Aefeso 5 - Chinsenga New Testament

Kuŵa mu kuŵala

¹ Pakuti nimwe ŵana wotemweka ŵa Mulungu, muwamila kuŵa ngani yeve.

² Motemwana ngani Kristu mwecititemwela sewo, notwala moyo wake cikomo ca sewo. Elitwala ngani ni cotwala conunkhila na nsembe yotemwesha Mulungu.

³ Pakuti nimwe ŵanthu ŵa Mulungu, ni ciwemelini kuti nkhani za ucende keno za ciwelewele keno zolitemwa zolaŵiliwa pali mwewo.

⁴ Ni ciwemelini kuti mwewo molaŵila malizu ayipa, wotukana na ŵa uzende koma molaŵila malizu otembezya Mulungu.

⁵ Muziŵe kuti munthu aliyense wa ucende, wa kacenche ocita lunkhumbwa (pakuti lunkhumbwa ili ngani mafano) akaloŵelini nawo mu Ufumu wa Kristu na Mulungu.

⁶ Osazomezya aliyense kukupusishani na malizu ŵa wenye, pakuti ni cikomo ca ivi vinthu voteti ukali wa Mulungu uwela pali ŵala osamumvwila.

⁷ Motetyo, osakatizyana nawo ŵanthu woteti.

⁸ Namwe kale mwenze mfinzi, koma lomba nimwe kuŵala mwa Asikulu. Tetyo, mukonkhala ngani ŵana akuŵala.

⁹ Pala pali kuŵala pofwanika soti uweme wonse, cilungamo conse, na cendi conse.

¹⁰ Muwoyezya–yezya kuziŵa vingatemweshe Asikulu.

¹¹ Musakatizyane nawo ŵanthu ocita vinthu viliye nchito va mfinzi, koma muŵawulule.

¹² Ni ca nsoni ngako cukanga kulaŵila vakucita mu cisinsi.

¹³ Koma ciliconse cuwululika na kuŵala cuwonekela,

¹⁴ pakuti ciliconse cuwululika cikuŵa kuŵala. Niye cikomo cake olaŵila kuti: “Uka wewo uli lele, uka ku imfwa, na kuti Kristu akusanikile.”

¹⁵ Motetyo, muŵe wocenjela mu unkhalo wanu. Osaŵa ngani ŵanthu wosaziŵa, koma ngani ŵanthu ŵa nzelu.

¹⁶ Ŵani ŵa kapamphu, osataya nsita yanu pa tyala, pakuti masiku ŵano ni ayipa.

¹⁷ Ni cikomo cake, osaŵa vipuŵa, koma yezyani kufwana cakupangwa Asikulu.

¹⁸ Osakolwa na vinyu, pakuti kukolwa kukucenekeni, koma muzuzyiwe na Mzimu.

¹⁹ Molaŵizyana yumo na muyake na malizu ŵa Masalimo, na nzimbo za Mulungu, imbani kwa Asikulu nomucinzika mu mitima yanu.

²⁰ Muwotembezya Mulungu Atata nsita zonse cikomo ca zonse, mu zina ya Asikulu ŵasu Yesu Kristu.

Anakazi na analume mu ukwati

²¹ Mwewo muyopa Kristu muwomvwana.

²² Mwewo anakazi, muwomvwila analume ŵanu ngani mwamumvwila Asikulu.

²³ Pakuti mwanalume ni mutu wa mkazi wake, ngani Kristu ni mutu wa Mpingo wamene uli muŵili wake, nipo yeve mwine ni mpulumushi wa Mpingo.

²⁴ Tetyo, anakazi awomvwila analume ŵawo pa vonse ngani Mpingo umvwila Kristu.

²⁵ Analume, temwani anakazi ŵanu ngani Kristu otemwa mpingo wake notwala moyo wake pa Mpingo.

²⁶ Ecita ici kuwutuŵisha powusuka na manzi nipo na malizu ŵake.

²⁷ Epangwa kuti akawupanamike pa menso pake uli na ulemelelo, uliye cilema, keno mankhwinya, keno kanthu kalikonse koyifya, koma ukaŵe utuŵa na wa ngwilyo cendi.

²⁸ Motetyo, analume owamila kutemwa anakazi ŵawo ngani mwakutemwela miŵili yawo. Pakuti wala otemwa mkazi wake otemwa muŵili wake.

²⁹ Paliyiletu otinkha muŵili wake, koma owulyesha nowusamalila luweme, ngani Kristu mwakucitila ku mpingo.

³⁰ Ocita teti cikomo cakuti mpingo ni muŵili wake, nipo sewo nise vizo vake.

³¹ Pala Malizu ŵa Mulungu olaŵila kuti, “Ni cikomo cake mwanalume okosiya awisi na anyina na kuyopatikizyana na mkazi wake, nipo aŵili aŵa akaŵe muŵili umo.”

³² Malizu aŵa, otiwululila cisinsi cotangʼa, niye kuti cisinsi ici cukumya Kristu na Mpingo.

³³ Koma olaŵila soti va mwewo, kuti mwanalume aliyense awotemwa mkazi wake ngani mwakulitemwela mwine, nipo mwanakazi awoyopa mulume wake.