‑kɛ lä 'mʋ aa!

⁶ Yio, ɩɩ' ‑wʋ sɔɔ ‑kʋ! Laagɔɔ' nʋnʋsaa 'nö bhä 'yi gëë‑ nä, säsä ʋ yi bhɛ 'ylʋzɔkʋnyʋä 'tite 'ŋʋʋ?

⁷ N naa, n ‑kä ‑kpläkplä ‑kä nä, 'nɩ 'naa ‑kpläkplaa kä gbä 'nɩ Laagɔɔ' ‑nʋawlɛɛ kä cio 'nɩ ɛ kä 'yikʋ mʋ nä, 'nɩ Laagɔɔ' 'klʋagba kä 'yi nio nä, ‑ɔnözä 'nɩ nyɩkpɔ yi bha bʋkʋ ci nynä ‑mä n ‑glö nyenyinyɔɔ?

⁸ 'Nɩ nyɩkpaa' ‑nänʋä 'ka‑anyɩ ylä yëku nyima nä, wlä kä ‑a cii‑ nynä ‑mä a ‑ya nʋ gbenyenyi ‑yä 'nää 'kä yi! Ɩ ‑ŋwa 'titi 'sää 'kʋ nynä ‑mä ‑lɔɔ' nyɩkpa‑cëa wa ‑sʋwa gbäylɩ!

⁹ 'Nɩ ‑ɔ ‑kʋ bhä ‑lɔɔ 'titi? 'Yigäda‑bhlɩɩ 'mnö nyɩkpaa nä, ‑anyɩ 'Zufʋnyʋä kä ‑a ziwa bhä nyɩkpa‑plölɩɩ ‑a? Yio! 'Nɩ n yä wɛzä 'sɩɩ wälɩklë pana. Kä n cii‑ lä nynä ‑mä 'Zufʋnyʋä ‑yä 'Glɛkönyʋä 'sɔ nä, säbhlo ‑säbhlo nyenyii' 'tɛtɩɩ gbiwa‑ lä 'wlu.

¹⁰ Kɩ ‑jɩjlɔ lä Laagɔ‑bɔɔgʋʋ 'mnö nynä ‑mä, Nyɩkpɔɔ' ‑wʋ 'ylʋnʋzɔɔ ‑kʋ 'nɩ ɔ 'kä 'yi gëë‑. Lɔɔ' ‑bhlo 'coo ‑lä nio.

¹¹ 'Nɩ nyɩkpɔ ‑wʋ ‑kʋ 'nɩ ɔ 'kä 'fika. 'Nɩ nyɩkpɔɔ' ‑wʋ 'sɩɩ ‑kʋ 'nɩ ɔ 'kä Laagɔ tään.

¹² Nyɩkpaa' 'fɩɩn, kwa ‑too. 'Nɩ waa' ‑lefɩɩn gbɩ ‑nyuu. 'Nägägbɩɩ' nʋnyɔ 'nʋwa ‑wʋ nëëdë ‑kʋ. ‑Bhlo 'titii' nio ‑wʋ.

¹³ Waa' ‑blɩɩzɔɔ doo‑ në nynä lesi‑këfë. Waa' mɩɔ 'klʋ ‑kpläkplaa 'nyigë wa ‑liesɩ. 'Nɩ waa' nëë' ciciwälɩ ‑kʋ nynä ‑leeboluu' ‑glɛ.

¹⁴ Gbütëlɩ ‑kʋwa 'kɔɔkɔ nëë' 'Nɩ wa sää 'mʋ nyenyi nyenyi.

¹⁵ Waa' bhɩ 'fii 'kʋ nyɩkpa‑bhlälɩɩ' ‑za.

¹⁶ Wa kä dä ‑ghlää nä, Kä wa të ‑lɔɔ ‑muzue ‑yä bhusulɩ.

¹⁷ 'Nɩ ‑blɔɔ ‑ʋ plöö‑ lä 'kʋ wɔtɔlɩɩ' ‑blɔɔ nä, Wa 'nʋʋ ‑wʋ ‑yi,

¹⁸ 'Nɩ waa' ‑wʋ 'sɩɩ Laagɔɔ' ‑ŋänö ‑kä.

¹⁹ 'Nɩ ‑a ‑yi sɔɔ nynä ‑mä ‑Jlämä nä, nyɩkpaa' ‑lʋa ‑kaa lä nä, wamä a soo lä. Ɩ 'kä sɔɔ kʋ ‑yä nyɩkpɔ nyɩkpɔ 'kä nëkʋ bhlü, ɩyä 'ylʋzɔkʋnyʋä gbʋ 'kwa klä Laagɔ dëlü.

²⁰ ‑Nɩnɩ 'mɩɩ‑ ‑kä lä 'ŋnö 'nɩ nyɩkpɔ nyɩkpɔɔ' sä ɔ gëë‑ lä ‑Jlämaa 'kʋ 'nɩ ɔ ‑nʋ lä nä, sɔɔ 'nöɔ ‑lä gbʋʋ' ‑sä Laagɔ dëlü. ‑Jlämaa na, ka pana lä nynä ‑mä nʋnʋgbɩɩ' ‑nɩnɩ ‑kʋ ‑lɔɔ 'nɩ ɩ plöö‑ nyenyi.

‑Anyɩa pɔlötɛtɛɛ kɛ sa‑anyɩ gbʋʋ'

²¹ ‑Mä 'tänyɩnɛ 'mnö, sä ‑a plöö‑ lä Laagɔ dëlü 'yigëënyʋä nä, Laagɔ yä‑anyɩ sɔɔ paa, ‑mä ‑Jlämaa 'mnö ʋʋ' ‑wʋ ‑ghlää. 'Nɩ ‑Jlämaa ‑yä 'plɔfɛtɩnyʋaa' 'bɔɔgwɩɩ lü 'sɩɩ ‑lɔɔ' ‑dläfʋɛɛ.

²² 'Ylʋzɔkʋnyʋa 'fɩɩn nä, pɔlötɛtɛɛ wa ‑kä lä Zozi Klisöö' ‑za nä, ɛmɛ 'mnö Laagɔ ‑ghlää 'nɩ ʋ plüënʋwa‑ lä 'yigënyʋää'. ‑Ɔnöza bhää? Laagɔ nä, ʋʋ' gbäzö ‑wʋ nyɩkpaa'.

²³ 'Ylʋzɔkʋnyʋa 'fɩɩn kwa ‑nʋ nyenyi 'nɩ wa ‑sä Laagɔɔ' 'klʋagba gwë.

²⁴ Sä Zozi Klisö yʋwa bhɛ lä nyenyii' gbʋʋ 'wlu ‑sä nä, ɩ ‑gbä 'nɩ, Laagɔɔ' plɛkʋmɛnɔɔ 'kädʋ 'mnö, ʋ ‑gbä 'nɩ wa yi yɩ 'yigënyʋä 'plö.

²⁵ Klisö 'mɔ Laagɔ ‑sä lä 'cibhi 'kʋ ‑yä, ɔɔ' doluu 'mnö nyɩkpɔɔ' ‑lɔmɔ yi lä ɔɔ' pɔlotɛtɛ kään nä, Laagɔ 'kɔ nyenyi cie. Kä Laagɔ ‑nʋ lä sɔɔ ‑yä ʋ 'kä pana nynä 'kʋ gëë 'yi. Sä Laagɔ 'tɛ lä kpänyɩ plɛkʋ nä, ‑gɔgɔbhlää' nyenyii 'ylʋzɔkʋnyʋä ‑nʋ lä nä, kʋ ‑cienʋwanyɩ.

²⁶ ‑Mä 'tänyɩnɛ ‑a ‑kʋ ylä 'mnö nä, kä Laagɔ pana ylä nynä ‑mä, ʋʋ' nʋnʋgbɩɩ kɩ gëë‑ 'yii. Nä, nyɩkpɔɔ' ‑lɔmɔ ‑ɔ ‑kä ylä Zozii' pɔlötɛtɛ nä, ɔmɔ Laagɔ 'kä ylä gbʋʋ' sä. ‑Nɩnɩ 'fɩɩn pana yɩ nynä ‑mä kä Laagɔ gëë‑ 'yi.

²⁷ Nä 'klë ‑sä nyɩkpɔ yi bhä ‑pɛɛ 'kʋ kpelio 'nɩ ɔ yi bhä täkpɔɔ? ‑Lɔɔ' 'klëa ‑läyɩɔ nio. ‑Jlämä ‑sä nyɩkpɔ yi bhä 'gë 'ŋʋʋ? ‑Jläma 'mnö nʋnʋgbɩɩ 'mɩ ‑a yi bhä 'gë 'ŋʋʋ ‑a? 'Nnn, ɩɩ' ‑lä sɔɔ kʋ. ‑Mä pɔlötɛtɛɛ ‑a ‑kä ylä Laagɔɔ' ‑za nä, ɛmɛɛ‑ ‑kä lä 'ŋnö 'nɩ ‑aa ‑lä lä täkpɔ.

²⁸ ‑Ɛɛɛ! Kä ‑a ci lä nynä ‑mä, nyɩkpɔ nä, ɔɔ' pɔlötɛtɛ 'mɛɛ‑ sɔɔ gbʋʋ' ‑mä ‑Jlämaa 'klʋkpä‑ŋʋlɩɩ 'mɩ ‑ɩɩ ‑sɔɔ ‑wʋ gbʋʋ'.

²⁹ 'Nɩ ɩ 'nö ylä sɔɔ ‑kʋ nä, kɩɩ ‑sä bhä ‑zɔɔ nynä ‑mä Laagɔ ‑glö 'Zufʋnyʋä ‑bhloo' lʋʋ ‑a? Nä nyɩkpaa' ‑lʋa ‑waa ‑wʋ lä 'Zufʋnyʋä plöö‑ nä, Laagɔɔ' bhä 'sɩɩ waa' Laagɔ plöö‑ ‑a? Laagɔ plöö‑ 'sɩɩ waa' Laagɔ ‑nä!

³⁰ ‑Ɔnöza bhää? Laagɔ ‑bhlü ‑bhlo. Nyɩkpaa‑ döö‑ lä 'kʋ ‑Jlämaa' ‑za nä, wa ‑yä ‑lʋa ‑wʋ lä 'kʋ döö‑ nä, waa' pɔlötɛtɛɛ 'mnö Laagɔ 'kä lä ghlä ‑yä ʋ 'kwa gbʋʋ' ‑sä.

³¹ Naa, kɩ plöö‑ bhä nynä ‑mä ‑a gä yɩ pɔlötɛtɛɛ ‑kä nä, ka sä yɩ ‑lɔɔ ‑Jläma ‑a? Yio! Sɔɔ ɩɩ' ‑wʋ ‑kʋ! Kɩ plöö‑ nynä ‑mä ‑Jlämaa 'klʋkpaa 'fɩɩn 'mä ‑a nyɩa lä.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy