Tito 3 - Chinsenga New Testament

Unkhalo wa Cikristu

¹ Woŵalukanisha ŵanthu wonse kuti awomvwila akulu ŵa boma na wopingula. Awoŵamvwila nipo awokuŵa wokonzeka kuseŵenza nchito iliyonse iweme.

² Uŵawuzye kuti osati awolaŵila viyipa va munthu aliyense, apewe kusushana aŵe wofasa, nipo nsita zonse aŵe na mcinzi ku ŵanthu wonse.

³ Pala kale nase soti tenze wopusa, wosamvwila, na wosoŵeshewa. Tenze ŵazya ŵa vilako–lako viyipa na vokondelesha va mitundu–mitundu. Masiku wonse tenzonkhalila kucita viyipa na ukwa, ŵanthu kutinkhana nase, nipo sewo ŵamene kutinkhana.

⁴ Koma pamene apo Mulungu Mpulumushi wasu ewonesha cisomo cake nipo soti lusungu yotemwa ŵanthu.

⁵ Tetyo, etipulumusha osati cikomo ca nchito zolungama zeticita sewo, koma mwa lusungu yake. Etipulumusha posamba mwa Mzimu Mtuŵa pakutivyalisha kwa lomba notipa moyo wa lomba.

⁶ Mwa Yesu Kristu, Mpulumushi wasu, Mulungu etila Mzimu Mtuŵa wala motambulula manja.

⁷ Mulungu ecita vonse ivi kuti tiŵe ŵana ŵake, kuti tifwaniwe wolungama mu menso mwake na cisomo cake, tulindila moyo wosasila wecitilayizya.

⁸ Aŵa ni malizu wosimikizyika ngako, nipo nupangwa kuti vamene ivi uvilaŵilishe, kuti wocetekela Mulungu awozitwala pa nchito ziweme. Ivi ni viweme vuphindulisha ŵanthu.

⁹ Koma upewe kufufuza–fufuza vopusa, kuŵelenga–ŵelenga mndandanda wa mazina ya makolo, mikangano, nosushana pa va Matetulo ŵa Mose. Ivi vuyavyalini, viliye phindu iliyonse.

¹⁰ Munthu woleta mpatuko, umucenjezye kaŵili, koma akapitilizya usakatizyane naye pa kanthu.

¹¹ Nipo ukaziŵa kuti munthu woteti ni wopumvyika na wocimwa, mwine wake yeve olipa mlandu yeka.

Malizu osilizyila

¹² Nikazomutuma Alitema keno Tikiko kwanu uko, uyeseshe kuti unifwane ku Nikopoli, cikomo nasimikizya kuti nikaŵe kwamene uko nsita ya mphepo ikuza.

¹³ Uyeseshe kuyavya Zena, kaswili wa matetulo wala, nipo soti Apolo, kuti apitilizye ulwendo wawo. Uwoneshe soti kuti osoŵalini kanthu.

¹⁴ Ŵanthu ŵasu soti awosambila kulitwala pa nchito ziweme, kuti awoyavya pali kusoŵa ngako–ngako. Awotetyo kuti moyo wawo usaŵe uliye phindu.

¹⁵ Wonse ŵa nili nawo kuno okupani moni. Otwala moni kwa wonse otitemwa cikomo ca cicetekelo. Cisomo ciŵe na mwewo monse.