Online Bible

Lukö 20 - GOD - u2

‑Ɔ nyɛɛ‑ lä Zozii 'päwa nä
( Matie 21.23‑27 ; Makö 11.27‑33 )

¹ Ylʋʋ ‑bhlo 'kʋ, Zozii cɩa bhä nyɩkpa ‑mɔɔ Laagɔ‑bhutu 'kädʋʋ 'mnö, 'nɩ ɔ sänʋwa bhä Laagɔɔ' 'Nägädöö. 'Nɩ 'Cibhisänyʋaa' 'cifinyʋa ‑yä ‑Jlämöcɩanyʋa ɩyä ‑Dɔɔpänyʋa yi yi

² 'nɩ wa yio 'ylä, wlä ‑n sonö‑anyɩ ‑wʋ saa, 'päwaa' 'cësä ‑n bhlü bhä 'kʋ 'nɩ ‑n nʋ bhä ‑nɩnɩ 'fɩɩn n nʋ lä nää? ‑Ɔ nyɛɛ‑ bhä ‑lɔɔ 'päwaa?

³ Wa cii‑ ylä sɔɔ nä, Zozii lä ‑amʋ ‑mä 'sɩɩ, n 'kanyɩ wälɩklë 'kʋ 'ylä ‑yä a kä'ä soo.

⁴ Zään Badisö ‑ɔ ‑lobhuo bhɛ 'nɩ ɔ ŋʋ bhɛ nyɩkpaa 'nyuu 'wluu? Laagɔ‑ ‑lobhuo bhɛ ‑a, ‑mä nyɩkpaa‑ ‑lobhuo bhɛ ‑a?

⁵ Zozii ylʋwa‑ lä sɔɔ nä, wa ‑sonö ‑sonö, wlä ‑a gä cii‑ nynä ‑mä Laagɔ‑ ‑lobho Zään nä, ɔ yi ci nynä ‑mä, 'nɩ ‑ɔnözä 'nɩ aa bhä ɔɔ' ciciwälɩɩ nyaasäsä laa?

⁶ ‑A gä 'sɩɩ cii‑ nynä ‑mä nyɩkpaa‑ ‑lobhuo nä, nyɩkpaa 'fɩɩn‑ ‑kʋ lä ‑jlënä 'mnö nä, wa yi‑anyɩ këkpü 'pä. ‑Ɔnözä 'nɩ wa ci bhlä sɔɔ nä, wa ‑yi bhä sɔɔ wɩa nynä Zään ‑glö bhä Laagɔɔ' 'plɔfɛtɩ 'titi.

⁷ 'Nɩ wa yi Zozii soo, wlä ‑ɔ ‑lobho lä Zään nä, wa 'nöɔ ‑wʋ ‑yi.

⁸ Zozii lä ‑aaa! ‑Amʋ ‑mä 'sɩɩ, ‑ɔ ‑lobho'o lä 'nɩ n nʋ lä ‑nɩnɩ nä, n nö'anyɩ mɔ ‑lä paa.

Divaa‑gälöklaa 'mnö lebhe‑nʋnyʋaa' ‑nyädlaa
( Matie 21.33‑46 ; Makö 12.1‑12 )

⁹ 'Nɩ Zozii yi ‑jlëa ‑nyädlä soo, ɔ lä nyɩkpɔ ‑bhlo 'mɔɔ‑ ‑goo lä ɔɔ' divaa‑gälöklä. Ɔ ŋʋʋ‑ ‑mɔɔ 'klaa 'mnö lebhe‑nʋnyʋä, 'nɩ ɔ yi 'plö 'nɩ ɔ yi lowluu' mʋ. Ɩ ‑kʋ bhä nynä ɔ yia ‑mɔɔ gwlɛɛ.

¹⁰ Divaa‑gälöö ‑zään ylä nä, kɔ ‑lobho ɔɔ' ‑gänʋnyʋaa' nëdëë' lɔɔ ‑bhlo nynä ɔ mʋ ‑yä ɔ 'ni lebhe‑nʋnyʋa 'yi ‑yä divaa‑gälöö, wa dënɩ ‑yä wa 'nyɛ ɔɔ' daa. ‑Mä ‑gänʋnyɔɔ ‑mʋ lä nä, kwa ‑klɔ 'nɩ wa ‑bhütüo, 'nɩ wa yio 'tlü. Ɔ nää‑ wlɩ wlɩ 'nɩ ɔ yi 'ylɩbhɔ.

¹¹ 'Nɩ 'klaa käänyɔ yi bʋkʋ ɔɔ' ‑gänʋnyʋaa' 'sɔnalɔɔ lobho. Wa ‑klɔ lä 'sɩɩ nä, wa ‑bhütüo 'nɩ wa ‑sʋkpɔ 'nɩ wa yio 'tlü. Ɔ nää‑ 'sɩɩ wlɩ wlɩ 'nɩ ɔ yi 'ylɩbhɔ.

¹² 'Nɩ 'klaa käänyɔ yi bʋkʋ ‑gänʋnyɔɔ' tanalɔɔ lobho. ‑Mä wa ‑klɔ lä 'sɩɩ nä, wa bhlɔɔ‑ 'nɩ wa ‑döönöɔ zɛ 'kʋ, 'nɩ wa yio 'tlü.

¹³ Ɩ ‑kʋ bhɛ lä sɔɔ nä, kä 'klaa käänyɔ cii‑, ɔ lä säsä n yi bhä nʋ 'naa? Ɔ lä 'naa ‑wawayuo, 'naa ŋwadiyuo, ɔmɔ n 'kä ylä ‑mɔɔ lobho. Sä 'naa 'yu lä nä, n bhobho nynä wa yio 'klʋkpää' 'ŋʋ.

¹⁴ ‑Mä sä 'klaa 'mnö lebhe‑nʋnyʋa nii‑ lä 'yuo 'yi nä, kwa ‑sonö ‑sonö, wlä ‑ɔ 'gä lä 'klaa jaa 'kʋ lüü nä, ɔmɔɔ‑ yi lä ‑mɔyɩ! A yi ‑a 'bhlɔɔ ‑yä 'klaa 'kä ‑anyɩa' laa 'plöö!

¹⁵ Wa ‑klɔ lä nä, kwa ‑yɔsɔ ‑bha 'klaa 'mnö, 'nɩ wa ‑zigbë, 'nɩ wa yio 'bhlä. Nä, 'klaa 'bä kä yɩ ‑yi nä, a bhobho nynä ‑mä säsä ɔ 'kwa bhä nʋʋ?

¹⁶ Ɔ kä ‑yi nä, ɔ yiwa 'bhlä, 'nɩ ɔ yi 'klaa 'yigäda‑nyɩkpa 'mnö 'ŋʋ. Nyɩkpaa nuu‑ ylä sɔ cii‑ lä nä, wlä Laagɔ gbä ‑yä ɩ 'nä 'plö ‑lä kɩ sɔɔ 'kʋ!

¹⁷ ‑Mä Zozii ‑wluwa 'yii 'nɩ ɔ yiwa soo, ɔ lä Laagɔ‑bɔɔgʋʋ 'mnö wälɩklë ‑bhlo ci nynä ‑mä, Cɛkʋbhëa ‑bhitislänyʋaa' bhɔɔ lä 'mänyɩ‑ nä, Amää‑ ‑kään ylä ‑bhutuu sä. Nä, ‑lɔɔ' wälɩklëa aa ‑zɔɔ bhää?

¹⁸ ‑Lɔɔ' cɛkʋbhëa nä, nyɩkpɔɔ ka 'kʋ ‑zɔɔ ‑bhlü 'nä, ɔ yi 'kɔtɔ ‑kɔtɔ. 'Nɩ nyɩkpɔɔ' lɔɔ a kä 'kʋ ‑bhlüü nä, a yio 'plɩtɩä.

¹⁹ ‑Mä Zozii ci bhlä sɔɔ nä, 'Cibhisänyʋaa' 'cifinyʋa ‑yä ‑Jlämöcɩanyʋa ‑yi bhä sɔɔ nynä ‑mä wamä ɔ sä bhlä. Nä, wa tään bhɛ nynä wa 'kɔ 'kʋ bhlüü, ‑mä wa ‑guu bhä ‑jlëa.

Sezaa' lapoo' 'pɛɛlɩ
( Matie 22.15‑22 ; Makö 12.13‑17 )

²⁰ Ɩ kä 'ŋnö nä, wa dɩdɩɔ bhɛ 'kʋ. 'Nɩ wa yio nyɩkpa yëku lobho. Nyɩkpaa ‑yi lä nä, wa nʋ bhä nynä nyɩkpaa' lʋä‑ ‑wʋ lä gbʋʋ' wälɩ 'kʋ ‑yi nä. ‑Bhlɛ kwa ‑yi bhlä ‑yä wa 'kä Zozii gbɩɩ ylaa ‑yä ɔ kä wälɩ nëë' pää‑ nä, wa 'kɔ gbʋ 'nyɛɛ ‑yä wa 'kɔ 'zuzunyʋa ‑yä ‑gɔmnänyʋa dëlü tʋ kuu.

²¹ Wa ‑yi lä nä, 'nɩ wa yio 'ylä, wlä Cɩanyɔ‑, ‑a ‑yi sɔɔ nynä ‑mä, sä ‑n ci 'nɩ ‑n cɩa lä nä, sɔɔ plöö‑ nyaasäsä. ‑Nn gbäzö ‑wʋ nyɩkpaa', ‑mä sä wa ‑yä Laagɔ 'sɔ 'kä lä ‑nʋawlɛɛ 'mnö nämnö nä, sɔɔ ‑n cɩwa.

²² Nä, ‑n sonö‑anyɩ ‑wʋ saa. Laagɔɔ' ‑Jlämaa ci bhä nynä ‑mä ‑a 'pɛɛ 'loyo 'kädɔɔ Sezaa' lapoo ‑a? ‑A 'pɛɛnʋ bhä ‑a, ‑mä ‑aa 'pɛɛnʋ ‑lä bhä ‑a?

²³ ‑Mä Zozii ni bhɛ lä waa' ‑kpläkplaa 'yi nä, kɔ cii‑, ɔ lä

²⁴ a lä'ä ‑wʋ saa ‑flëëgie ‑yä n 'kɛ 'ni! Wa ‑lɔɔ lä ‑flëëgie nä, 'nɩ ɔ yiwa 'ylä, ɔ lä nyɩkpɔɔ ‑ɔnö 'wluu wa ‑bhütëë lä 'flëëgie 'klʋ, 'nɩ ‑ɔnö 'ŋnöö wa ‑jɩjlä lä ‑lɔɔ nä, lɔɔ ‑sa bhää? Wlä 'loyo 'kädɔɔ Sezaa 'mɔɔ‑ ‑kʋ lä ‑lɔɔ.

²⁵ Zozii lä ‑aaa! Nä, ‑ɔ gä sɔɔ nä, dää‑ plöö‑ lä Sezaa' dä nä, a 'nyɛ ‑lɔɔ Sezaa, ɩyä dää‑ plöö‑ lä Laagɔɔ' dä nä, a 'nyɛ ‑lɔɔ Laagɔ!

²⁶ ‑Mä Zozii cii‑ lä sɔɔ nä, kä nükpëë ‑slʋwa. Wälɩɩ 'fɩɩn ɔ cii‑ lä ‑jlëë' nä, wa ‑wʋ mii‑ 'nɩ wa 'kɩ wälɩklë 'mnö ‑sä ‑yä a 'kɔ gbʋ ‑klaa.

'Kudukuë yi 'zaazɩ 'kuëë glɔɔ
( Matie 22.23‑33 ; Makö 12.18‑27 )

²⁷ 'Nɩ Sadisɩɛnyʋä ‑zio yi Zozii yëku yi. Sadisɩɛnyʋä nä, waa' laa bhɔɔ 'kudukuëë' glɔɔlɩɩ nyaasäsä. Wa ‑yi lä nä, 'nɩ wa yio 'ylä,

²⁸ wlä Cɩanyɔ‑, Moyizöö' ‑Jlämaa ci nynä ‑mä Nyɩkpɔ ‑yä ɔ 'ŋnɔ 'sɔ 'nö 'yu ‑gään 'nɩ ɔ kä kuu‑ nä, ɔ bheli 'bhlü 'kuzëlü‑ŋnɔɔ 'kʋ ‑yä ɔɔ' 'lɔlʋʋ' kä ‑kä mnɔ.

²⁹ Nä, ‑n ni bhelie ‑ngbɔɔsɔ ‑kʋ bhä ‑lɔɔ. Tɛɛtɛɛlɔɔ nöö‑ bhä 'ŋnɔ, ‑mä ɔ ‑yɔsɔ ‑wʋ 'yu ‑gään, 'nɩ ɔ yi 'ku.

³⁰ 'Nɩ 'sɔnalɔɔ yi 'kuzëlü‑ŋnɔɔ 'kʋ 'bhlü, säbhlo ‑säbhlo, 'nɩ ɔ yi 'ku.

³¹ Taanalɔɔ ‑mä 'sɩɩ, ɔ yi 'ŋnɔɔ 'kʋ 'bhlü, ‑mä säbhlo ‑säbhlo. ‑Mä bhelia kuu‑ sɔɔ ‑aaa, 'nɩ wamä ‑ngbɔɔsɔ ‑bhɩä. Waa' ‑wʋ 'yu ‑të.

³² 'Ŋnɔɔ ‑mä 'sɩɩ, 'nɩ ɔ yi ‑mɔɔ plä 'nɩ ɔ yi 'ku.

³³ Naa, sä bhelia ‑ngbɔɔsɔ ‑wa nönöɔ‑ bhlä nä, 'kudukua' 'kuëë glɔɔylʋʋ 'kʋ nä, waa' nëëdëë' lɔɔ ‑sä 'titi ‑ɔ 'gä bhä 'ŋnɔɔ kään?

³⁴ 'Nɩ Zozii yiwa soo, ɔ lä ‑mää 'ylʋzɔɔ nä, ‑mɔɔ ŋwadie ‑yä 'ŋwnɩä 'sɔ nönö lä.

³⁵ ‑Mä nyɩkpaa Laagɔ ‑waa lä nynä ‑mä ‑wa yi 'kuëë glɔɔ nä, waa' zëkpëa‑ yi lä ‑mɔɔ 'yikʋ nä, amä 'mnö nönölɩɩ' ‑läyɩɔ kʋ,

³⁶ 'nɩ waa' ‑läyɩɔ 'sɩɩ 'ku. Kwa 'kä ylä kʋ nynä ‑Laagɔzizi, ɩyä wa 'kä yɩ Laagɔɔ' 'yuë 'plö. Wa yä yɩ 'kuëë glɔɔ 'nɩ wa ‑yä yɩ 'pʋpʋɛ 'ni.

³⁷ ‑Ɔ plöö‑ lä 'kudukuë' 'kuëë glɔɔlɩɩ nä, Moyizö 'titi pänɩ‑. Ɔ ci bhlä ŋnäŋnä‑kpäkaa' wälɩɩ nä, kɔ laa‑ Laagɔ Ablaamʋʋ' Laagɔ, 'nɩ ɔ lʋʋ‑ Yizaköö' Laagɔ, 'nɩ ɔ lʋʋ‑ 'sɩɩ Zakɔpʋʋ' Laagɔ.

³⁸ ‑Bhlɛ Laagɔ nä, ʋʋ' ‑wʋ 'kudukuëë' Laagɔ plöö‑ ‑mä ʋ ‑glö ‑yäyänyʋaa' Laagɔ. Nä Laagɔɔ' ‑za nä, waa' ‑lefɩɩn wa ‑yä.

³⁹ ‑Jlämöcɩanyʋä zio ‑kʋ bhä ‑lɔɔ, 'nɩ ‑wa yio soo, wlä Cɩanyɔ‑, ‑n cii‑ 'nää!

⁴⁰ Wa cii‑ lä sɔɔ nä, nyɩkpɔɔ' yɩɔ mii‑ 'nɩ ɔ 'kɔ bʋkʋ 'kwäslɛ 'kʋ ylää‑.

Klisöɔ ‑yä Davidö
( Matie 22.41‑46 ; Makö 12.35‑37 )

⁴¹ 'Nɩ Zozii yiwa soo, ɔ lä ‑ɔnözä 'nɩ wa ci bhä nynä Klisöɔ ‑glö Davidöö' 'yu?

⁴² Davidö 'titiclö cii‑ ‑kä ‑bhlɛ ‑mɔɔ Lɔlɔɔ 'bɔɔgʋʋ 'mnö nynä Kwlienyɔ Laagɔ ‑soo 'naa Kwlienyɔ nynä ‑N kʋ 'naa lüüklä 'kʋ sä!

⁴³ ‑N kʋ ‑lɔɔ ‑aaa ‑yä ‑Naa ‑zɔbhlɛgbänyʋa, N 'kwa ‑naa 'kʋ nämnö ‑gwädɛ 'kʋ nʋ.

⁴⁴ Nä, Davidö 'titi laa ‑kä ‑bhlɛ Klisöɔ ɔɔ' Kwlienyɔ 'nɩ, sɩ ‑kʋ bhä bʋkʋ 'nɩ ɔ yi bhä Davidöö' 'yu 'plöö?

A fä ‑Jlämö‑cɩanyʋaa' nʋnʋgbɩɩ plɛkʋ
( Matie 23.1‑33 ; Makö 12.38‑40 )

⁴⁵ Nyɩkpa ‑bhutukpä ‑poo bhä bhlɛ Zozii 'nyukwli, 'nɩ ɔ yi ɔɔ' 'kʋgënyʋa soo,

⁴⁶ ɔ lä ‑Jlämöcɩanyʋa wa ‑yä ‑bänö ‑belii 'sɔ ‑waa bilɩ. 'Nɩ wa ‑waa 'sɩɩ nynä nyɩkpaa 'fɩɩn bhänönʋwa ‑jlünëëdü. Nä, a fä waa' nʋnʋgbɩɩ plɛ! Wa kä Laagɔ‑bhutuu 'mnö ‑plä nä, wa ‑waa 'yikʋʋ këkpüü' 'mnö kʋlɩ. Wa kwa ‑glɩsɩɩsɩ 'kʋ laa‑ 'nɩ wa kä ‑yi nä, nyɩkpa 'kädʋaa' 'këkpüü 'mnö ‑mɔɔ wa ylä nynä wa 'kä kʋ.

⁴⁷ Wa kä bhibhie nä, kä wa tlʋmä 'kpokposä 'mʋ ‑yä nyɩkpa 'kwa ‑kä 'yikʋ 'ŋʋʋ. ‑Bhlɛ wamää‑ sä lä 'kuzëlü‑ŋwnɩaa' kääkäälɩɩ 'fɩɩn. N sonö'anyɩ ‑mä ‑lɩɩ 'fɩɩn wa nʋ lä nä, wa yi Laagɔ dëlü ɩɩ' dlu 'kädʋ plʋʋ.

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy