Thaburi 13 - Kĩrĩkanĩro Gĩa Gĩkũyũ

Ihooya rĩa kũũria ũteithio

¹ MWATHANI, nĩ nginya rĩ ũgũtũũra ũriganĩirwo nĩ niĩ? Ũgũtũũra nginya tene ũriganĩirwo nĩ niĩ? Nĩ nginya rĩ ũgũtũũra ũhithĩĩte ũthiũ waku?

² Nĩ nginya rĩ ngũtũũra njiguaga ruwo rohoinĩ wakwa, na ngaikaraga ndĩ na kĩeha ngoroinĩ yakwa ũtukũ na mũthenya? Thũ ciakwa-rĩ, igũtũũra ihootaga nginya rĩ?

³ Ndora, na ũnjookerie, MWATHANI Ngai wakwa Cookeria maitho maakwa hinya ndikaae gũkoma toro wa gĩkuũ,

⁴ thũ ciakwa itikoige atĩrĩĩrĩ, “Nĩtwamũtooria;” igĩkenerere kũng'aũkana gwakwa.

⁵ Niĩ-rĩ, ũtugi waku nĩguo ndĩhokeete; ngoro yakwa nĩrĩcanjamũka rĩrĩa wee ũrĩhonokia.

⁶ Nĩngũinĩra MWATHANI, nĩ ũndũ nĩanjĩkĩĩte wega mũno.