Leemiso 31 - Geeshsha Maxaafa

Kawa Limu7eela Leemisota

¹ Haysafe kaallidi xaafetida leemisoy, kawa Limu7eela aayiya kawa Limu7eela tamaarsidaysa.

² Ta na7aw, ta ulope wodhidayso, taani qangetada yelidayso,

³ maccasan ne wolqaa wursofa; kawota dhaysiya maccasatan ne minotethaa dhaysofa.

⁴ “Limu7eela, woyne ushshi kawotas bessenna; mathoyiya ushshi shuumatas bessenna.

⁵ Enti uyaa wode higge baloosona; naaqetida asaa maata qelli goosona.

⁶ Mathoyaa ushshu hayqana haniya uraasinne sa7i iitida uraas immite.

⁷ Enti banta manqotethaanne banta waayiya doganaw uyo.

⁸ Banta gisho odetanaw danda7onna asaa gisho ne odeeta; maaddiya asi baynayisata gisho ne eqa.

⁹ Enta miyen eqada entaw suure pirda; manqotanne metootanchota maata naaga” yaagada tamaarsasu.

Wozanaama Macho

¹⁰ “Wozanaama macho ooni demmanaw danda7ii? I gatey zo7o al7o shuchafe aadhees.

¹¹ I azinay iyo ammanetees; iyaw koshshiyabaape aybika pacenna.

¹² Iya ba de7o laytha ubban, iyaw lo77obaape attishin, iitaba oothuku.

¹³ Suufenne liino koyada, ufaytashe ba kushen oothawusu.

¹⁴ Iya zal7anchota markabe mela; ba kathaa haaho biittafe shiishawusu.

¹⁵ Iya ba soo asaas kathi giigisanawunne ba macca aylletas ooso immanaw, sa7i wontonna de7ishin dendawusu.

¹⁶ Lo77o gade koyada shammawusu; ba kushen oothada demmida miishen woyne tokawusu.

¹⁷ Iya ba xeessa minthada dancawusu; ba qesiya oosos minthawusu.

¹⁸ Iya wodhe demmanaw minnada zal7awusu; iya oothashe qamisiya gisho I xompey to7enna.

¹⁹ Iya ba hindziritiya oykawusu; ba biradhen loythada suqawusu.

²⁰ Iya manqotasinne metootanchotas immawusu.

²¹ I soo asa ubbay ho77iya ma7o ma7iya gisho, shachi bukikoka iya hirguku.

²² Alga bolla hiixiya ma7o sikawusu; liinope oosetida ocha teera daaniya ma7o ma7awusu.

²³ Biitta cimati shiiqiya dubbushan I azinay bonchetida asi.

²⁴ Liinope ma7onne danco oothada, zal7anchotas bayzawusu.

²⁵ Iya minonne boncho asi; yaana laytha ubban ufaytada de7awusu.

²⁶ Cincatethan ba doona dooyawusu; ammanthiya zorey I inxarsan de7ees.

²⁷ Iya ba soo asaa de7uwa injeyanaw ubba wode oothawusu; azallatethi I bolla bentidi erenna.

²⁸ I nayti dendidi, iyo nashshoosona; I azinay iyo yaagidi galatees;

²⁹ Lo77oba oothiya daro maccasati de7oosona; shin ne enta ubbaafe aadhasa” yaagees.

³⁰ Mali cimmees; yegelssatethi dhayana. Shin Godaa yayiya maccasiya, iya anjetidaaro.

³¹ Iya oothidaba ubbaas iyo woytite; I ooso ubbay dabaaban iyo galatiso.