Luka 4 - Chinsenga New Testament

Yesu oyesewa na Satana

¹ Yesu, wozuzyiwa na Mzimu Mtuŵa, ewelako ku mmana wa Yolodani kwala. Mzimu Mtuŵa wala enzomutangulila mu cipululu

² masiku makumi anayi (40). Kwamene uko Satana enzomuyezya. Yesu enzokulyalini kanthu masiku awo, nipo masiku pecisila, ecimvwa njala.

³ Lomba Satana emuwuzya kuti, “Keno nimwe Mwana wa Mulungu, lamulilani mwala uli apa kuti uyaluke mkate.”

⁴ Koma Yesu eyasuka kuti, “Malembo olaŵila kuti, ‘Munthu angaŵelini na moyo na cakulya ceka.’”

⁵ Pa vuli pake Satana etola Yesu kuya naye palulu, nipo pa kansita katontho emuwonesha vyalo va mafumu wonse ŵa pano pansi,

⁶ nomuwuzya kuti, “Nikupeni ulamulilo na mcinzi wonse uyu, cikomo vipewa kwa newo, nipo nuvipa kwa aliyense wanapangwa.

⁷ Motetyo, mukanilambila, vonse ivi vizevinkhale vanu.”

⁸ Koma Yesu eyasuka kuti, “Malembo olaŵila kuti, ‘Uwolambila Asikulu Mulungu wako, nipo uwoŵatumikila ŵeve ŵeka.’”

⁹ Posilizyila Satana etola Yesu kuya naye ku Yelusalemu, nomupanamika palulu ngapo–ngapo pa Ngʼanda ya Mulungu. Nomuwuzya kuti, “Keno nimwe Mwana wa Mulungu, muziponye pansi kufuma pano,

¹⁰ pala Malembo olaŵila kuti, ‘Mulungu azealamulile angelo ŵake kuti akusamalileni nokucingililani.’ Soti,

¹¹ ‘Ŵeve azeamutakuleni mu manja mwawo kuti mendo wanu asacitiwe pa myala.’”

¹² Koma Yesu elaŵila kuti, “Malembo olaŵila kuti, ‘Osaŵayezya Asikulu, Mulungu wako.’”

¹³ Tetyo, Satana pecisilizya kumuyezya mu vonse ivi, esiyana naye kulindila nsita iyakine.

Yesu otatika nchito yake ku Galileya

¹⁴ Yesu ewelela soti ku Galileya na mphamvu ya Mzimu Mtuŵa. Mbili yake iŵilikila kuzungulila calo conse.

¹⁵ Enzosambizya mu makacisi ŵa Ayuda, nipo ŵanthu wonse enzomutembezya.

Ŵanthu omukana Yesu ku Nazaleti

¹⁶ Nsita iyakine Yesu efwika ku Nazaleti kwecilelewela. Nipo pa nsiku ya Sabata eloŵa mu kacisi wa Ayuda, ngani mweciyoŵelelela, nopanama kuti aŵelenge malizu.

¹⁷ Emupa buku ya Mneneli Yesaya. Tetyo, yeve evula buku yala nofwana polembewa kuti,

¹⁸ “Mzimu wa Leza uli pali newo, pakuti wanizoza kuti nikaŵilizye Malizu Aweme ku wozingwa. Enituma kuti nikaŵilizye cimasuko kwa ŵa mu jele kuti azeamangululiwe, na kwa mphofu kuti zizeziwone soti. Enituma kuti niŵape mtendele ŵanthu onzunzika,

¹⁹ noŵilizya nsita yakuti Leza azeapulumushe ŵanthu ŵake.”

²⁰ Yesu evala buku yala noyitwala kwa atumiki ŵa kacisi, nonkhala pansi. Ŵanthu wonse ewungana mu kacisi mwala enzoyingomulolesha.

²¹ Tetyo, Yesu eŵawuzya kuti, “Lelo vacitika cendi vecilaŵililatu Malembo amwamvwa kuŵelengewa.”

²² Ŵanthu wonse enzozomekezya, nokanganishiwa na malizu okata mtima ŵenzolaŵila yeve. Ŵanthu ŵala enze kuti, “Kansi uyu ni mwanalini wa Yosefe?”

²³ Apo Yesu eŵawuzya kuti, “Ni cendi muzemuniwuzye linganizyo yala yakuti, ‘Wewo ngʼanga, zipozye weka.’ Muzemulaŵile soti ‘Tecimvwa vemwicita ku Kapilinamu, lomba mucite soti vamene ivo kuno kwanu.’”

²⁴ Eŵawuzya soti kuti, “Ni cendi nulaŵilisha, paliye mneneli opokelewa luweme ku munzi kwawo.

²⁵ Kulaŵila vyendi, pala penze anyankufwilwa anyinji pakati pa Aisilayeli pa nsita ya Mneneli Eliya, mvula iliyolokwe vyaka vitatu na miyezi isanu na umo, nipo kwenze njala ikulu mu calo conse.

²⁶ Eliya aliyotumiwe kwa yumo wa ŵeve ŵala, koma etumiwa ku nyankufwilwa wa ku munzi wa Selepata, mu calo ca Sidoni.

²⁷ Penze soti ŵa mambombo anyinji pakati pa Aisilayeli nsita ya Mneneli Elisa, koma penzeve cukanga yumo pa ŵala epozyewa. Epozyewa ni Namani yeka wa mu calo ca Siliya.”

²⁸ Ŵanthu wonse enze mu kacisi wa Ayuda mwala pecimvwa malizu aŵa, ecipya mtima ngako.

²⁹ Epanama nomufumyila kunja kwa munzi, nakuya naye palulu pa lupili pecimanga munzi wawo. Elaŵila kuti opangwa kuti akampoze ku nyansi,

³⁰ koma yeve eyingokuzopita pakati pawo, nakuya.

Yesu opozya munthu wokatiwa na viŵanda

³¹ Yesu eluta ku Kapilinamu, munzi uyakine wa ku Galileya, nosambizya pa nsiku ya Sabata.

³² Vosambizya vake, veŵakata ngako mtima ŵanthu, cikomo cakuti enzolaŵila mowonesha ulamulilo ngani mwine wake.

³³ Mu kacisi wa Ayuda, mwenze munthu wokatiwa na ciŵanda. Elaŵila moŵilikizya kuti

³⁴ “Aa, kansi takuyifyilani cinji, mwewo Yesu wa ku Nazaleti? Kansi mwawela kuzoticeneka? Nakuziŵani, nimwe Mtuŵa wala wa Mulungu.”

³⁵ Koma Yesu ecimula cala ciŵanda kuti, “Nkhala celele, fuma mwa uyu munthu.” Pamene apo ciŵanda cala cemuponesha pansi pakati pa ŵanthu, nofuma osamuceneka.

³⁶ Ŵanthu wonse ŵala ekanganishiwa, etatika kukonshana kuti, “Malizu aŵa ni wotyani? Cukanga viŵanda ovilamulila na mphamvu na ulamulilo, nipo vufuma cendi.”

³⁷ Tetyo, mbili ya Yesu yeŵilikila kulikonse.

Yesu opozya ŵanthu anyinji

³⁸ Yesu eyima nofuma mu kacisi wa Ayuda mwala, eloŵa mu ngʼanda ya Simoni. Anyavyala ŵa Simoni enzolwala malungo akulu, nipo ŵanthu esenga Yesu kuti acitepo kanthu.

³⁹ Yesu epanama pafupi na ŵeve, nocimula malungo ŵala, nipo malungo esila. Pamene apo mwanakazi wala ewuka notatika kuŵawamyila cakulya.

⁴⁰ Zuŵa peyenzoloŵa, ŵanthu wonse enze na ayawo olwala malwele wosiyana–siyana, eŵaleta kwa Yesu. Yeve eyika manja pa olwala noŵapozya wonse.

⁴¹ Navo soti viŵanda venzofuma mu ŵanthu anyinji moŵilikizya nolaŵila kuti, “Mwewo nimwe mwana wa Mulungu.” Koma yeve enzovikalipila, enzovizomezyalini kuti vilaŵile, cikomo viziŵa kuti enze cendi Mesiya, Mpulumushi Wolayizyiwa wala.

Yesu akuyoŵilizya ku Yudeya

⁴² Pekwecica, Yesu efumako ku Kapilinamu kwala nakuya ku malo kosapita–pita ŵanthu. Umba ya ŵanthu yetatika kumusakila, nipo emufwana, eyezya kumulesha kuti osati aŵasiye.

⁴³ Koma yeve eŵawuzya kuti, “Nuwamila kuyoŵilizya Malizu Aweme olaŵila va Ufumu wa Mulungu ku minzi iyakine soti, pakuti niye vecinitumila Mulungu.”

⁴⁴ Motetyo, yeve enzoŵilizya mu makacisi ŵa Ayuda ŵa ku Yudeya.