Online Bible

Makö 15 - GOD - u2

Wa ‑fä Zozii Pilatö dëlü
( Matie 27.1‑2 , 11‑14 ; Lukö 23.1‑5 ; Zään 18.28‑38 )

¹ Zeli ‑ze lä 'gä ‑jaa nä, 'Cibhisänyʋaa' 'cifinyʋa, ‑Jlämöcɩanyʋa ‑yä ‑Dɔɔpänyʋa, nyɩkpaa 'fɩɩn ‑wa ‑kʋ bhlä 'Tütüplä‑jɛnyɩɛ 'mnö nä, wa 'nii‑ 'fɩa, 'nɩ wa yi Zozii gʋä, 'nɩ wa yio Pilatö dëlü ‑lä.

² 'Nɩ Pilatö yi Zozii 'ylä, ɔ lä ‑mä ‑mɔɔ‑ plöö‑ lä 'Zufʋnyʋaa' 'loyoo ‑a? Zozii lä ‑mɔɔ cii lä.

³ 'Cibhisänyʋaa' 'cifinyʋa 'nyɛnöɔ bhɛ lä gbɩ ‑bhutukpä nä,

⁴ ɩ ‑kä 'ŋnö 'nɩ ‑gɔmnä Pilatö ylɔɔ‑ bʋkʋ, ɔ lä ‑n ni ‑mɔɔ wa 'nyɛɛ lä gbʋ ‑bhlobhlo nä, ‑nn ‑döö ‑wʋ gbʋ ‑a?

⁵ 'Nɩ Zozii lä ɔ slämʋɔ‑ ‑kä në. Wälɩklëa 'ninie‑ Pilatö plɛkʋ.

⁶ 'Pakö‑glɩsɩɩsöö 'fɩɩn 'kʋ nä, kä Pilatö taa bhä ‑jɩnyʋa pää' lɔɔ' ‑bhlo 'yi. ‑Lɔɔ ‑jlë ylä bhlä nynä ‑mä ɔ ‑taa 'yi nä, ɔmɔ ɔ taa bhlä 'yi.

⁷ Nä nyɩkpɔ ‑bhlo ‑kʋ a ‑lɔɔ ɔmɔ wa laa bhä Balabasö. 'Tänyɩɩ nyɩkpaa ‑yä 'govlä 'sɔ doo‑ bhlä 'mʋ 'nɩ kplüü gbä bhlä nä, ɔmɔ Balabasö ‑kʋmʋwa bhä pää' 'nɩ wa bhlää‑ nyɩkpɔ.

⁸ ‑Mä 'Zufʋnyʋaa' 'kpaa ‑yi Pilatöö' dää 'nɩ wa yio soo nynä sä ɔ nʋ bhlä 'kɔɔkɔ waa' ‑za nä, ɔ nʋ yɩ sɔɔ.

⁹ Wa cii‑ lä sɔɔ nä, Pilatö lä nä, a ‑waa bhä nynä ‑mä n ‑taa 'Zufʋnyʋaa' 'loyoo 'yi ‑a?

¹⁰ Ɔ ‑yi bhä sɔɔ nynä ‑mä luëzü ‑kä 'ŋnö 'nɩ 'Cibhisänyʋaa' 'cifinyʋa ‑lɔɔ bhlä Zozii dëlü.

¹¹ Wa pä bhä ‑jlëa plɛ ŋää ‑yä a 'kä gbä ‑yä ɔ 'kä bhä Balabasö 'yi ‑taa.

¹² 'Nɩ Pilatö yi bʋkʋ 'ylä, ɔ lä 'nɩ ‑nɔnɔ! A laa lä 'Zufʋnyʋaa' 'loyoo nä, säsä a ylä nynä n nʋɔ bhää?

¹³ 'Nɩ wa yio 'kɛsɛ kplää, wlä ‑n bhuo 'kusu 'yii!

¹⁴ Pilatö lä 'nɩ gbenyenyi ‑sä ɔ ‑nʋ bhää? ‑Mä wa 'tɛmä bhɛ kpänyɩ waa' kplüü 'mʋ, wlä ‑n bhuo 'kusu 'yii!

¹⁵ Pilatö ylä bhɛlä nynä ɔ 'kä ‑jlëa pleyii mɛmä nä, kɔ ‑taa yɩ Balabasö 'yi 'nɩ, ɔ ‑gbä 'nɩ wa 'sɛpɩ‑ 'fɩa Zozii, 'nɩ ɔ yio 'sʋjaa 'nyɛ nynä wa bhuo 'kusu 'yii.

'Sʋjaa ‑nyɩä Zozii
( Matie 27.27‑31 ; Zään 19.2‑3 )

¹⁶ Wa ‑fɔɔ ‑mɔɔ ‑gɔmnɔɔ' 'gbëa 'mnö 'nɩ wa yi ‑mɔɔ' 'sʋjaa 'fɩɩn ku.

¹⁷ Wa ‑plɔɔ ‑bänözlää' 'nɩ wa ‑bhlä 'ŋocuë‑wugblë 'nɩ wa yionya 'wlu 'ŋʋ.

¹⁸ Wa bhänöɔ bhä, wlä ‑ayoo 'Zufʋnyʋaa' 'loyo‑!

¹⁹ Wa wlänöɔ bhä ‑yukwe 'wlu. Wa ŋwnɔ bhä 'sɩɩ ‑dlɛɛ 'klʋ, 'nɩ wa pɔɔ bhä ‑kokoowli dëlü glu.

²⁰ ‑Mä wa ‑nyɩänöɔ ylä 'fɩɩn nä, wa ‑sɔɔ ‑bänö ‑zlaa 'mʋ 'nɩ wa yio ɔɔ' 'kwëtii 'mʋ plaa, 'nɩ wa yio fä ‑yä wa 'kɔ 'kusuu 'yii bhoo.

Wa ‑bhoo Zozii 'kusu 'yii
( Matie 27.32‑44 ; Lukö 23.26‑43 ; Zään 19.16‑24 )

²¹ ‑Mä nyɩkpɔ ‑bhlo ‑kʋ a ‑lɔɔ, ɔmɔ wa laa bhä Simɔɔ. Ɔ ‑glö bhä Silɛnöduu' nyɩkpɔ. Ɔmɔɔ‑ plöö‑ bhlä Alɛzadlö ‑yä Lufusö sɔ wa 'bä. Ɔ ‑bha bhä 'klää. Ɔ ‑kʋ 'plödä 'nɩ wa ‑klɔɔ kutu kutu nynä ɔ bhɛɛ Zozii' 'kusuu.

²² ‑Gbäsɩɩ wa laa bhlä Glogotaa nä, ‑mɔɔ wa ‑fä lä Zozii. Glogotaa‑ŋnöö kɩ sä lä ‑zɔɔ nynä 'wukɔfʋʋ' dä.

²³ Gwäzö ‑kälöö wa laa lä 'milö nä, nyɩkpaa bhlii‑ 'kʋ 'nɩ wa 'bhläbhlänɩ‑ divaa' 'nɩ wa yi Zozii 'nyɛ nynä ɔ 'mnä, ‑mä ɔɔ' ‑wʋ mnää‑.

²⁴ 'Nɩ wa yio klä 'nɩ wa yio 'kusuu 'yii bhoo. 'Nɩ wa yi ɔɔ' 'kwëtii dëë. Wa 'paa‑ ‑nügbe ‑yä ‑ɔnö lɛɛ‑ lü bhlä nä, ɔ 'kä ɔɔ' 'kotuu 'kʋ 'bhlü.

²⁵ Zëplü‑gliyi ‑pɛɛnää' 'tänyɩɩ' wa ‑bhuo lä 'kusuu 'yii.

²⁶ Ɔɔ' gbʋklalɩɩ' gbëgëa, wa ‑jɩjla bhä kplupä 'klʋ. Wälɩklëa ci bhä nynä 'Zufʋnyʋaa' 'loyoo.

²⁷ Dä wa ‑bhuo bhlä nä, wa ‑bhoo bhä 'sɩɩ ‑lɔɔ nyɩkpa‑bhlänyʋä 'sɔ. ‑Bhlo ‑kʋ bhä ɔɔ' lüüklä 'kʋ 'nɩ ‑bhlo ‑kʋ bhä ɔɔ' mëëcë 'kʋ. [

²⁸ Sɩɩ ‑jɩjlɔ bhlä Laagɔ‑bɔɔgʋʋ 'mnö nynä Wa ‑zɛnönöɔ ‑kä gbenyenyinyʋa nëëdë nä, sɔɔ ‑yä bhɛ glää.]

²⁹ ‑Mä 'plöplönyʋa 'bhɩsɩɔ bhä, 'nɩ wa bëdüë bhä 'wlu 'kʋ, 'nɩ wa ci bhä, wlä ‑eee! ‑Mɔɔ‑ ‑lä ‑ɔ yi bhlä Laagɔ‑bhutu 'kädʋʋ wlä 'nɩ ‑ɔ yiu bhlä ylɩɩ taa' 'slää nä,

³⁰ ‑n ‑sä yɩ ‑lɔɔ ‑n yëku nëë' ‑nä! ‑N ‑bhaa 'kusuu 'yii ‑yä ‑n kwli yɩ ‑nä!

³¹ 'Nɩ 'Cibhisänyʋaa' 'cifinyʋa ‑yä ‑Jlämöcɩanyʋa nyɩänöɔ bhä 'sɩɩ 'nɩ wa ci bhä wamä ‑bhlobhlo pää' nynä ɔ ‑sä ‑lɔɔ nyɩkpa nëë' 'nɩ ɔɔ' mii ‑wʋ ɔ 'kä ‑lɔɔ ɔ yëku nëë' ‑sä!

³² Ɔmɔɔ‑ plöö‑ lä Klisöɔ nä, 'nɩ ‑ɔ plöö‑ lä 'sɩɩ 'Zufʋnyʋaa' 'loyoo nä, ɔ ‑bha yɩ 'kusuu 'yi ‑yä ɔ kwli ‑a 'gä 'ni! ‑Lɔɔ ‑a yi ‑klää ɔɔ' pɔlötɛtɛ kään. Nyɩkpaa 'titii‑ ‑yɔsɔ ‑kʋ bhlä 'sɩɩ 'kusii 'yii nä, wamä ‑mä wa 'bhɩsɩɔ bhä.

Zozii yä 'ku
( Matie 27.45‑56 ; Lukö 23.44‑49 ; Zään 19.28‑30 )

³³ ‑Mä 'tänyɩɩ 'ylʋʋ ‑ŋëë lä ‑tiin 'kʋ nä, 'cucukpä ‑plä 'bhlɩɛ 'fɩɩn 'mnö. A ‑kʋ ‑dʋdʋkʋ ‑aaa, 'nɩ ‑kugbë‑gliyi taa ‑klä.

³⁴ ‑Kugbë‑gliyi taa ‑klä lä nä, kä Zozii gaa‑ 'mʋ. Ɔ lä Eloyi! Eloyi! Lama sabatani? Kɩ sä lä ‑zɔɔ nynä ‑mä, 'Naa Laagɔ‑! 'Naa Laagɔ‑! Sɩ ‑kʋ bhä 'nɩ ‑n ‑cienö'ö 'mʋwa bhää?

³⁵ Bhloobhlolʋä ‑kʋ bhä kʋ bhä ‑lätee ‑lɔɔ nä, wa nuu‑ lä ɔɔ' woo‑wälɩ nä, wlä a poo 'nyukwli ‑mä ɔ laa Elii!

³⁶ Waa' nëëdëë' ‑bhlo ‑paa 'nɩ ɔ ‑mʋ 'nɩ ɔ ŋwaa‑ ‑dudukwë 'kälɩä kää nʋʋ' 'nɩ ɔ yia ‑yukwe 'yii gʋää, 'nɩ ɔ yi Zozii 'nyɛ nynä ɔ 'mnä. Ɔ lä a ‑ya ‑bɛɛ ‑yä ‑a wloo ‑yä, Elii ɔ pä lä wälɩ nä, ɔ 'kɔ ‑kɛ 'kusuu 'yii ‑sä.

³⁷ ‑Mä Zozii ‑gaa lä 'mʋ nä, kɔ pään‑ nyämʋ sä.

³⁸ ‑Lɔɔ' 'tänyɩɛ ‑bhlobhlo 'mnö, ‑mɔɔ Laagɔ‑bhutu 'kädʋʋ 'mnö lokwi 'kädɛɛ wa ‑gla bhlä ‑mɔɔ nä, ɛ 'ŋɔtɔ‑ 'pɛlɩ 'sɔ. Ɛ cie‑ ŋɔkʋ ‑aaa, 'nɩ ɛ gëë‑ ‑dʋdʋ.

³⁹ Wlomɛɛnyʋaa' 'sʋjaa' 'cifio ‑ɔ ‑kʋ bhlä ‑lɔɔ nä, ɔ nii‑ lä Zozii' sä ɔ kuu‑ lä nä 'yi nä, kɔ cii‑, ɔ lä 'zaazɩ, nyɩkpɔnɔ plöö‑ bhä Laagɔ ‑Yowli.

⁴⁰ 'Ŋwnɩä ‑kʋmʋ bhä 'sɩɩ ‑lɔɔ 'nɩ wa ‑zie gwë 'nɩ wa wloo bhä. Waa nëëdëë' ‑bhlo plöö‑ bhä Mali Madlɛɛ, 'nɩ ‑bhlo plöö‑ bhä Malii. Ɔmɔɔ‑ plöö‑ bhlä Zakö 'tɩkɩɩlɩɔ ‑yä Zozee 'sɔ wa 'nɔ. 'Nɩ ‑bhlo plöö‑ bhä Salomee.

⁴¹ 'Ŋwnɩänä nä, lebhee 'fɩɩn Zozii ‑nʋ lä Galilee‑bhlɩɛ 'mnö nä, kä wa 'nii‑ ɛɛ' dä. Wa ‑yɔsɔ nää bhä 'nɩ wa nʋɔ bhä ‑gä. 'Sɔɔ 'ŋwnɩä bhutukpä, wa gëë‑ Zozii' 'kʋ ‑aaa 'nɩ wa ‑yi Zolizalɛmʋduu'.

Wa ‑zizie Zozii' ‑gɛzɛɛ
( Matie 27.57‑61 ; Lukö 23.50‑56 ; Zään 19.38‑42 )

⁴² ‑Kugbë‑tänyɩɩ' yä bhɛ yiosä ŋëë ‑yä wa 'kä bhɛ Sabaa ‑gwlɛylʋʋ' ‑dʋdʋkʋ ‑göglä.

⁴³ ‑Mä Alimatee‑duu' nyɩkpɔ ‑bhlo wa laa bhlä Zozɛfʋ nä, ɔ plöö‑ bhä 'Tütüplä‑jɛnyɩɛ 'mnö nyɩkpa 'kädɔ 'nɩ ɔ ‑bɛɛmʋ bhä 'sɩɩ Laagɔɔ' 'Leyiduu' yi‑tänyɩ. Ɔmɔɔ‑ nii‑ 'tɛtɩ 'nɩ ɔ ‑soo Pilatö nynä ɔ 'nyɩɔ Zozii' ‑gɛzɛɛ.

⁴⁴ Pilatö nuu‑ lä nynä ‑mä Zozii yä wɛzä 'ku nä, kɩ ‑slɔ nükpëë'. Ɩ ‑kä 'ŋnö 'nɩ ɔ laa‑ 'sʋjaa 'kämänyɔɔ 'nɩ ɔ yio 'ylä ‑yä 'tänyɩɩ ɔ kuu‑ lä nä, ‑lɔɔ kä ‑kä 'mʋ tlʋmä nä, ɔ 'kä sɔɔ yibhë.

⁴⁵ Wa ‑sonöɔ ylä nä, ‑lɔɔ ɔ ŋoo‑ 'kʋ nynä Zozɛfʋ 'bhlü ‑gɛzɛɛ 'kʋ.

⁴⁶ 'Nɩ Zozɛfʋ yi mʋ 'nɩ ɔ yi 'cɩclɛɛ 'pɛpɛ zɔɔ, 'nɩ ɔ yi ‑gɛzɛɛ 'kusuu 'yii ‑sä 'nɩ ɔ yie gbëbie. Wa 'bhlüü‑ bhä lesi cɛkʋ‑kpʋkplä 'mnö. Ɛmɛ 'mnö, 'nɩ ɔ yi ‑mɔɔ ‑gɛzɛɛ 'ŋʋ. Ɔ 'bhisie‑ cɛkʋ 'nɩ ɔ yi lesi‑këfëa në 'su.

⁴⁷ Dä wa zizie bhlä Zozii' ‑gɛzɛɛ nä, Mali Madlɛɛ ‑yä Zozee ɔ 'nɔ Malii 'sɔ ‑kʋ bhä ‑lɔɔ ‑yä wa 'kä bhä dä wa zizio lä nä 'yi 'ni.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy