Tito 2 - Chinsenga New Testament

Kusambizya unkhalo uweme

¹ Koma wewo Tito, uwosambizya vokatizyana na cisambizyo cendi.

² Uwuzye analume akulukazi kuti awokuŵa wosakolwa, awocita va cikulu, ŵa malingililo ŵa nzelu, otangʼa pa cicetekelo, pa cinthemwa na pokoselela.

³ Cimozi–mozi anakazi akulukazi, uŵawuzye kuti awokuŵa na unkhalo uwamila anakazi atuŵa mtima. Asaŵe olaŵilila ayawo viyipa keno ŵazya ŵa ucakolwa. Aŵe alangizi aweme,

⁴ kuti tetyo atweshe kusambizya asimbi kutemwa analume ŵawo na ŵana ŵawo.

⁵ Aŵasambizye kuŵa na malingililo ŵa nzelu, aliye kacenche, osamala luweme va pa banja, na womvwila analume ŵawo. Pamene apo ŵanthu angatafulilelini Malizu ŵa Mulungu.

⁶ Pamene apo soti alumbwana aŵawuzyishishe kuti aŵe ŵa malingililo ŵa nzelu.

⁷ Pa vonse wewo wemwine weka uŵe cisanzo ca nchito ziweme. Usambizyi wako unkhale wa vyendi, nipo uzisambizye mwa mcinzi.

⁸ Malizu wako aŵe ŵa vyendi, kuti ŵanthu osati azeŵasushe. Tetyo, ŵausushana nawo azeacite nsoni, akasoŵe kalikonse kayipa kuti azetilaŵilile.

⁹ Ŵazya awomvwila asikulu ŵawo, awoŵatemwesha pa vonse. Osati awosushana nawo

¹⁰ keno kuŵayiŵila, koma ngako–ngako aliwoneshe kuti ni wocetekeleka pa vonse viweme. Motetyo, pa vocita vawo vonse azeawoneshe kuwama kwake kwa vosambizya volaŵila va Mulungu, Mpulumushi wasu.

¹¹ Pakuti Mulungu wawonesha cisomo cake cupulumusha ŵanthu wonse.

¹² Cisomo cake cutisambizya kusiya moyo wosasamala va Mulungu, nipo soti vilako–lako va calo ca pansi. Cutisambizya kuti moyo wasu pano pansi uŵe wa malingililo ŵa nzelu, wolungama na wosamala va Mulungu.

¹³ Pala tulolela na cicetekelo pa nsiku yokanganisha, Yesu Kristu Mulungu wasu mkulu na Mpulumushi patiakawele mu ulemelelo.

¹⁴ Yeve elitwala kuti ŵatifumye ku viyipa vasu vonse, notituŵisha kuti tinkhale ŵanthu ŵake ŵa kapamphu pa nchito zonse ziweme.

¹⁵ Ivi niye vauwamila kusambizya. Uwoŵakosesha ŵanthu, noŵacimula kwamene. Uwocita ivi na ulamulilo. Muyakine aliyense osati azeakusule yayi.