Luka 3 - Chinsenga New Testament

Uŵilizyi wa Yohane Mbatizi

¹ Pa caka ca kumi na cisanu ca ufumu wa Tibeliyo, mfumu ya ku Roma, Ponsiyo Pilato peenze bwanamkubwa wa ku Yudeya. Helode enzolamulila ku citwa ca Galileya. Filipo, mkwawo, enzolamulila ku citwa ca Ituleya na ku citwa ca ku Tlakoniti. Lisaniasi enzolamulila ku citwa ca ku Abilene,

² nipo Anasi na Kayafa enze Akulu ŵa Ansembe. Pa nsita yamene iyo Mulungu ecipa Yohane wala mwana wa Zakaliya, malizu ŵake, mu cipululu.

³ Tetyo, Yohane wala eyendela calo conse cozungulila mmana wa Yolodani notatika kuŵilizya. Enzowuzya ŵanthu kuti, “Lekani viyipa vanu, mubatiziwe, na kuti Mulungu akulekeleleni ku macimo ŵanu.”

⁴ Ivi vecitika ngani mwevilembewela mu Malembo ŵa mneneli Yesaya kuti, “Lizu ya oŵilikizya mu cipululu ikuti, ‘Wamyani njila yakuti akapitemo Leza. Lungamikani njila yakuti azepitemo.

⁵ Visengu vonse vizevifwikiliwe cefyani lupili iliyonse na milundu yonse. Yondololani njila zovyongoloka, salazyani njila zosalungama.

⁶ Motetyo, ŵanthu wonse azeawone cipulumusho, cofumila kwa Mulungu.’”

⁷ Ŵanthu anyinji enzokuza kuti yeve aŵabatize. Yeve enze kuti, “Mwewo ŵana ŵa njoka, ni ŵani ekucenjezyani kuti muwutuke cilango ca Mulungu cikuza?

⁸ Citani nchito zowonesha vitwalo vakuti mwayaluka cendi mtima. Nipo mu mtima mwanu musatatike kulaŵila kuti ‘Awusu wasu ni Abulahamu,’ Nukuwuzyani vyendi kuti Mulungu otwesha kuyalusha myala ili apa kuti iŵe ŵana ŵa Abulahamu.

⁹ Lomba teti katemo kali kale pa nsinde pa vimiti, tetyo cimuti ciliconse cosatwala vitwalo viweme, azeacitende nocipoza pa mulilo.”

¹⁰ Pamene apo ŵanthu ŵala ekonsha Yohane kuti, “Nga Mulungu opangwa sewo kuti ticite viweme vanji?”

¹¹ Yeve elaŵila kuti, “Ali na mikhanjo iŵili, apeko muyake aliye. Nipo wamene ali naco cakulya, acite cimozi–mozi.”

¹² Kwiwela soti wosonkhesha msonkho kuti Yohane aŵabatize. Ŵeve emukonsha kuti, “Asambizyi, kansi sewo tiwocita viweme vanji?”

¹³ Yeve elaŵila kuti, “Osasonkhesha msonkho woikililapo pa vecikuwuzyani.”

¹⁴ Asilikali emukonsha kuti, “Nga sewo tiwocita viweme vanji?” Yeve elaŵila kuti, “Osatola ndalama za munthu aliyense momuyofya keno momutalizya wenye. Muwokutila na malipilo ŵanu.”

¹⁵ Cilolelo ca ŵanthu citatika kukula, nipo wonse enzolingilila mu mitima yawo va Yohane kuti keno niye Mesiya, Mpulumushi Wolayizyiwa wala.

¹⁶ Tetyo, Yohane enzoŵawuzya wonse kuti, “Newo nukubatizani na manzi, koma alipo akuza wa mphamvu wopula newo. Mwakuti newo nine wosawamila kumangulula myando za nkhwaŵilo zake. Yeve azekubatizeni na Mzimu Mtuŵa na mulilo.

¹⁷ Jeko ili mu manja kuti awamyile posansila tiligu yake. Tetyo, azeatile tiligu iyake mu cimphaka cake, koma vosalila azeavishoke mu mulilo wosazimyika.”

¹⁸ Yohane enzoŵilizya Malizu Aweme poŵawonesha moteti, na mu njila ziyakine zinyinji.

¹⁹ Nipo soti ecimula mfumu Helode cikomo colungula Helodiyasi, mwanakazi wa mkwawo, soti na cikomo ca viyipa viyakine vinyinji venzocita.

²⁰ Pa vuli pake, kuyikililapo vonse ivi, Helode ekhomela wala Yohane mu jele.

Yesu wobatiziwa

²¹ Nsiku iyakine ŵanthu ŵala pecibatiziwa, Yesu naye soti ebatiziwa. Yeve penzolomba, Kululu kwevulika

²² nipo Mzimu Mtuŵa eseluka pa yeve, owoneka ngani nkhunda. Tetyo, kwimvwika malizu kufumila Kululu olaŵila kuti, “Wewo niwe Mwana wangu wotemweka. Nusangalala nawe ngako.”

Makolo ŵa Yesu

²³ Yesu enze na vyaka makumi atatu (30) pecitatika nchito yake yosambizya. Ŵanthu enzomuyezya mwana wa Yosefe, wamene enze mwana wa Eli,

²⁴ Mwana wa Matati, mwana wa Levi, mwana wa Meleki, mwana wa Yanai, mwana wa Yosefe,

²⁵ mwana wa Matatiyase, mwana wa Amose, mwana wa Nahumu, mwana wa Hesili, mwana wa Nagayi,

²⁶ mwana wa Mahati, mwana wa Semeini, mwana wa Yosefe, mwana wa Yoda,

²⁷ mwana wa Yohanani, mwana wa Lesa, mwana wa Zelubabele, mwana wa Salatiyele, mwana wa Neli,

²⁸ mwana wa Meliki, mwana wa Adi, mwana wa Kosamu, mwana wa Elimadama, mwana wa Ele,

²⁹ mwana wa Yose, mwana wa Eliezele, mwana wa Yolimu, mwana wa Matati, mwana wa Levi,

³⁰ mwana wa Simiyoni, mwana wa Yudasi, mwana wa Yosefe, mwana wa Yonamu, mwana wa Eliyakimu,

³¹ mwana wa Meleya, mwana wa Mena, mwana wa Matata, mwana wa Natamu, mwana wa Davide,

³² mwana wa Yese, mwana wa Obede, mwana wa Bowazi, mwana wa Sala, mwana wa Nasoni,

³³ mwana wa Aminadabu, mwana wa Adimini, mwana wa Alini, mwana wa Hesilomu, mwana wa Pelezi, mwana wa Yuda,

³⁴ mwana wa Yakobo, mwana wa Isaki, mwana wa Abulahamu, mwana wa Tela, mwana wa Naholo,

³⁵ mwana wa Selugi, mwana wa Leu, mwana wa Pelegi, mwana wa Ebele, mwana wa Sela,

³⁶ mwana wa Kayinani, mwana wa Alifakisadi, mwana wa Semu, mwana wa Nowa, mwana wa Lameki,

³⁷ mwana wa Metusela, mwana wa Enoki, mwana wa Yaledi, mwana Mahalalele, mwana wa Kayinani

³⁸ mwana wa Enosi, mwana wa Seti, mwana wa Adamu, wamene enze mwana wa Mulungu.