Aefeso 4 - Chinsenga New Testament

Kuŵa ŵamo ŵa mpingo uli muŵili wa Kristu

¹ Pa cikomo ici, newo wa mu jele cikomo cotumikila Asikulu, numukoseshani kuŵa na unkhalo wowamila kuyitiwa kwanu.

² Mukokuŵa olicefya, olezya na opililana nsita zonse, mukokuŵa olekelelana mu cinthemwa,

³ yezyani ngako kuti musunge umozi wakukupani Mzimu na mtendele umumangani pamo.

⁴ Pali muŵili umo, Mzimu umo, ngani cilolelo cimo cecikuyitilani Mulungu.

⁵ Pali Asikulu ŵamo, na cicetekelo cimo, na ubatizo umo.

⁶ Pali Mulungu yumo ali Awisi ŵa wonse, na Asikulu pa vonse na woseŵenza kupitila mu vonse nokuŵa mu vonse.

⁷ Aliyense wa sewo wapokela cawanzi ca pa mbali culingana na cawatipa Kristu.

⁸ Ngani Malembo olaŵila kuti: “Peciya Kululu ngako, etola ŵazya anyinji ŵecikata, nakupa vawanzi ku ŵanthu ŵake.” (

⁹ Keno malizu olaŵila kuti, “eciya Kululu,” niye kuti cutanthauza kuti cotatika ewela pansi ngako pa calo.

¹⁰ Kuti wala ewela pansi niye eciya Kululu ngako kuti azuzyiletu konse na yeve.)

¹¹ Ni yeve “ecipa vawanzi ku ŵanthu.” Vawanzi vake kuti, ayakine aŵe nthumi na ayakine aneneli, ayakine alaliki, na ayakine soti aŵe abusa na asambizyi.

¹² Ecita ivi kukonzekela atuŵa mtima ku nchito ya utumiki, kuti muŵili wa Kristu umangiwe.

¹³ Motetyo, posililila tonse tikawele pamo ku yumo wala ufwanika pocetekela na poziŵa Mwana wa Mulungu. Pati tikakule na kufwika pa muyezyo ngawo wa Kristu.

¹⁴ Tikaŵelini soti malucece okankhiwa–kankhiwa na cinkhuka, nokankhiwa uku na uku na vimphepo va visambizyo va ŵanthu ŵa wenye opumvyisha ŵanthu nakucenjelesha kwawo.

¹⁵ Koma polaŵila vyendi mu mtima wa cinthemwa, tikokula mu vonse mwa Kristu, wamene ali mutu,

¹⁶ wamene opanga muŵili wonse kuŵa pamo, na vizo vonse kuŵa pamo vokatizyana. Motetyo, cizo ciliconse cuseŵenza mowamila nipo muŵili wonse ukula nolimanga mu cinthemwa.

Umoyo wa lomba mwa Kristu

¹⁷ Mu zina ya Asikulu, nukuwuzyani nipo nulaŵilisha kuti musayende soti ngani mwakucitila ŵa kunja pokonkha malingililo ŵawo aliye nchito

¹⁸ na malingililo ŵanu ali mu mfinzi. Aliye citwa mu umoyo wakuŵapa Mulungu, pakuti paliye cakuziŵa nipo ali na nthota.

¹⁹ Esoŵa nsoni zonse: elitwala ku vinthu viyipa nocita vinthu viliye mcinzi mosalisusha.

²⁰ Umu ni mwamenelini mwemwisambilila va Kristu,

²¹ ni cendi mwecimvwa va yeve, ngani ŵanthu omukonkha mwisambizyiwa vyendi vili mwa Yesu.

²² Tetyo, fumyamoni va kale va umunthu wanu vecenekeka na vokumbwila va wenye wake.

²³ Mitima yanu na malingililo ŵanu apangiwe ŵa lomba.

²⁴ Na kuti muwamila kuvwala umunthu wa lomba, wepangiwa mu linganizyo ya Mulungu mu cilungamo cendi na kutuŵa.

²⁵ Osatala soti wenye, yumo wa mwewo owamila kulaŵila vyendi ku muyake, cikomo tonse nise ŵamo mu muŵili wa Kristu.

²⁶ “Keno wakalipa, usaleke ukali wako kuti ukutwale ku cimo,” osaŵa na ukali mpaka zuŵa kuloŵa.

²⁷ Osamupa mpata Satana.

²⁸ Kuli ŵala enzoyiŵa, lekani kuyiŵa notatika kuseŵenza na mphamvu, kucita vinthu va nzelu na manja ŵanu, kuti mungayavyileko ayanu osoŵewa.

²⁹ Osaseŵenzesha malizu ayipa, koma malizu oyavya na Wokosesha mtima ngani mwakungapangwikile kuti ayanu amvwe nophindula nawo malizu wanu ŵamene awo.

³⁰ Osakwinyililisha Mzimu Mtuŵa wa Mulungu, ali cisimikizyo ca mwine pa mwewo pa nsiku ya cimangululo.

³¹ Fumyamponi luyipilwa, ukali, kulaŵilisha, kutafula, kupya mtima, na malingililo ayipa.

³² Mu malo mwake, muŵe na lusungu na mtima wolezya nolekelelako ayanu, ngani mwakukulekelelani Mulungu mwa Kristu.