Aefeso 2 - Chinsenga New Testament

Enze akufwa opokela moyo

¹ Kale, monse mwenze akufwa cikomo ca macimo ŵanu.

² Pa nsita yala mwenzokonkha njila iyipa ya mu calo, mwenzomvwila olamulila viŵanda va mululu, vulamulila ŵanthu asamvwila Mulungu.

³ Tonse tenze ngani ŵeve na kuti tenzonkhala kulingana na unkhalo uyipa, kucita vonse venzopangwa unkhalo uyipa na malingililo ŵasu. Kulingana na uwunthu wasu, sewo tuwamila kulangiwa na ukali wa Mulungu.

⁴ Koma lusungu ya Mulungu ni ikulu ngako, nipo cinthemwa cake pali sewo ni cikulu ngako,

⁵ kuti petenze akufwa ku macimo ŵasu etileta ku moyo na Kristu. Ni cisomo cake Mulungu kuti mupulumushiwe.

⁶ Mwa Kristu Yesu etiwusha notinkhazika pamo na yeve mu calo ca Kululu.

⁷ Ecita teti kuti atiwoneshe kulemela kwa cisomo cake cosapimiwa mu cinthemwa pa sewo mwa Kristu ku nsita zikuza.

^8-9 Ni cisomo cake Mulungu kuti mupulumushiwe kupitila mu cicetekelo. Ni cikomolini ca mphamvu zanu koma ni cawanzi ca Mulungu, kuti munthu asazitukumule.

¹⁰ Mulungu etipanga sewo mwatilili, mwa Kristu Yesu etilenga sewo mu umoyo wa nchito iweme yecikonzekela kale kuti sewo ticite.

Kuŵa ŵamo mwa Kristu

¹¹ Kosaluŵa kuti mwewo musali Ayuda mwenze ŵa kunja, mwenzoyitiwa na Ayuda kuti, “nimwe wosasilimukiwa.” Enzomekela kusilimukiwa, cukanga kuti cenzokumya tyala miŵili yawo kosati mitima yawo.

¹² Pa nsita yala mwenze patali na Kristu, mwenze alwendo na kuti mwenzelini ŵanthu wosaluliwa ŵa Mulungu. Mwenzeve citwa mu maumvwano, enzoyikiwa pa malayizyo ŵa Mulungu ku ŵanthu ŵake, nipo mwenzonkhala mu calo cino ciliye cilolelo ciliye soti na Mulungu.

¹³ Koma lomba mwa Kristu Yesu, mwewo mwenze patali noletewa pafupi na mlopa wa Kristu.

¹⁴ Kristu mwine ni mtendele wasu. Epanga vitwa viŵili kuŵa pamo. Yeve efwaya na muŵili wake ciwumba cenzoŵapatule noleta ulwani pakati pa Ayuda na asali Ayuda.

¹⁵ Elesha Matetulo ŵa Mose na malango ayake na myambo iyake, cikomo copangwa kupanga mitundu iŵili ya ŵanthu kuti uŵe mtundu umo wa lomba nopanga mtendele pamo na yeve.

¹⁶ Pa imfwa yake ya pa mtanda, Kristu elesha ulwani wawo, nipo kupitila mu mtanda eyika pamo mitundu yonse iŵili kuti iyanjane na Mulungu.

¹⁷ Tetyo, Kristu ewela noŵilizya Malizu Aweme ŵa mtendele kwa wonse – kwa mwewo musali Ayuda mwenze kutali na Mulungu, na kwa Ayuda, enze pafupi na yeve.

¹⁸ Ni kupitila mwa Kristu kuti sewo tonse, Ayuda na asali Ayuda, tufwika kwa Atata mwa Mzimu wamene uyu.

¹⁹ Motetyo, mwewo musali Ayuda nimwelini alwendo koma nimwe nzika pamo na atuŵa mtima nipo nimwe ŵa mu banja ya Mulungu.

²⁰ Namwe, mwemangiwa pa maziko ŵa nthumi na aneneli, nipo Kristu Yesu mwine niye mwala wa pa ngondya.

²¹ Ni yeve okatilila ngʼanda yonse pamo noyipanga kuti iŵe ngʼanda ituŵa ya Asikulu.

²² Mwa Kristu namwe soti mumangiwa pamo na wonse kuŵa malo onkhalamo Mulungu mwa Mzimu.