Luka 8 - Chinsenga New Testament

Anakazi opelekezya Yesu

¹ Pa vuli pake eluta noyendela mizinda na minzi oŵilizya Malizu Aweme ŵa Ufumu wa Mulungu. Asambili ŵake ŵala kumi na aŵili enze naye.

² Penze anakazi ayakine Yesu ŵecifumya viŵanda noŵapozya matenda ayakine. Anakazi awo ni aŵa: Maliya, woyitiwa Magadalena, (mwa yeve mwifuma viŵanda visanu na viŵili);

³ Yohana, mkazi wa Kuza, kapitawo wa Helode; Susana; soti na anakazi ayakine anyinji na ndalama zawo enzoyavya Yesu na asambili ŵake.

Linganizyo ya womwazya mbuto

⁴ Ŵanthu anyinji ofumila ku minzi yonse ewungana kwamene kwenze Yesu. Tetyo, yeve eŵawuzya linganizyo, elaŵila kuti,

⁵ “Munthu muyakine eluta kuyomwazya mbuto. Penzomwazya tetyo, mbuto ziyakine ziponela mu njila. Zikandiwa, nipo tunyoni twicilya.

⁶ Mbuto ziyakine ziponela pa mwala, zimela, nofota, cikomo cosoŵa munyontho.

⁷ Mbuto ziyakine ziponela pa minga, ikula noceneka tumbuto twala.

⁸ Koma mbuto ziyakine ziponela pa nthaka iweme. Zikula notwala ngako. Ngala iliyonse yenze na nsele makumi kumi.” Tetyo, Yesu eŵilikizya kuti, “Ali na matu, amvwishishe!”

Colinga ca malinganizyo

⁹ Asambili ŵa Yesu emukonsha va tanthauzo ya linganizyo yala.

¹⁰ Tetyo, yeve elaŵila kuti, “Mwewo Mulungu ekuwululilani vofisika vokumya Ufumu wake. Koma ayakine aŵa omvwila mu myambi tyala, ‘Kuti tetyo aloleshe, koma osawona, nipo amvwe, koma asamvwishe.’”

Tanthauzo ya linganizyo ya womwazya mbuto

¹¹ “Tanthauzo ya linganizyo iyi, ni iyi: Mbuto zala ni Malizu ŵa Mulungu.

¹² Mbuto zoponela mu njila zala zutanthauza ŵanthu akumvwa Malizu ŵa Mulungu. Koma Satana owela, nofumya malizu ŵala mu mitima mwawo, kuyopa kuti angacetekele nopulumuka.

¹³ Mbuto zoponela pa mwala ni zala zutanthauza ŵanthu akumvwa Malizu ŵa Mulungu, noŵapokela na cimwemwe. Lomba pakuti aliye mizyu yozama, oyingocetekela pa nsita itontho tyala, mwakuti pa nsita yoyesewa, oleka kucetekela.

¹⁴ Mbuto zoponela pa minga zala zutanthauza ŵanthu akumvwa Malizu ŵa Mulungu, koma pa vuli pake nkhawa, cuma, nipo votemwesha va moyo uno vuŵalekesha, nipo votwala vawo vutangʼalini.

¹⁵ Koma mbuto ziponela pa nthaka iweme zala zutanthauza ŵanthu akumvwa Malizu ŵa Mulungu, noŵasunga mu mtima wa vyendi na uweme, nipo okoselela notwala votwala.”

Nyale yovwinikila na nongo

¹⁶ Paliye munthu oyasha nyale noyivwinikila na nongo keno kuyifisa yayi. Koma oyiyika pa malo powonekela, ŵanthu oloŵa mu ngʼanda awone kuŵala kwake.

¹⁷ Pala cinthu ciliconse cofisika cizeciwululike, nipo va cisinsi vizeviziŵike nowonekela patuŵa.

¹⁸ “Ni cikomo cake muwosamala mwamumvwila malizu. Pakuti wala ali na vinthu, akamupelepo viyakine, koma wala aliye kalikonse, akamupoke na katontho kakulingilila kuti ali nako.”

Anyina na enekwawo ŵa Yesu

¹⁹ Anyina na enekwawo ewela kwa Yesu, koma cikomo ca winji wa ŵanthu, ekangiwa kufwika peenze yeve.

²⁰ Tetyo, munthu muyakine ewuzya Yesu kuti, “Anyina wanu na enekwanu ali panja apa, opangwa kukuwonani.”

²¹ Koma Yesu elaŵila kuti, “Newo amama na enekwasu ni ŵanthu akumvwa Malizu ŵa Mulungu, nocita vakulaŵila malizu.”

Yesu osilizya cinkhuka

²² Nsiku iyakine Yesu eloŵa mu wato pamo na asambili ŵake. Eŵawuzya kuti, “Tiyeni titawukile, ku silya iyakine ya cimmana.” Nipo eyima cendi.

²³ Penzotauka Yesu elala tulo. Nipo kwitatika cinkhuka pa cimmana, mpaka wato wala witatika kuzula na manzi ŵeve enze mu matamano.

²⁴ Pamene apo asambili ŵala ewela kwa Yesu nomuwusha, elaŵila kuti, “Asikulu, Asikulu, tumbila!” Yeve ewuka, nocimula mphepo iyo na matambazi ŵa mphamvu. Vileka cendi nipo penkhala celele.

²⁵ Tetyo, Yesu eŵakonsha kuti, “Kansi cicetekelo canu cili kuni?” Koma ŵeve ekatiwa na wowa nokanganishiwa, nokonshana kuti, “Kansi wamene uyu ni munthu wotyani? Wakuti oyingolamulila mphepo na manzi vumvwila cendi.”

Yesu opozya munthu wokatiwa na ciŵanda

²⁶ Ŵeve efwika ku citwa ca Agelegesa, cenzololeshana na Galileya.

²⁷ Yesu pecifwika pa silya, munthu muyakine ofumila kwamene uko, ecizokumana naye. Munthu wala enze na ciŵanda, nipo kutatikila macezo enzovwalalini zovwala. Enzonkhalalini mu ngʼanda, koma ku vipilala.

²⁸ Peciwona Yesu, eŵilikizya nozipoza pa mendo pake, nipo eŵilikizya kuti, “Kansi nakuyifyilani cinji mwewo Yesu, Mwana wa Mulungu wa Kululu? Nukusengani musanisaushe.”

²⁹ Ecita tetyo cikomo Yesu elamula ciŵanda kuti cifume mwa munthu wala. (Niye kanyinji–kanyinji cikamukata, ŵanthu enzomumanga manja na maunyolo, nomumanga soti mendo na zisulo kuti amukate luweme. Koma yeve enzofwaya vomangila vala, nipo ciŵanda cala cenzomutwala ku cipululu.)

³⁰ Tetyo, Yesu emukonsha munthu wala kuti, “Zina yako niwe ŵani?” Yeve eyasuka kuti, “Zina yangu nine Ciwumba.” Cikomo viŵanda venzemo vinyinji.

³¹ Viŵanda vala vesenga Yesu kuti, asavilamule kuti vikaloŵe mu cisengu ca pa nyansi ngako.

³² Pafupi pamene apo penzokulya umba ya nkhumba mu nyansi mwa lupili. Tetyo, viŵanda vesenga Yesu kuti avizomezye viloŵe mu nkhumba zala. Yesu evizomezya.

³³ Viŵanda vala vifuma, nakuyoloŵa mu nkhumba zala. Pamene apo umba yonse yala yeguduka noselukila msenga wala mowutuka, nolipoza mu cimmana mpaka kufwa mu manzi.

³⁴ Enzoŵetela nkhumba zala peciwona ivi, ewutuka, nakuyowuzya ŵanthu ŵa mu munzi na minda.

³⁵ Ŵanthu ŵala efuma kuti akawone vicitika. Pecifwika kwenze Yesu, efwana munthu wecifumyamo viŵanda wala, ali nkhezi pansi ku mendo ŵa Yesu, pecivwala, kusiluka kwala kwisila. Ŵanthu ŵala ekatiwa na wowa.

³⁶ Ayawo ewona vonse vucitika eŵawuzya mwecimpozyela wala munthu wa viŵanda.

³⁷ Tetyo, ŵanthu wonse ŵa ku malo ozungulila Gelegesa emusenga Yesu kuti afumeko kwamene kwala, cikomo ŵeve enze na wowa ngako. Tetyo, Yesu eloŵa mu wato, nowelela ku silya.

³⁸ Munthu wala wecifumya viŵanda esenga Yesu kuti alute naye. Koma Yesu emuzyosha nomuwuzya kuti,

³⁹ “Yayi, wewo welela kwanu, ukaŵakonkhololele vikulu vawakucitila Mulungu.” Munthu wala ewelela cendi kwawo na kuyowonesha mu minzi monse vikulu vecimucitila Yesu.

Yesu opozya mwana wa Yailo na mwanakazi muyakine

⁴⁰ Yesu pecifwika ku silya, ŵanthu anyinji emucinguzyila, pakuti wonse enzomulindila.

⁴¹ Nipo kwiwela munthu muyakine, zina yake Yailo, enze yumo wa akulu ŵa mpingo, yeve eliponesha pa mendo ŵa Yesu, notatika kumdandaulila kuti alute ku ngʼanda yake,

⁴² cikomo mwana wake mwanakazi enze pafupi kufwa. Enze na vyaka kumi na viŵili, nipo mwana enze wamene uyo. Yesu penzokuya kwala, ŵanthu ŵala enzompatikizya.

⁴³ Penze mwanakazi muyakine eciŵa ovutika na matenda ŵa mlopa vyaka kumi na viŵili. [Etaya cuma cake conse kulipila ngʼanga,] koma penzeve cukanga yumo womupozya.

⁴⁴ Yeve efwika ca ku vuli kwa Yesu, nokumya msono wa covwala cake, nipo nsita yamene iyo ulwele wa mlopa weleka.

⁴⁵ Pamene apo Yesu ekonsha kuti, “Ni ŵani wanikumya?” Wonse elaŵila kuti, “Kaya.” Petulo elaŵila kuti, “Asambizyi, ŵanthu wonse aŵa okuzungulilani nipo okupatikizyani.”

⁴⁶ Koma Yesu elaŵila kuti, “Yayi, muyakine wanikumya cendi. Naziŵa kuti mphamvu ziyakine zafuma mwa newo.”

⁴⁷ Mwanakazi wala peciwona kuti angalifiselini soti, ewela motutumila nolipoza pa mendo pa Yesu. Elaŵila pa menso pa ŵanthu wonse ŵala cikomo cecikumyila Yesu, nipo soti mwamene mwecicilila nsita yamene iyo.

⁴⁸ Apo Yesu emuwuzya kuti, “Wewo mwana wangu, cicetekelo cako cakupozya. Nkhoya mu mtendele.”

⁴⁹ Yesu akalulaŵila kwiwela munthu muyakine kufumila ku ngʼanda kwa mkulu wa mpingo wala. Emuwuzya mkulu wala kuti, “Mwana wala wasilizyika. Osaŵavuta soti Asambizyi.”

⁵⁰ Yesu pecimvwa malizu ŵala ewuzya Yailo kuti, “Osayopa yayi. Mwewo muyingocetekela, mwana wala aŵe luweme.”

⁵¹ Yesu pecifwika ku ngʼanda kwala, aliyozomelezye kuti aloŵe naye koma Petulo, Yohane na Yakobe, nipo awisi ŵa mwana wala na anyina ŵake.

⁵² Ŵanthu wonse enzolila nomimila, koma Yesu elaŵila kuti, “Musalile mwana uyu aliyowufwe ali tyala mtulo.”

⁵³ Pamene apo ŵanthu etatika kumuseka nomunyamvula, pakuti eziŵa kuti mwana wala wamwalila kale.

⁵⁴ Yesu ekata mwana wala pa kwanja noŵilikizya kuti, “Mwanawe uka!”

⁵⁵ Pamene apo, moyo wake wiwelelamo, yeve ewuka. Nipo Yesu eŵawuzya kuti amupe cakulya msimbi wala.

⁵⁶ Avyazi ŵake ekanganishiwa ngako, koma Yesu eŵawuzya kuti kosati awuzye aliyense vacitika.