Luka 5 - Chinsenga New Testament

Yesu oyita asambili wake wotatika

¹ Nsiku iyakine Yesu epanama mu mbali mwa Cimmana ca Galileya, ŵanthu anyinji enzompatikizya kuti amvwe Malizu ŵa Mulungu.

² Yeve ewona mawato aŵili mu citwa mwala. Okata masaŵi enze efuma mwamene umo, nipo enzosuka makombe ŵawo.

³ Yesu eloŵa mu wato umo, wenze wa Simoni, nomusenga kuti afwendezye patontho ku cimmana. Enkhala pansi, nipo peenze mu wato mwala, etatika kusambizya winji wa ŵanthu ŵala.

⁴ Pecisilizya kulaŵila, ewuzya Simoni kuti, “Kankhilani konoka, pozani makombe ŵanu kuti mkate masaŵi.”

⁵ Simoni elaŵila kuti, “Asambizyi, usiku wonse taŵa tuseŵenza, osakata kanthu, koma cikomo mwewo mwalaŵila tetyo ni ciweme nipoze makombe.”

⁶ Tetyo, ŵeve epoza makombe, nokata masaŵi anyinji ngako, motetyo, makombe ŵala etatika kungʼambika.

⁷ Ecitoyita ayawo, ŵa mu wato uyakine kuti azeaŵayavye. Ŵeve ewela, nipo ezuzya mawato aŵili mpaka enze pafupi nombila.

⁸ Simoni Petulo peciwona vamene ivo, efukama noŵelamila ngako pa menso pa Yesu elaŵila kuti, “Pepani Asikulu, nifumilemponi, pakuti nine munthu woyifya.”

^9-10 Elaŵila tetyo powona kuti yeve pamo na ayake wonse ŵeenze nawo, Yakobe na Yohane, ŵana ŵa Zebedayo, ekanganishiwa ngako kupaka kwa masaŵi ŵecikata. Tetyo, Yesu ewuzya Simoni kuti, “Usayope, kutatikila lomba uŵe wokata ŵanthu noŵaleta mu Ufumu wa Mulungu.”

¹¹ Motetyo, pecidonsela mawato wala ku silya, esiya vonse nomukonkha.

Yesu opozya munthu wa mambombo

¹² Yesu peenze mu munzi uyakine, kwiwela munthu muyakine enze na mambombo mu muŵili wonse. Peciwona Yesu, eziponesha pansi moŵelama pa menso pake notatika kudandaula. Elaŵila kuti, “Asikulu, mukapangwa, munganisuke.”

¹³ Yesu etambulula kwanja kwake nomukumya nolaŵila kuti, “Nupangwa, sukiwa!” Pamene apo mambombo ŵake esila.

¹⁴ Tetyo, Yesu emuwuzya kuti, “Cenjela, usawuzye aliyense ivi, ingoluta kwa wansembe akakuwone, nipo ukatwale nsembe yecilamula Mose. Yamene iyo iŵe mboni yosimikizya kuti wapola cendi.”

¹⁵ Koma mbili ya Yesu iŵilikilako, nipo maumba anyinji ŵa ŵanthu enzoungana kuti amvwe malizu ŵake, nipo soti kuti aŵapozye matenda ŵawo.

¹⁶ Koma yeve enzokuya ku malo kusapita–pita ŵanthu, nolombela kwamene uko.

Yesu opozya munthu wa vizo va kufwa

¹⁷ Nsiku iyakine Yesu enzosambizya. Pamene apo penzenkhezi Afalisi na Asambizyi ayakine ŵa Matetulo ofumila ku minzi yonse ya ku Galileya, na Yudeya, soti ku Yelusalemu. Mphamvu zofumila kwa Asikulu zenze mwa Yesu kuti awopozya olwala.

¹⁸ Tetyo, kwifwika ŵanthu ayakine na munthu wa vizo va kufwa, emutakulila pa macila. Eyesa kuloŵa naye mu ngʼanda kuti amunkhazike pa menso pa Yesu.

¹⁹ Cikomo ca ŵanthu enzepo anyinji, aliyofwane poloŵela naye. Motetyo, ekwela pa mtenje, nofumyapo mapale ayakine, emuselusha na macila ŵake nomufwisha pansi pakati pa ŵanthu, pa menso pa Yesu.

²⁰ Powona cicetekelo cawo, Yesu elaŵila kuti, “Mkwasu, macimo ŵako alekelelewa.”

²¹ Tetyo, Asambizyi ŵa Matetulo na Afalisi ŵala etatika kulikonsha mu mtima mwawo kuti, “Uyu munthu ni ŵani? Otafulila noliyita kuti ni Mulungu! Ni Mulungu yeka angalekelele macimo.”

²² Yesu enzoziŵa malingililo ŵawo, nipo eŵakonsha kuti, “Cikomo ni cinji mulingilila ivo mu mtima mwanu?

²³ Cipepu ni cotyani: kumuwuzya uyu munthu kuti, ‘Macimo ŵako alekelelewa,’ keno kumuwuzya kuti, ‘Uka, utatike kuyenda?’

²⁴ Koma kuti muziŵe kuti Mwana wa Munthu ali nawo ulamulilo pano pansi wolekelela macimo, wonani.” Pamene apo ewuzya wala wa vizo va kufwa kuti, “Uka, tola macila ŵako, wakuya ku ngʼanda.”

²⁵ Pamene apo wolwala wala ewuka wonse ololesha, nipo etola macila ŵala ŵenzepolele, nakuya kwawo otembezya Mulungu.

²⁶ Ŵanthu wonse ŵala ekanganishiwa ngako, notatika kutwala mcinzi kwa Mulungu. Ekatiwa na wowa elaŵila kuti, “Tawona vokanganisha lelo.”

Yesu oyita Levi

²⁷ Pa vuli pake Yesu efuma nowona munthu wosonkhesha msonkho, zina yake Levi, enze pa nchito mu ngʼanda ya msonkho. Emuwuzya kuti, “Nikonkhe.”

²⁸ Yeve eyima cendi, nosiya vonse, nomukonkha.

²⁹ Tetyo, Levi ewamyila Yesu malyelelo ku ngʼanda kwake. Wosonkhesha msonkho anyinji, pamo na ŵanthu ayakine, enze nawo pa malyelelo pamene apo.

³⁰ Afalisi pamo na Asambizyi ŵa Matetulo etatika kudandaula, nokonsha asambili ŵake kuti, “Cikomo ni cinji mukulya na kumwa pamo na wosonkhesha msonkho na ŵanthu wocimwa?”

³¹ Yesu eŵayasuka kuti, “Munthu wosalwala angapangwelini ngʼanga, koma wolwala.

³² Newo niliyowelele kuzoyita ŵanthu wolungama koma wocimwa, kuti ayaluke mtima.”

Yesu okonshewa va kulilesha kulya

³³ Ŵanthu ŵala ewuzya Yesu kuti, “Asambili ŵa Yohane olilesha kulya kanyinji–kanyinji nolombela, cimozi–mozi na asambili ŵa Afalisi, koma asambili ŵanu oyingokulya na kumwa.”

³⁴ Yesu eŵayasuka kuti, “Kansi mungakakamizye woyitiwa ku ukwati kuŵa na njala wolungula ali nawo pamo? Yayi.

³⁵ Ikafwike nsita yakuti wolungula akatolewe kufuma kwa ŵeve, niye patiakalileshe kulya.”

³⁶ Yesu eŵawuzya linganizyo, elaŵila kuti, “Munthu ongʼambalini cigamba ku covwala ca lomba nociŵila pa covwala ca kale. Cikomo cakuti akatetyo, waceneka covwala ca lomba cala, nipo cigamba ca lomba cizecilinganelini na covwala ca kale cala.

³⁷ Nipo munthu otilalini vinyu wa lomba mu matumba ŵa cikumba ca kale. Cikomo cakuti akatetyo, vinyu wa lomba wala ungʼamba matumba ŵala. Tetyo, vinyu wala utayike, matumba ŵala osila nchito.

³⁸ Koma vinyu wa lomba owutila mu matumba ŵa lomba soti.

³⁹ Nipo munthu akayingolaŵa vinyu wa kale, wa lomba angawupangwelini. Pala olaŵila kuti, ‘Wa kale niye vinyu ngawo–ngawo.’”