Aefeso 6 - Chinsenga New Testament

Ŵana na avyazi

¹ Mwanamwe, pakuti nimwe ŵake ŵa Asikulu, muwomvwila avyazi ŵanu, pakuti ici ni cinthu ciweme cocita.

² “Twalani mcinzi kwa awusu wanu na anyina wanu” – iyi ni tetulo yotatika ili na layizyo iyikiwapo:

³ “Kuti vonse viyende luweme na mwewo nakuŵa na moyo utali mu calo.”

⁴ Mwewo aziwusu wasu osakalifya ŵana ŵanu, koma muwoŵalela poŵalangiza noŵasambizya mu umoyo wa Cikristu.

Ŵazya na asikulu ŵawo

⁵ Ŵazya mvwilani asikulu wanu na wowa notutumila. Muwocita teti na mtima wa cilungamo ngani mucitila Kristu.

⁶ Citani ici osati cikomo cakuti okuwonani akutembezyeni, koma ngani ŵazya ŵa Kristu, ocita cakupangwa Mulungu kufuma ku mitima yanu.

⁷ katani nchito zanu na mtima wonse ngani mutumikila Asikulu, osati ŵanthu.

⁸ Kumbukani kuti Asikulu azeamuwezyeleni monse pa nchito ziweme zamucita, cukanga kuti nimwe ŵazya keno ŵa ufulu.

⁹ Mwewo asikulu, mukocita cimozi–mozi ku ŵazya ŵanu, osaŵayofya, pakuti muziŵa kuti Asikulu ŵanu monse ali Kululu, na kuti kuliye msalulo kwa ŵeve.

Vida va nkhondo va Mulungu

¹⁰ Posilizyila nikuti, ŵani otangʼa mwa Asikulu popitila mu mphamvu zake.

¹¹ Vwalani vida va nkhondo vakumpani Mulungu, kuti mutweshe kupanama na kulwana na wenye wa Satana.

¹² Pakuti tulwanalini na ŵanthu, koma tulwana na maufumu, maulamulilo na mphamvu za mu calo cino ca pansi ca mfinzi, koma soti na viŵanda va mululu.

¹³ Tetyo, vwalani vovwala va nkhondo lomba! Kuti nsiku iyipa ikayowela, muzetweshe kulwa na kuti mukayocita vonse mukapaname nji.

¹⁴ Tetyo, nkhalani wokonzeka, povwala vyendi ngani bande yomangisha mu luwunda; vwalani cilungamo ngani vovwala vocingilizya pa nganga panu.

¹⁵ Nipo kapamphu kanu poŵilizya Malizu Aweme ŵa mtendele kaŵe ngani nkhwaŵilo zanu.

¹⁶ Nsita zonse muŵe na cicetekelo ngani vishango vanu vokucingilizyani, vatimukovikila mimvwi yonse yoyaka mulilo wa Satana.

¹⁷ Zomelani cipulumusho ngani visote vanu, na Malizu ŵa Mulungu ngani vipula vakupani Mzimu.

¹⁸ Muwolomba mu Mzimu nsita zonse nosenga Mulungu pa vamupangwa. Ŵani celu na wotangʼa pamulombela atuŵa mtima.

¹⁹ Monilombelako nane soti. Musengeni Mulungu kuti anipe malizu ŵa cilungamo kuti nikakonkholole cisinsi ca Malizu Aweme mosacita wowa.

²⁰ Nine kazembe wa Malizu Aweme, cukanga mu jele. Tetyo, lombani kuti nipitilizye kuŵilizya mosacita wowa, ngani mwanupangwikila.

Malizu wosilizyila

²¹ Tikiko, mkwasu wotemweka, nyanchito wocetekeleka mu nchito ya Asikulu, akupeni nkhani ya newo, kuti muziŵe mwanilili.

²² Ni cikomo cake numutuma yeve kwa mwewo kuti akuwuzyeni mwatilili tonse nokutangʼishani.

²³ Mulungu Atata na Asikulu Yesu Kristu akupeni mwenekwasu monse mtendele, cinthemwa na cicetekelo.

²⁴ Cisomo ca Mulungu ciŵe na mwewo monse mutemwa Asikulu ŵasu Yesu Kristu na cinthemwa cosasila.