Mariko 16 - Kĩrĩkanĩro Gĩa Gĩkũyũ

Jesũ kũriũka

¹ Nayo Thabatũ yathira, Mariamu Mũmagidali, Mariamu nyina wa Jakubu, na Salome makĩgũra indo nungi wega nĩ geetha makahake mwĩrĩ wa Jesũ.

² Mũthenya wa kiumia rũũciinĩ tene, riũa rĩaratha, magĩthiĩ mbĩĩrĩrainĩ.

³ Nao marĩ njĩrainĩ makooranagia atĩrĩ, “Nũũ ũgũthiĩ gũtũgaragarĩria ihiga arĩthengie mbĩĩrĩrainĩ?”

⁴ No rĩĩrĩ, maacũũthĩrĩria makĩona ihiga rĩrĩ igaragarie rĩgathengio. (Rĩarĩ ihiga inene mũno).

⁵ Nao magĩthiĩ makĩingĩra mbĩĩrĩra, makĩona mwanake wekĩrĩĩte nguo njerũ aikarĩĩte thĩ mwena wa ũrĩo, nao magĩĩtigĩra mũno.

⁶ Naake akĩmeera atĩrĩ, “Tigaai gwĩtigĩra, nĩnjũũĩ mũracaria Jesũ wa Nazarethi, ũrĩa ũrambirwo mũtĩ igũrũ. Ĩndĩ ndarĩ haaha nĩariũkĩĩte! Oneei harĩa maramũigĩĩte.

⁷ Rĩu gĩthiĩi mũkeere arutwo aake, o hamwe na Petero atĩ, ‘Nĩegũthiĩ Galili mbere yanyu; kũu nĩkuo mũrĩmuona o ta ũrĩa aamwĩrire.’ ”

⁸ Nao makiuma mbĩĩrĩrainĩ mateng'ereete nĩ ũndũ wa gwĩtigĩra na kũnyiitwo nĩ kĩeha. Matirĩ ũndũ meerire mũndũ nĩ ũndũ wa kũmaka. [

MŨRĨKĨRIE WA TENE WA IBUKU RĨA MARIKO Jesũ kuumĩrĩra Mariamu Mũmagidali

⁹ Na rĩĩrĩ, rũũciinĩ tene, mũthenya wa Kiumia Jesũ aariũka, aambire kuumĩrĩra Mariamu Mũmagidali, ũrĩa aarutĩĩte ngoma mũgwanja. Nao atumia acio magĩthiĩ kwĩ Petero na araata aake, makĩmahe ũhoro ũrĩa meerĩĩtwo na njĩra nguhĩ.

¹⁰ Naake Mariamu ũcio agĩthiĩ kũrĩ arutwo a Jesũ agĩkora makĩrĩra me na kĩeha. Thuutha ũcio Jesũ we mwene agĩtũma arutwo mwena wa irathĩro o na wa ithũĩro makaheane Ũhoro ũrĩa Mũtheru wa ũhonokio wa tene na tene.]

¹¹ Akĩmeera atĩ Jesũ nĩariũkĩĩte, na atĩ we nĩamuoneete, no o makĩrega kũmwĩtĩkia.

Jesũ kuumĩrĩra arutwo aake eerĩ

¹² Thuutha ũcio Jesũ akiumĩrĩra arutwo aake eerĩ hĩndĩ ĩrĩa maathiaga mĩgũndainĩ, no ndahaanaga ũrĩa aahaanaga rĩa mbere.

¹³ Nao makĩhũndũka makĩĩra arĩa angĩ atĩ nĩmoona Jesũ, no o makĩrega kũmeetĩkia.

Jesũ kuumĩrĩra arĩa ikũmi na ũmwe

¹⁴ Thuuthainĩ Jesũ akiumĩrĩra arutwo arĩa ikũmi na ũmwe, maikarĩĩte meethainĩ makĩrĩa. Naake akĩmakũũma nĩ ũndũ wa kũũmia ngoro na kwaga gwĩtĩkia arĩa maamuoneete ariũkĩĩte.

¹⁵ Naake akĩmeera atĩrĩ, “Thiĩi thĩ yothe mũkahunjĩrie andũ Ũhoro Ũrĩa Mwega.

¹⁶ Na mũndũ o wothe ũgeetĩkia na abatithio nĩakaahonokio, no ũrĩa ũtageetĩkia nĩagaatuĩrwo.

¹⁷ Nao arĩa mageetĩkia nĩmakaaheeo hinya wa kũringa ciama: nĩmakaingata ngoma kuuma kũrĩ andũ thĩinĩ wa rĩĩtwa rĩakwa; nĩmakaaria na thiomi ng'eni;

¹⁸ mangĩkaanyiita nyamũ cia thĩ kana manyue thumu matirĩ ũũru makoona, ningĩ nĩmakaigagĩrĩra arũaru mooko nao makahona.”

Jesũ kwambatio igũrũ

¹⁹ Na rĩĩrĩ, Mwathani Jesũ arĩĩkia kũmahe ũhoro, agĩtwarwo igũrũ, agĩikara guokoinĩ kwa ũrĩo kwa Ngai.

²⁰ Nao arutwo magĩthiĩ makĩhunjia Ũhoro kũndũ guothe, naake Mwathani nĩakoragwo hamwe nao, ageekagĩra ũhoro wao hinya na ciama iria maaringaga. Ameni.] [