Luka 2 - Chinsenga New Testament

Kuvyalika kwa Yesu Kristu

¹ Mu masiku ŵala, Augusto, mfumu ya ku Roma, elamulila kuti kuŵe kulembela ŵanthu ŵa mu vyalo vake vonse.

² Kulembela uko kwenze kotatika, nipo kwicitika Kwiliniyo peenze bwanamkubwa wa calo ca Siliya.

³ Tetyo, ŵanthu wonse eluta kuyolembesha, aliyense ku munzi wake.

⁴ Yosefe naye soti eyima kufuma ku Nazaleti, munzi wa ku Galileya. Eluta ku Yudeya, ku munzi wa mfumu Davide, zina yake Betelehemu, cikomo enze wa mu banja na mkoka wa Davide.

⁵ Eluta kuyolembeshewa pamo na Maliya, wenzoyendela enze na pakati.

⁶ Peenze kwamene uko, nsita yakuti Maliya awone mwana ikwana,

⁷ nipo evyala mwana wawiya mwanalume. Emuvunga mu nyula nomulalika mu colyela ca vitekwa, cikomo esoŵa malo mu ngʼanda ya alwendo.

Angelo oziŵisha aciŵeta

⁸ Ku malo uko kwenze aciŵeta enzoŵetela vitekwa vawo nsita ya usiku.

⁹ Movundumukizya, mngelo wa Asikulu ecizopanama pakati pawo, nipo ulemelelo wa Asikulu wiŵala ponse pozungulila, motetyo, aciŵeta ŵala ecita wowa ngako.

¹⁰ Koma mngelo wala eŵawuzya kuti, “Musayope, nazokuwuzyani Malizu Aweme, ŵatiazesangalalishe ngako ŵanthu wonse.

¹¹ Usiku wamene uno mu munzi wa Davide wamuvyalikilani Mpulumushi, wamene ni Kristu Asikulu.

¹² Ciziŵikilo cake ni ici: mukafwane mwana lucece, wovungiwa na nyula, ali lele mu colyela ca vitekwa.”

¹³ Movundumukizya pamo na mngelo wamene wala, pewoneka umba ikulu ya angelo ayakine, otembezya Mulungu na malizu olaŵila kuti,

¹⁴ “Ulemelelo kwa Mulungu Kululu, nipo pano pansi mtendele pakati pa ŵanthu ŵakusangalala nawo.”

¹⁵ Mngelo pecifumapo kuwelela Kululu, aciŵeta ŵala ewuzyana kuti, “Tiyeni takuya ku Betelehemu, tikawone vacitika ivi, vatiziŵisha Asikulu.”

¹⁶ Tetyo, eluta mofulumila, nofwana Maliya na Yosefe, na lucece ali lele mu colyela ca vitekwa cala.

¹⁷ Pecimuwona, aciŵeta ŵala eŵafotokozela mngelo wala veciŵawuzya va mwana.

¹⁸ Wonse ecimvwa enzokanganishiwa pa venzoŵawuzya aciŵeta.

¹⁹ Koma Maliya enzosunga vonse novilingilila mu mtima mwake.

²⁰ Pa vuli pake aciŵeta ŵala ewelela oyamika notembezya Mulungu cikomo ca vonse vecimvwa noviwona. Vonse venze ngani mweciŵawuzyila mngelo.

Yesu osilimukiwa notwaliwa ku ngʼanda ya Mulungu

²¹ Pepepita masiku asanu na atatu, mwana wala emusilimula nomteya zina yake Yesu. Zina iyi niye yecimuteya mngelo, Maliya penzeakaliyokuŵa na pakati.

²² Nsita ifwika yakuti Yosefe na Maliya acite mwambo wotuŵishiwa kukonkha Matetulo ŵa Mose. Tetyo, mwana wala eciya naye ku Yelusalemu kuti akamutwale kwa Asikulu Mulungu.

²³ Pakuti mu Matetulo ŵa Asikulu muli malizu olaŵila kuti, “Mwana mwanalume wawiya aliyense, apatuliwe kuti aŵe wawo wa Asikulu.”

²⁴ Enzotwala soti nsembe yokonkha Matetulo ŵa Asikulu olaŵila kuti, “Atwale njiŵa ziŵili keno tunkhunda tutontho–tutontho tuŵili.”

²⁵ Kwala ku Yelusalemu kwenze munthu muyakine zina yake Simiyoni. Enze munthu wolungama na woyopa Mulungu. Enzolindila nsita yakuti Mulungu azeapulumushe Aisilayeli, nipo enze na Mzimu Mtuŵa.

²⁶ Mzimu Mtuŵa wala wimuwululila kuti afwelini akaliyowona Mesiya, Mpulumushi Wolayizyiwa wa Mulungu.

²⁷ Nsiku yala Mzimu weŵatangulila mu Ngʼanda ya Mulungu, nipo avyazi pecileta mwana Yesu, kuti acite ngani mwambo wa Matetulo,

²⁸ emutola mu manja mwake, notembezya Mulungu na malizu olaŵila kuti,

²⁹ “Asikulu, lomba mwamangulula mtumiki wanu na mtendele, pakuti mwacita cendi vemwilayizya.

³⁰ Na menso ŵangu aŵa nawona cendi cipulumusho cala,

³¹ cemwiwamya kuti ŵanthu ŵa mitundu yonse aciwone.

³² Kuŵala kuzosanikila ŵanthu ŵa mitundu iyakine kuzonkhala mcinzi wa ŵanthu ŵa Aisilayeli.”

³³ Awisi na anyina enzoyingokanganishiwa navo venzolaŵila Simiyoni va mwana wala.

³⁴ Ciyakine Simiyoni eŵashukisha, nowuzya Maliya, nyina wa mwana wala, kuti, “Mwana uyu Mulungu wamuyika kuti Aisilayeli anyinji azeapone, anyinji soti azeawuke, cikomo ca yeve. Azeaŵe ciziŵikilo cofumila kwa Mulungu, cimene ŵanthu anyinji azeasushane naco,

³⁵ kuti tetyo malingililo ali mu mitima ya ŵanthu anyinji azeawonekele patuŵa. Nipo na wewo soti mwanakazi, citinthi cizekulase ku mtima wako ngani cipula.”

³⁶ Kwenze soti mneneli mwanakazi, zina yake Ana, mwana wa Fanuwelo, wa mkoka wa Asele. Enze mkulukazi ngako. Enze wolunguliwa vyaka visanu na viŵili tyala,

³⁷ pa vuli pake enze nyankufwilwa nofwika vyaka makumi asanu na atatu na mphuzyo zinayi (84). Enzofumalini mu Ngʼanda ya Mulungu enzotumikila Mulungu usiku na mzuŵa polomba noleka kulya.

³⁸ Yeve efwikako nsita yamene yala, notatika kutembezya Mulungu, nolaŵila va mwana wala na ŵanthu wonse enzolindila nsita Mulungu yatiazeapulumushile Yelusalemu.

Owelela ku Nazaleti

³⁹ Yosefe na Maliya pecicita vonse kulingana na Matetulo ŵa Asikulu, ewelela ku Galileya, ku munzi kwawo ku Nazaleti.

⁴⁰ Mwana wala penzokula, eciŵa wa mphamvu na nzelu ngako nipo cisomo ca Mulungu cenze pa yeve.

Yesu pakati pa asambizyi mu Ngʼanda ya Mulungu

⁴¹ Avyazi ŵa Yesu enzoluta ku Yelusalemu caka na caka ku cisangalalo ca Pasaka.

⁴² Yesu penze na vyaka kumi na viŵili ŵeve eluta kwamene uko ngani mwaciyoŵelezi.

⁴³ Masiku ŵa cisangalalo ico pecisila eyima nowelela kwawo, mulumbwana wala Yesu nosalila ku Yelusalemu, avyazi ŵake osaziŵa.

⁴⁴ Ŵeve eyesa kuti ali pamo na ayawo ŵa ulwendo, eyenda ulwendo wa nsiku imo. Koma etatika kumusakila pakati penekwawo na enoyawo.

⁴⁵ Peciwona kuti omufwanalini, ewelela ku Yelusalemu kuyomusakila.

⁴⁶ Pecisila masiku atatu, emufwana mu Ngʼanda ya Mulungu, ali nkhezi pakati pa asambizyi, akumvwa malizu ŵawo, noŵakonsha makonsho.

⁴⁷ Wonse enzokumvwa enzokanganishiwa na malizu ŵake, mayasuko ŵake ŵa nzelu.

⁴⁸ Avyazi ŵake pecimuwona, ekanganishiwa, nipo anyina emukonsha kuti, “Mwanawe watisawushilanji teti? Newo na auso tatamana kukusakila.”

⁴⁹ Koma Yesu elaŵila kuti, “Cikomo ni cinji camunisakilila? Kansi muziŵalini kuti nuwamilofwanika mu Ngʼanda ya Atata?”

⁵⁰ Koma ŵeve aliyomvwishishe venzoŵayasuka.

⁵¹ Tetyo, Yesu ewelela nawo pamo, ku Nazaleti, nipo enzoŵamvwila. Anyina enzosunga vonse ivi novilingilila mu mtima mwawo.

⁵² Nipo Yesu enzokula mu nzelu na mu msinkhu, nipo Mulungu na ŵanthu wonse enzosangalala naye ngako.