Thaburi 8 - Kĩrĩkanĩro Gĩa Gĩkũyũ

Riiri wa Ngai na ũrĩa mũndũ atũũgĩrĩĩtio nĩ Ngai

¹ MWATHANI, o wee MWATHANI witũ, ĩ rĩĩtwa rĩaku ti rĩnene gũũkũ thĩ guothe! Riiri waku-rĩ, ũkinyĩĩte o igũrũ matuinĩ,

² na twana o na tũkenge nĩtũũkumagia na tũnua twatuo. Wee-rĩ, hatirĩ thũ o na ĩmwe yaku ĩngĩgũthengerera o na atĩa. Thũ ciaku o na arĩa magũũkagĩrĩra atĩ nĩguo merĩhĩrie harĩ we nĩũmakiragia ki.

³ Atĩrĩĩrĩ, rĩrĩa ngũtiira maitho maakwa ngabaara igũrũ rĩrĩa wee wombire, ngoona mweri na njata icio wĩkĩrĩĩte kuo;

⁴ ndĩyũragia atĩrĩ, “Kaĩ mũndũ akĩrĩ we kĩ nĩguo ũikarage ũkĩmwĩciiragia? Mũndũ ũrĩa arĩ o rũkũngũ akĩrĩ kĩ tondũ ũmũrũmbũyagia?”

⁵ Nĩ amu wee ũmũũmbĩĩte ũguo atĩ no haniini atigairie ahaane o ta we mwene; o na ũkamũhumba thũmbĩ ya riiri na ya gĩtĩĩo mũtwe wake.

⁶ Nĩũmũthuurĩĩte ũkamũhe wathani igũrũ rĩa indo ciothe iria wee ũũmbĩĩte; ũgakĩiga indo ciothe o nyaarĩrĩinĩ ciake:

⁷ ng'ondu ciothe o na ng'ombe, nyamũ ciothe cia gĩthaka,

⁸ nyoni cia rĩerainĩ, thamaki cia iriainĩ, o na kĩndũ o gĩothe kĩrĩa kĩgeragĩra kũu iriainĩ thĩinĩ.

⁹ MWATHANI, o wee MWATHANI witũ, ĩ rĩĩtwa rĩaku ti rĩnene gũũkũ thĩ guothe!