Thaburi 4 - Kĩrĩkanĩro Gĩa Gĩkũyũ

Ihooya rĩa hwaĩinĩ rĩa kũũria ũteithio

¹ Njĩtĩkaga ndagũkaĩra, wee Ngai, mũngitĩri! Wee nĩwe wandeithũrire rĩrĩa ndarĩ mũhinyĩrĩrie. Nginyĩria wega waku, narĩo ihooya rĩakwa ũkĩrĩigue.

² Inyuĩ andũ aya, nĩ nginya rĩ mũgũtũũra mũũnyararĩĩte? Nĩ nginya rĩ mũgũtũũra mwendeete maũndũ ma tũhũ na mũrũmbũyanagia na maheeni?

³ Menyaai atĩ MWATHANI nĩeyamũrĩire ndungata yake ĩrĩa ĩmwĩhokeete, na rĩrĩa ndamũkaĩra nĩanjiguaga.

⁴ Inainaai mwĩ na guoya, na mũtige kwĩhia; rĩrĩa mũhuurũkĩĩte itandainĩ cianyu-rĩ, o mũndũ nĩaikarage agĩĩcookagĩra.

⁵ Rutĩraai MWATHANI magongoona marĩa maagĩrĩire, na mũikarage mũmwĩhokeete.

⁶ Kũrĩ aingĩ maroiga atĩrĩ, “Naarĩ korwo tuona maũndũ meega! MWATHANI, tũtiirĩre gĩthiithi gĩaku ũtũkinyĩrie wega waku!”

⁷ No wee gĩkeno kĩrĩa ũnjĩkĩrĩĩte ngoroinĩ, nĩgĩkĩrĩĩte kĩrĩa gĩothe mangĩgĩa nakĩo rĩrĩa me na bũũthi wa ngano na ndibei.

⁸ Rĩu-rĩ, ngũthiĩ toro ndĩĩkomere ndĩ o na thaayũ, nĩ ũndũ wee, MWATHANI, nĩ we ũikaraga ũmenyereire wega.