Luka 7 - Chinsenga New Testament

Mkulu wa asilikali wa Ciroma

¹ Yesu pecisilizya kulaŵila vonse ivi ku ŵanthu ŵala eluta ku Kapilinamu.

² Penze sentuliyo, mkulu wa asilikali wa Ciroma, enze na nyanchito wenzotemwa ngako. Nyanchito wala enzolwala, nipo enze pafupi nakufwa.

³ Mkulu wala pecimvwa va Yesu, etuma akulu ŵa yakine ŵa Ayuda kwa yeve kuyomusenga kuti azeapozye nyanchito wake wala.

⁴ Pecifwika kwa Yesu, emusenga mwa mphamvu nomuwuzya kuti, “Wamene uyu ni wowamila kuti mumucitile voteti,

⁵ cikomo owutemwa mtundu wasu, mwakuti etimangila kacisi yasu.”

⁶ Tetyo, Yesu eluta nawo. Yeve pecifwika kufupi na ngʼanda yake mkulu wa asilikali wala etuma ayake kwa Yesu kuyomuwuzya kuti, “Asikulu, musatamane pakuti nililini wowamila kuti mwewo muloŵe mu ngʼanda mwangu.

⁷ Ni cikomo cake nuwamilalini soti kuwela kwanu. Koma muyingolaŵila tyala malizu ŵeka kuti nyanchito wangu apole.

⁸ Newo nane nine munthu woyikiwa pansi pa ulamulilo. Koma soti nili na asilikali ŵanulamulila. Nikuti nikawuzya muyakine kuti, ‘Nkhoya,’ akuya cendi. Nikawuzya soti muyakine kuti, ‘Wela,’ owela cendi. Nipo nikawuzya nyanchito wangu kuti, ‘Cita cakuti,’ ocicita cendi.”

⁹ Yesu pecimvwa ivi, ekanganishiwa naye. Ecewuka nowuzya umba ya ŵanthu ŵala yenzomukonkha kuti, “Ni cendi, cukanga pakati pa Aisilayeli niliyofwane cicetekelo coteti.”

¹⁰ Nthumi yala yewelela ku ngʼanda, nofwana nyanchito wapola.

Yesu owusha mwana ku Nayini

¹¹ Pa vuli pake Yesu eluta ku munzi uyakine, zina yake Nayini. Asambili ŵake pamo na ŵanthu ayakine anyinji ekonkhana naye.

¹² Yesu pecifwika pafupi poloŵela mu munzi wala, ekumana na ŵanthu alutakule malilo ŵa mwana mwanalume wa nyankufwilwa. Mwana wake enze yeve yeka. Ŵanthu anyinji ŵa mu munzi mwala enze naye.

¹³ Asikulu pecimuwona, ecimvwa lusungu, emuwuzya kuti, “Osalila.”

¹⁴ Tetyo, efwika pafupi nokumya citanda cala, ŵanthu etakula malilo ŵala epanama, nipo Yesu elaŵila kuti, “Wewo mulumbwana, nukuwuzya kuti, ‘Uka.’”

¹⁵ Pamene apo wala wakufwa enkhazikika notatika kulaŵila. Yesu emutwala kwa anyina.

¹⁶ Ŵanthu wonse ecita wowa, notatika kutembezya Mulungu. Elaŵila kuti, “Mneneli mkulu wawoneka pakati pasu.” Elaŵila soti kuti, “Mulungu wazoyavya ŵanthu ŵake.”

¹⁷ Mu calo conse ca Yudeya, na ku citwa conse cozungulila, ŵanthu enzolaŵila va nkhani iyi.

Yohane Mbatizi otuma asambili ŵake kwa Yesu

^18-19 Asambili ŵa Yohane emuwuzya vonse Yohane. Tetyo, yeve eyita asambili ayakine aŵili, noŵatuma kwa Asikulu kuyoŵakonsha kuti, “Kansi ni mwewo mukuza, keno tilindile muyakine?”

²⁰ Ŵeve pecifwika kwa Yesu, emuwuzya kuti, “Yohane Mbatizi watituma kwanu kuti tizetikukonsheni kuti, ‘Kansi mwewo nimwe wala wakuti akawele, keno tilindile muyakine?’”

²¹ Nsita iyo Yesu enzopozya malwele wosiyana–siyana wa ŵanthu anyinji. Enzofumya viŵanda, nopanga ŵanthu anyinji wosawona kuwona.

²² Nipo yeve eyasuka kuti, “Nkhoyani mukawuzye Yohane vamwawona na vamwamvwa. Mphofu zuwona, olemala oyenda, ŵa mambombo osukiwa, asimvwa akumvwa, akufwa owukishiwa, nipo osauka akumvwa Malizu Aweme.

²³ Ni woshukishiwa munthu asataya cicetekelo cikomo ca newo.”

²⁴ Atumiki ŵa Yohane ŵala pecifumapo, Yesu etatika kukonsha winji wa ŵanthu va Yohane kuti, “Kansi pemwiluta ku cipululu, mweciyowona vinji? Tete yosungʼuzyika na mphepo kansi?

²⁵ Nga mwenze kuti mukuyowona vinji? Munthu wovwala vovwala vofewa kansi? Yayi, ŵanthu wovwala vakaso na otemwa malyelelo onkhala mu ngʼanda za mafumu.

²⁶ Laŵililantoni, mwelaŵila kuti mukuyowona vinji? Mneneli kansi? Ni vyendi, nulaŵilisha kuti mweciyowona wopula mneneli.

²⁷ Wamene uyu niye wala Malembo olaŵila va yeve kuti, ‘Nutuma mtumiki wangu, numutuma pa nthangu pako, kuti akawamyiletu njila yakuzopitilamo wewo.’

²⁸ Nukuwuzya kuti mwa ŵanthu wonse evyalika pano pansi, paliye cukanga yumo wopula Yohane. Koma cukanga wamene ali mtontho ngako mu Ufumu wa Mulungu omupula.” (

²⁹ Pecimvwa malizu ŵa Yohane, ŵanthu wonse na wosonkhesha msonkho, ezomela kuti Mulungu ni wolungama. Tetyo, ebatiziwa na Yohane.

³⁰ Koma Afalisi na Asambizyi ŵa Matetulo, pokana kubatiziwa na yeve ekana ŵeka vamene Mulungu epangwa kuŵacitila.)

³¹ Yesu epitilizya kulaŵila, “Kaya ŵanthu ŵa luko ino ningaŵalinganizye na cinji? Ali ngani ni cinji?

³² Ali ngani ŵana wokangana pa msika, noyitana na ayawo ku ayakine okonsha ayawo kuti, ‘Tikulizyilani ngʼoma ya ukwati, ni cikomo canji mwewo muliyovine? Tiyimba nzimbo za malilo, ni cikomo canji mwewo muliyolile?’

³³ “Pala Yohane Mbatizi peciwela, enzolilesha kulya nipo enzokumwalini vinyu. Mwewo mukuti, ‘Ekatiwa na ciŵanda.’

³⁴ Mwana wa Munthu wawela, akulya na kumwa nipo mukuti, ‘Muwoneni, uyu munthu ni walyela cakolwa, nipo ni muyawo wa ŵanthu wosonkhesha msonkho na wosasamala Matetulo.’

³⁵ Koma nzelu ya Mulungu yuwama pakapita nsita.”

Mwanakazi wocimwa ozoza mendo ŵa Yesu

³⁶ Muyakine wa mu cipani ca Afalisi eyita Yesu kuti akalye kwawo. Yesu eluta noloŵa mu ngʼanda ya Mfalisi wala noyayamila polyela.

³⁷ Mwala mu munzi mwenze mwanakazi wocimwa. Yeve ecimvwa kuti Yesu akulya mu ngʼanda ya Mfalisi wala, ewela na nsupa ya mafuta onunkhila.

³⁸ Eciyofukama ku vuli kwa mendo ŵa Yesu olila, notatika kuponesha misozi pa mendo ŵa Yesu, nopitilizya kuŵapukuta na sisi yake. Soti enzomfyomfyona mendo ŵake, noŵazoza na mafuta ŵala.

³⁹ Koma Mfalisi wala eyita Yesu peciwona ivi, etatika kulingilila kuti, “Uyu munthu kuti enze mneneli cendi, sembe wamziŵa mwanakazi uyu omukumya kuti ni wocimwa.”

⁴⁰ Apo Yesu elaŵila kuti, “Simoni, nupangwa kukuwuzya cinthu.” Yeve elaŵila kuti, “Asambizyi, laŵilani.”

⁴¹ Yesu elaŵila kuti, “Kwenze ŵanthu aŵili ekongola ndalama ku munthu okongolesha. Muyakine ekongola ndalama makumi asanu, muyakine ndalama zisanu.

⁴² Pakuti enzeve cowezyela, eŵalekelela nkhongole wonse aŵili. Lomba wewo ulingilila kuti pa aŵa aŵili ni ŵani angatemwe ngako wokongolesha uyu?”

⁴³ Simoni elaŵila kuti, “Nuyesa kuti welekelelewa vinyinji.” Yesu emuwuzya kuti “Wayasuka luweme.”

⁴⁴ Pecitetyo, Yesu ecewukila ku mwanakazi wala, nowuzya Simoni kuti, “Umuwona mwanakazi uyu? Newo naloŵa mu ngʼanda mwako muno, wewo uliyonipe manzi wosukila mendo ŵangu. Koma yeve waŵa otila misozi pa mendo ŵangu, noŵapukuta na sisi yake.

⁴⁵ Wewo uliyonipe moni nonimfyomfyona, koma yeve mwanaloŵela, wankhala omfyomfyona mendo ŵangu osalekezya.

⁴⁶ Wewo uliyonizoleke ku mutu kwangu na mafuta masiku wonse, koma yeve wazoleka mendo ŵangu na mafuta ŵa mtengo ngako na onunkhila.

⁴⁷ Kulaŵila vyendi, cinthemwa cikulu cawawonesha yeve, cusimikizya kuti Mulungu wamulekelela macimo ŵake anyinji. Koma munthu walekelelewa patontho otemwa patontho.”

⁴⁸ Tetyo, Yesu ewuzya mwanakazi wala kuti “Macimo ŵako alekelelewa.”

⁴⁹ Ŵala ŵenzokulya nawo etatika kulikonsha mu mitima mwawo kuti, “Kansi ni ŵani uyu olekelela macimo woteti?”

⁵⁰ Koma Yesu ewuzya mwanakazi wala kuti, “Cicetekelo cako cakupulumusha. Nkhoya na mtendele.”