Aefeso 3 - Chinsenga New Testament

Nchito ya Paulo ku ŵanthu asali Ayuda

¹ Cikomo ca ici, newo Paulo nukulombelani. Nine womangiwa mu jele cikomo cotumikila Kristu Yesu noseŵenza mu malo mwa mwewo musali Ayuda.

² Ni cendi mwecimvwa kuti Mulungu mu cawanzi cake wanipa iyi nchito kuyicita mu malo mwa mwewo.

³ Mulungu ewulula cisinsi cake nociziŵisha kwa newo. (Nalemba mwa pafupi pa ici,

⁴ keno mungaŵelenge mwa pafupi vanalemba, muwamila kuziŵa mwanumvwila va cisinsi ca Kristu.)

⁵ Mu nsita yapita, ŵanthu enzowuzyiwalini cisinsi ici, koma Mulungu waciulula lomba na Mzimu kwa nthumi na aneneli ŵake atuŵa.

⁶ Cisinsi ni cakuti kupitila mu Malizu Aweme ŵala asali Ayuda otolako citwa na Ayuda mu mashukisho ŵa Mulungu, ni ŵamo na ŵa mu muŵili umo noyaŵana mu malayizyo ŵecipanga Mulungu kupitila mwa Kristu Yesu.

⁷ Nenze mtumiki wa Malizu Aweme ŵamene mu cawanzi ca Mulungu ca pa citwa, cecinipa newo kupitila mukaseŵenzelo ka mphamvu zake.

⁸ Pakati pa ŵanthu wonse newo nine mtontho ngako, koma Mulungu enipa nchito iyi, yakuti niŵilizye kwa ŵanthu asali Ayuda va cuma cosaŵelengeka, cakutipa Mulungu mwa Kristu.

⁹ Enipa nchito yolaŵilila ŵanthu wonse vatiakaticitile Mulungu veciwamyilatu mwa cisinsi cake. Mulungu Nyamalenga wa vonse esunga cisinsi ici kale na kale, nsita ikaliyotatika.

¹⁰ Lomba, opangwa kuti kupitila mu mpingo, angelo na olamulila wonse ŵa mu calo ca Kululu aziŵe nzelu za Mulungu mu njila zosiyana.

¹¹ Mulungu ecita ivi kuti vicitike cendi vecikonzekelatu mwa Kristu Yesu Asikulu ŵasu kale na kale, nsita ikaliyotatika.

¹² Pakuti tumucetekela yeve, tingatweshe kutangʼa mtima kuvwendela kwa Mulungu mosakayika.

¹³ Numusengani lomba, kosati muwelele ku vuli cikomo cakuti numusawukilani, ngako–ngako muwamila kumekela cikomo cotamana kwangu.

Cinthemwa ca Kristu

¹⁴ Pa cikomo ici, nufukama pa menso pa Atata,

¹⁵ kufumila ku banja iliyonse ya Kululu na ya pansi kwatutola zina yendi.

¹⁶ Nusenga kwa Mulungu kufumila ku cuma ca ulemelelo wake akupeni kupitila mu Mzimu wake kuŵa na mphamvu mkati mwa sewo seka,

¹⁷ na kuti Kristu aŵe mu mitima yanu kupitila mu cicetekelo. Nusenga kuti muŵe na mizyu na maziko mu cinthemwa.

¹⁸ Motetyo, mwewo na atuŵa mtima muŵe na mphamvu zomvwisha kukwela, na kutalimpha, nakufupika, na kunoka kwake kwa cinthemwa ca Kristu mwacilili.

¹⁹ Eee, nusenga kuti muziŵe cinthemwa cake (cukanga kuti cingaziŵikelini ngako) nozuzyiwa na moyo wa Mulungu.

²⁰ Ulemelelo uŵe kwa Mulungu, wamene mwa mphamvu zake zocita nchito mwa sewo, angatweshe kucita vinyinji kupula vatingasenge keno kulingilila.

²¹ Mulungu apokele mcinzi mu mpingo na mwa Kristu Yesu pa maluko wonse mpaka nsita zosasila. Amen.