Thaburi 7 - Kĩrĩkanĩro Gĩa Gĩkũyũ

Ihooya rĩa kũhooya Waragania

¹ MWATHANI Ngai wakwa, njũkĩĩte harĩ we ũmenyerere; honokia kuuma harĩ arĩa oothe mahanyũkanĩĩtie na niĩ, ũkĩndeithũre.

² Waga gwĩka ũguo mekũndembũranga o ta mũrũũthi, macooke mangururie hatarĩ na wa kũndeithũra.

³ MWATHANI Ngai wakwa, angĩkorwo nĩnjĩkĩĩte ũmwe wa maũndũ maya: ngorwo nĩnjĩkĩĩte ũũru na mooko maakwa,

⁴ ngorwo nĩndĩhĩĩte mũraata wakwa wega na ũũru, kana ngataha thũ yakwa hatarĩ gĩtũmi;

⁵ reke thũ ĩyo ĩhanyũkanie na niĩ ĩnyiite. Reke o na ĩhũũre ĩnjũrage, ĩndige thĩ ndĩ mũkuũ!

⁶ MWATHANI arahũka na maraakara maaku, wĩyambararie ũũkĩrĩre mang'ũrĩ ma thũ ciakwa. Ngai wakwa, o wee ũbangĩĩte gũciirithania, arahũka.

⁷ Reke andũ moongane makũrigiicĩrie; nawe ũmathamakĩre ũrĩ kũu igũrũ matuinĩ.

⁸ MWATHANI, nĩ we ũtuagĩra andũ oothe ciira. Tua ciira wakwa, MWATHANI, kũringana na ũthingu wakwa, nĩ gũkorwo nĩũũĩ wega atĩ ndiĩhĩĩtie.

⁹ Ndũkaareke andũ arĩa meekaga ũũru makĩrĩrĩrie gwĩka ũũru; tiirĩrĩra arĩa athingu, wee Ngai ũrĩa mũthingu, o wee ũgeragia ngoro ciitũ o na meciiria maitũ.

¹⁰ Ngai nĩ we mũmenyereri nĩ we ũhonokagia arĩa atheru ngoro.

¹¹ Ngai-rĩ, nĩ mũciiri ũtuithanagia ciira na kĩhooto, na nĩatuagĩra mũthenya o mũthenya arĩa eeki ũũru.

¹² Mũndũ angĩaga gũtigana na mĩthiĩre yake mĩũru-rĩ, Ngai ekũnoora rũhiũ rwake rwa njora, ageete ũta wake ethime wathi,

¹³ o na ooe indo cia mbaara itangĩĩtiirio nĩ mũndũ o na ũrĩkũ, eerekerie mũndũ ũcio mĩguĩ yake ĩgwakana mwaki.

¹⁴ Ta baara wone ũrĩa mũndũ ũrĩa wĩkaga ũũru ararũmwo aciare waganu. Ihu rĩu e narĩo no rĩa kĩũnũhu na kĩrĩa egũciara no maheeni matheri.

¹⁵ Nĩkwenja eenjeete irima o na akarĩrikia, no rĩĩrĩ, irima rĩu eenjeete nĩ we mwene ũgwĩte kuo.

¹⁶ Egũcookererwo no kĩũnũhu kĩu gĩake, naguo ũmaramari ũcio wake ũmũgũĩre o mũtwe wake mwene.

¹⁷ Nĩngũcookeria MWATHANI ngaatho nĩ ũndũ wa ũthingu wake, na ngooce rĩĩtwa rĩa MWATHANI Ũrĩa Ũrĩ Igũrũ Mũno na rwĩmbo.