Luka 9 - Chinsenga New Testament

Yesu otuma nthumi zake kumi na ziŵili

¹ Yesu eyita asambili ŵake kumi na aŵili ŵala noŵapa ulamulilo na mphamvu zofumya viŵanda nopozya malwele.

² Eŵatuma kuti akaŵilizye va Ufumu wa Mulungu, nopozya ŵanthu olwala.

³ Eŵawuzya kuti, “Osatakula kanthu pa ulwendo uyu. Musatole ndodo, keno tumba ya pa ulwendo, keno cakulya keno ndalama, osaŵa na mikhanjo iŵili.

⁴ Nipo mu ngʼanda iliyonse mwatimukaloŵe, mukaŵe kwamene uko mpaka kufumako.

⁵ Keno mu munzi muyakine akakupokelenilini luweme, mukofumamo nokunkhumula lukungu ya ku mendo kwanu. Iyo ikaŵe cenjezyo kwa ŵeve.”

⁶ Asambili ŵala eluta cendi, kuŵilizya Malizu Aweme ku minzi yonse, nopozya paliponse.

Nkhawa ya Helode

⁷ Mfumu Helode pecimvwa vonse vucitika vala, vemusilizya nzelu, cikomo cakuti ayakine enze kuti, “Wamene uyu ni Yohane Mbatizi wala, ewuka kwa akufwa.”

⁸ Koma ayakine enzolaŵila kuti, “Yayi, uyu ni Eliya, wawonekela soti.” Ayakine enze kuti, “Yayi, koma ni yumo mwa aneneli ŵa macezo ŵala, wawuka kwa akufwa.”

⁹ Helode elaŵila kuti, “Yohane ni wala wenitenda kale mutu. Nga lomba uyu ni ŵani soti wanikumvwa vake voteti?” Tetyo, enzopangwa ngako kuti amuwone Yesu.

Yesu olyesha ŵanthu opula myanda isanu (5,000)

¹⁰ Nthumi zala peziwelako, zewuzya Yesu vonse vezicita. Tetyo, yeve ezitola nakuyonkhala nazo pa ŵeka ku munzi uyakine, zina yake Betisaida.

¹¹ Ŵanthu anyinji peciwona kweciya, emukonkha. Yesu emupokela luweme notatika kulaŵila nawo va Ufumu wa Mulungu, nopozya olwala.

¹² Zuŵa ili pafupi kuloŵa, nthumi kumi na ziŵili zala zewuzya Yesu kuti, “Kansi ŵanthu aŵa angayimelini, kuti alute ku minzi na ku malo ali pafupi, kuti akafwane malo wolalako na cakulya, cikomo cakuti kuno ni ku sanga?”

¹³ Koma Yesu eziwuzya kuti, “Ŵamene mwewo ŵapeni vakulya.” Zeve zeciti, “Tili tyala na mikate isanu na masaŵi aŵili ŵeka. Niye kuti tilute tikaŵasitile ŵanthu wonse aŵa cakulya?”

¹⁴ (Niye kuti analume ŵeka enzepo enze myanda isanu.) Tetyo, Yesu eŵawuzya asambili ŵake kuti, “Ŵawuzyeni ŵanthu aŵa ankhale pansi mu maumba–maumba, umba iliyonse ŵanthu makumi asanu.”

¹⁵ Asambili ŵala enkhazika pansi ŵanthu wonse ŵala.

¹⁶ Pa vuli pake Yesu etola mikate isanu yala na masaŵi aŵili ŵala, nololesha Kululu, notembezya Mulungu. Tetyo, esuna–suna mkate wala, etwala kwa asambili wake kuti ayaŵile ŵanthu.

¹⁷ Aliyense ecilya nipo ekuta. Asambili etola vitundu kumi na viŵili va vakulya vesalapo.

Vecilaŵila Petulo va Yesu

¹⁸ Nsita iyakine, Yesu enzolomba kwa yeka, pamo na asambili ŵake. Tetyo, yeve eŵakonsha kuti, “Kansi ŵanthu olaŵila kuti newo nine ŵani?”

¹⁹ Ŵeve elaŵila kuti, “Ayakine anyinji olaŵila kuti nimwe Yohane Mbatizi, ayakine olaŵila kuti nimwe Eliya. Koma ayakine soti olaŵila kuti nimwe yumo wa aneneli ŵa kale wawuka kwa akufwa.”

²⁰ Apo Yesu eŵakonsha kuti, “Nga mwewo, mukuti nine ŵani?” Petulo eyasuka kuti, “Mwewo nimwe Mesiya, Mpulumushi Wolayizyiwa wala wa Mulungu.”

²¹ Yesu elamulila asambili ŵake kuti asawuzye munthu muyakine va ivi.

Yesu olaŵililatu va kufwa nowuka kwake

²² Yesu elaŵila kuti, “Mwana wa Munthu owamila kuti azeanzunziwe ngako. Akulu ŵa Ayuda na akulu ŵa ansembe na Asambizyi ŵa Matetulo azeamukane. Yeve azeapayiwe, koma nsiku ya citatu azeawuke kwa akufwa.”

²³ Pa vuli pake ewuzya wonse kuti, “Aliyense opangwa kukonkha newo azikane yeka na kuti atakule mtanda wake nsiku na nsiku nonikonkha.

²⁴ Cikomo wopangwa kupulumusha moyo wake azeawutaye, koma wotaya moyo wake cikomo ca newo azeawupulumushe.

²⁵ Nga munthu ophindula vinji pakuŵa navo vonse va pa calo ca pansi, yeve notaya moyo wake nakucenekeka?

²⁶ Pala munthu akumvwa nsoni na newo nipo na malizu ŵangu, naye soti Mwana wa Munthu azeamvwe naye nsoni patiakawele pali na ulemelelo wake na wa Atata ŵake, na wa angelo atuŵa.

²⁷ Koma nulaŵila cendi kuti alipo ayakine pano ŵatiafwelini akaliyowona Ufumu wa Mulungu.”

Yesu oyaluka mu mawonekelo ŵake

²⁸ Pecipita masiku asanu na atatu pecinenewa malizu ŵamene aŵa, Yesu etola Petulo, Yohane na Yakobe, nokwela nawo ku lupili kuyolomba.

²⁹ Yeve penzolomba, mawonekelo ŵa cinso cake eyaluka na vovwala vake vituŵa kuti mbee.

³⁰ Pamene apo ŵanthu aŵili etatika kutandala naye; enze Mose na Eliya.

³¹ Mawonekelo ŵawo enze ŵa ulemelelo, nipo enzolaŵila naye va kuya kwa Yesu kwenze kuti akatweshe ku Yelusalemu.

³² Nsita yamene iyo niye kuti Petulo na muyake enze mtulo twakufwa nato. Koma peciwuka, ewona ulemelelo wa Yesu, nipo ŵanthu aŵili ŵala enze naye.

³³ Ŵeve ŵala penzosiyana naye, Petulo ewuzya Yesu kuti, “Asambizyi, ni ciweme kuti sewo tili pano. Timange misasa itatu, uyakine wanu, uyakine wa Mose, na uyakine wa Eliya.” (Enzoziŵalini venzolaŵila.)

³⁴ Penzolaŵila tetyo pewela mkumbi noŵavwinikila, nipo asambili ŵala ekatiwa na wowa.

³⁵ Mu mkumbi mwala mwimvwika malizu olaŵila kuti, “Uyu ni Mwana wangu wenisalula, muwomumvwila.”

³⁶ Aŵa malizu pecimvwika tetyo, asambili ŵake ŵala ewona kuti Yesu ali yeka. Ŵeve eciŵa celele masiku ŵamene ŵala, osawuzya muyakine aliyense veciwona.

Yesu opozya mulumbwana wokatiwa na ciŵanda

³⁷ Mmawa mwake, Yesu na asambili atatu ŵala eseluka ku lupili kwala, nipo ŵanthu anyinji ewela kumucinguzyila.

³⁸ Munthu muyakine pakati pa ŵanthu ŵala elaŵila malizu moŵilikizya olaŵila kuti, “Asambizyi, napapata niwonelenkoni mwana wangu uyu, newo mwana ni yumo wamene uyu.

³⁹ Ekatiwa na ciŵanda cakuti cikamukata, otatika kuŵilikizya movundumukizya. Tetyo, ciŵanda cumuzunguzya mwa mphamvu, mwana uyu oyingocita povu ku kamwa cumulekalini mpaka kumuceneka ngako.

⁴⁰ Nenze nasenga asambili wanu aŵa kuti aufumye, koma akangiwa.”

⁴¹ Yesu elaŵila kuti, “Ha! Ŵanthu ŵa luko ino aliye cicetekelo, na ŵa malingililo wovyongoloka. Nuwamila kuŵa namwe nokupililani mpaka lini? Welani naye kuno mwana wanu uyo.”

⁴² Mwana wala penzekuza, ciŵanda cala cemusungʼuzya nomuponesha pansi na mphamvu. Koma Yesu ezazila ciŵanda cala. Nipo, pecimupozya wala mwana, emutwala soti kwa awisi.

⁴³ Pamene apo ŵanthu wonse ekanganishiwa nazo mphamvu za Mulungu. Pamene ŵanthu wonse ŵala enzokanganishiwa na vonse venzocita Yesu, yeve ewuzya asambili wake kuti,

Yesu olaŵilila soti va kufwa kwake

⁴⁴ “Mumvwishe luweme vatinikuwuzyeni: Mwana wa Munthu akatwaliwe ku ŵanthu.”

⁴⁵ Ŵeve aliyomvwishe malizu ŵamene aŵa. Enze wofisika kwa ŵeve, kotetyo kuti aliyoŵamvwishishe. Koma enzoyopa kumukonsha va vamene ivi.

Mkulu ni ŵani?

⁴⁶ Asambili etatika kusushana vakuti mkulu ni ŵani pakati pawo.

⁴⁷ Koma Yesu eziŵa venze mu mtima mwawo. Tetyo, etola mwana, nomunkhazika pa mbali pake.

⁴⁸ Nipo eŵawuzya kuti, “Aliyense opokela luweme mwana uyu cikomo ca newo, niye kuti opokela luweme newo wamene. Nipo wonipokela newo luweme, niye kuti opokela luweme enituma. Pakuti wamuyesa mtontho pakati panu monse, wamene uyo niye mkulu.”

Wosasushana namwe ni wokatizyana namwe

⁴⁹ Yohane elaŵila kuti, “Asambizyi, sewo tiwona munthu muyakine ofumya viŵanda potomola zina yanu, nipo sewo tiyesa kumulesha, cikomo oyendalini nase.”

⁵⁰ Koma Yesu emuwuzya kuti, “Osamulesha yayi, cikomo wosasushana namwe, okatizyana namwe wamene uyo.”

Munzi wa ku Samaliya ukana kupokela Yesu

⁵¹ Masiku pecifwika pafupi ŵakuti Yesu atolewe kuluta Kululu, yeve esimikizya mphela zoluta ku Yelusalemu.

⁵² Tetyo, etuma atumiki kuti atangule, akaloŵe mu munzi muyakine wa Samaliya kuyomuwamyila malo.

⁵³ Koma ŵanthu ŵa mu munzi mwala aliyopangwe kumupokela, cikomo cakuti yeve enzokuya ku Yelusalemu.

⁵⁴ Asambili ŵake, Yakobe na Yohane peciwona ivi elaŵila kuti, “Asikulu, cili tyani tiyite mulilo kufuma Kululu kuti uzewuŵashoke ŵanthu ŵamene aŵa?”

⁵⁵ Koma Yesu ecewuka nokalipila asambili ŵala.

⁵⁶ Pa vuli pake wonse pamo eluta ku munzi uyakine.

Vokonkha Yesu

⁵⁷ Ŵeve penze pa njila, munthu muyakine ewuzya Yesu kuti, “Nikukonkheni kulikonse kwamutimulute.”

⁵⁸ Yesu emuyasuka kuti, “Mimbulu zili na micembo, tunyoni tuli na vivumbo vake, koma Mwana wa Munthu aliye na polalika mutu kumo.”

⁵⁹ Pa vuli pake Yesu ewuzya munthu muyakine kuti, “Wewo unikonkhe!” Wamene uyo elaŵila kuti, “Asikulu, niloleni potatika nikayike malilo ŵa atata.”

⁶⁰ Yesu emuwuzya kuti, “Akufwa ayikane ŵeka. Koma wewo nkhoya uŵilizye Ufumu wa Mulungu.”

⁶¹ Munthu muyakine soti ewuzya Yesu kuti, “Nikukonkheni, Asikulu, koma munizomezye nitatike kuyolayilana na ŵanthu ku ngʼanda.”

⁶² Yesu elaŵila kuti, “Munthu watatika kulima, nocewukila soti ku vuli, Mulungu aliye naye nchito mu Ufumu wake.”