Hosea 14 - Kĩrĩkanĩro Gĩa Gĩkũyũ

Hosea gũthaitha Isiraeli

¹ Inyuĩ andũ a Isiraeli, cookereraai MWATHANI Ngai wanyu. Meehia maanyu nĩ mo mamũhĩngĩĩte mũkagũa.

² Cookereraai MWATHANI na mũreke ihooya rĩĩrĩ rĩtuĩke igongoona rĩanyu kũrĩ we: “Tũrekere meehia maitũ moothe na wĩtĩkĩre ihooya riitũ, na nĩtũrĩkũgoocaga o ta ũrĩa twĩranĩire.”

³ Bũrũri wa Asiria ndũngĩtũhonokia, o nacio mbarathi cia mbaara itingĩtũgitĩra. Tũtigũcooka gwĩta ngai cia mĩhianano Ngai witũ. MWATHANI, iguĩra tha andũ arĩa matarĩ na wa kũmateithia.

MWATHANI kwĩrĩra Isiraeli muoyo mwerũ

⁴ MWATHANI ekuuga atĩrĩ, “Nĩngũcookia andũ aakwa harĩ niĩ, ngũmeenda na ngoro yakwa yothe; ndigũcooka kũmaraakarĩra.

⁵ Harĩ andũ a Isiraeli, ndĩrĩhaanaga ta mbura ĩkuura rũng'ũrĩinĩ, nao marĩthakaraga o ta mahũa; marĩkoragwo marũmĩĩte wega o ta mĩtarakwa ya mũtitũ wa Lebanoni.

⁶ Mekũgĩa na muoyo mwerũ, na makorwo marĩ athaka o ta mĩtamaiyũ. Mũtararĩko wao ũgũtuĩka o ta wa mĩtarakwa ya Lebanoni.

⁷ Nĩndĩrĩmagitagĩra o rĩngĩ, marĩciaraga o ta ngano, na marutage kĩro o ta mĩthabibũ. Marĩkoragwo na igweta o ta ndibei ya Lebanoni.

⁸ Andũ a Isiraeli matigaacooka kũrũmbũyania na ngai cia mĩhianano rĩngĩ. Nĩndĩrĩmacookagĩria mahooya maao na nĩndĩmamenyagĩrĩre. Ndĩrĩmahumbagĩra o ta mũtĩ ũrĩ na mathangũ maruru wega; nĩ niĩ ndĩrĩmaraathimaga.”

Kũrĩĩkĩrĩria

⁹ Andũ arĩa oogĩ nĩmamenye maũndũ macio, na mamecũũranagie ngoroinĩ ciao. Njĩra cia MWATHANI nĩ nũngĩrĩru, nao andũ arĩa athingu matũũraga macirũmagĩrĩra. Ĩndĩ arĩa eehia nĩkũhĩngwo mahĩngagwo, makagũa maaga gũcirũmĩrĩra.