Rwĩmbo 1 - Kĩrĩkanĩro Gĩa Gĩkũyũ

¹ Rũũrũ nĩruo rwĩmbo rwega gũkĩra nyĩmbo ciothe rũrĩa Solomoni ainire.

Irebeta rĩa mbere Mũndũ wa nja

² Taamumunya na kanua gaaku; wendo waku-rĩ, nĩ mwega gũkĩra ndibei.

³ Maguta macio wĩhakĩĩte me na mũtararĩko mwega; rĩĩtwa rĩaku no ta maguta macio. Hatirĩ mũirĩĩtu o na ũmwe ũtakwendeete.

⁴ Njoya ũũre na niĩ; gĩtuĩke mũthamaki wakwa na ũndoonyie o nyũmba thĩinĩ. Kũu nĩkuo tũgũthiĩ gwĩkeneria, tũkĩrikĩrie wendo hatarĩ na itherũ. Hatirĩ na nganja andũ a nja oothe nĩmakwendeete!

⁵ Atĩrĩĩrĩ, andũ aya a nja a Jerusalemu! ndĩ mũirũ, no ndĩ o mũthaka, njirĩĩte o ta hema cia Kedari no ngathakara o ta mbathiya ĩrĩ mũciĩ gwa Solomoni.

⁶ Mũtikaamenere ũirũ wakwa, atĩ nĩ ũndũ nĩnjinĩĩtwo nĩ riũa. Nĩ aariũ a maitũ mandaakarĩire, magĩkĩndutithia wĩra mũgũndainĩ wa mĩthabibũ, ngĩkĩaga mahinda ma gwĩthakaria.

⁷ Tanjĩĩra atĩrĩ wee mwendwa wakwa, ũrĩrĩithia ũhiũ waku kũ? Ningĩ-rĩ, ũrĩarahia rũũru rwaku ha? Nĩ kĩĩ gĩgũtũma njikare njagaagĩĩte ngĩgũcaria gatagatĩinĩ ka ndũũru cia arĩithi angĩ?

Mũndũ mũrũme

⁸ Kaĩ ũtooĩ handũ hau nĩ ha, o wee ũthakarĩĩte kũrĩ andũ a nja oothe? Kiumagare ũrũmĩrĩre rũũru; ũkarĩiithie mbũri ciaku hakuhĩ na hema cia arĩithi.

⁹ Atĩrĩĩrĩ we mwendwa wakwa, ũtũmaga arũme mahĩahĩe o ta ũrĩa mbarathi ya mũgoma ĩtũmaga mbarathi cia njamba cia kũguucia ngaari cia mũthamaki wa Misiri ihĩahĩe.

¹⁰ Njuĩrĩ ciaku nĩ thaka mũno igwĩrĩire makai maaku na ikaagĩria ngingo yaku ta mĩgathĩ.

¹¹ No ithuĩ na ithuĩ nĩtũgũgũthondekera mĩgathĩ ya thahabu ĩgemeetio na tũbungo twa betha.

Mũndũ wa nja

¹² Mũthamaki wakwa nĩgũkoma arakomeete gĩtandainĩ gĩake. Namo maraaci maakwa maragĩkĩĩyũria kũu arakomeete mũtararĩko mwega.

¹³ Mwendwa wakwa e na mũtararĩko ta wa manemane, akomeire nyondo ciakwa.

¹⁴ Mwendwa wakwa atariĩ o ta mahũa ma gĩthaka macanũkĩĩte mĩgũndainĩ ya mĩthabibũ kũu Enigedi.

Mũndũ mũrũme

¹⁵ Mwendwa wakwa, ĩ ndũkĩrĩ mũthaka! Maitho maaku maiyũire wendo!

Mũndũ wa nja

¹⁶ Ĩ ndũkĩrĩ mũthaka mũraata wakwa; nĩũngenagia mũno! Nyeki nduru nĩ yo ĩgũtuĩka ũrĩrĩ witũ,

¹⁷ mĩtarakwa ĩtuĩke mĩratho ya nyũmba iitũ, nayo mĩkarakaba ĩtuĩke mĩitĩrĩro.