Hose 14 - Geeshsha Maxaafa

Godaako Simoy Ehiya Anjo

¹ Isra7eele asaw, hinte nagaraa gaason dhubetidi kundida gisho ha77i Godaa, hinte Xoossaako simmite.

² Godaako simmidi, haysada yaagidi woossite; “Nu nagara ubbaafe nuna maara; nuuni nu mettersha ayfe gidida galataa new shiishana mela ne nuna ne keehatethan shiisha eka.

³ Asoorey nuna ashshena; nu ola paratanka ammanetoko. Nuuni nu kushen medhida eeqa misileta ubbaa, ‘Nu xoossata’ gooko. Aaway baynaysatas qadhetey nena” yaagite.

⁴ Goday, “Ta hanqoy entafe simmida gisho, taani enta makalla hanuwape enta pathada, enta wozanape siiqana.

⁵ Taani Isra7eele asaas aka gidana; enti ciishshada ciyidi, Libaanose zigaa mela xapho yeddana.

⁶ Enta dolay cil7ana; enti shamahoda lo77ana. Enta sawoy Libaanose zigada tonku gaana.

⁷ Asay simmidi ta kuya garsan shempana; enti dolada cil7ana; enti woyneda ciiyana; Libaanose woyne ushshada eretiyaba gidana.

⁸ Efreema asaw, hizape guye eeqa misilera taw ay gahetethi de7ii? Hinte woosa si7eynne hintena naagey tana. Taani cil7o zigaa mela; hinte ayfe ayfana mela oothey tana” yaagees.

⁹ Cincatethi de7iya oonika haysa akeeko; wozani de7iya oonika hessa ero. Godaa ogey suure; xilloti he ogiyara hemetoosona; shin nagaranchoti iyan dhubetoosona.