Roome 14 - ጌሻ ማፃፋአሳ ቦላ ፕርዶፍተ 1 አማኖን ዳቡርዳ ኦናካ ሺሽ ኤክተፐ አትሽን፥ እያ ቆፋ ቦላ ፕርዶፍተ። 2 ሌምሶስ፥ አማኖን ምንዳ እስ አስ አይ ካካ ማናዉ ዳንዳኤስ። ሽን አማኖን ዳቡርያ አስ አታክልተ ፃላላ ሜስ። 3 ኡባባ ምያ አስ ሞና ኡራ ካፖ። ኡባባ ሞና አስ ምያ ኡራ ቦላ ፕርዶፎ። ፆሳይ ኡባ ምያ ኡራ ሺሽ ኤክስ። 4 ሀራ አሳ አይለ ቦላ ፕርደይ ኔኒ ኦኔ? እ ዳቡርን ዎይኮ ምንን ባ ጎዳሳ። ጎዳይ እያ ኤሳናዉ ዳንዳእያ ግሾ እ ምንድ ኤቃና። 5 ቃስ “እስ ጋላሳይ ሀራ ጋላሳፐ አስ” ያግድ ቆፕያ አስ ደኤስ። ሀራይ ቃስ፥ “ጋላሳት ኡባይ እስ መላ” ግድ ቆፔስ። ሽን እሶይ እሶይ ባ ቆፋ አኬክድ ቃቾ። 6 እስ ጋላሳ ሀራ ጋላሳታፐ አድ ቦንችያ ኦንካ ጎዳ ቦንቾስ ግድ ኦስ። ኡባ ካ ምያ አስ ጎዳ ቦንቾስ ግድ ሜስ። እ ምያ ሄ ካ ግሾ፥ ፆሳ ጋላቴስ። ኡባ ካ ሞና አስ ጎዳ ቦንቾስ ሞና አጌስ፤ ቃስ ሞና አጎን ፆሰ ጋላቴስ። 7 ኑፐ ኦንካ ባዉ ዴና፤ ቃስ ኑ ግዶፈ ኦንካ ባዉ ሀይቀና። 8 ኑ ደኦን ደእኮ ጎዳስ ደኦስ፤ ቃስ ሀይቅኮካ ጎዳስ ሀይቆስ። ህዛ፥ ኑ ደኦን ደእን ዎይኮ ሀይቅን ጎዳሳ። 9 ክርስቶስ ሀይቅድ ሀይቆፐ ደንድዳይ፥ ደኦን ደኤይሳታስነ ሀይቅዳይሳታስ ጎዳ ግዳናሳ። 10 ያትን፥ ኔኒ ነ እሻ ቦላ አይስ ፕርዳይ? ዎይኮ ኔኒ ነ እሻ አይስ ካይ? ኑኒ ኡባይ ፆሳ ፕርዳ አራታ ስንን ኤቃና። 11 ጌሻ ማፃፋን ጎዳይ፥ “ታኒ ደኦን ደአይስ፤ አሳ ኡባይ ታ ስንን ጉልባታና፤ ታኒ ፆሳ ግደይሳ ማርካታና” ያጌስ። 12 ህዛ፥ ኑ ኦዳባስ ኑ ሁጰን ሁጰን ፆሳ ስንን ሺቅድ ዛሮ እማና። ሀራ አስ በፋ 13 ሄሳ ግሾ፥ ኑኒ እሶይ እሱዋ ቦላ ፕርደይሳ አጎስ። ሽን ህንተ እሻ ብስድ ዎይኮ ቃፅድ ናጋራን ገልስያባ ኦናዳ ናገትተ። 14 ጎዳ የሱሳ አማንያ አሳዳ፥ ባ ሁጰን ቱና ግድዳ ካ ባይናይሳ ታኒ ጌሻዳ ኤራይስ። ሽን እስ አስ እስባ ቱና ግድ ቆፕኮ ሄስ እያዉ ቱና ግዴስ። 15 ነ ምያ ካ ግሾ ነ እሻ ብያባ ግድኮ፥ ክርስቶሳን ደእያ ነ እሻ ሲቃካ። ክርስቶስ እያ ግሾ ሀይቅዳ ኡራ ነ ምያ ካን እያ አያና ደኡዋ ይሶፋ። 16 ህዛ፥ ህንተዉ ደእያ ላአተ ሀራት ቦራና መላ ኦፍተ። 17 ፆሳ ካዎተይ ጌሻ አያናይ እምያ ፅሎተ፥ ሳሮተነ ቱማ ኡፋይስፈ አትሽን፥ ሙሳባነ ኡሻባ ግደና። 18 ሄሳዳ ክርስቶሳስ ኦያ አስ ፆሳ ኡፋይሴስ፤ አሳንካ አንጀቴስ። 19 ሄሳ ግሾ፥ አነ ኑኒ ሳሮተ በንትያ ኦግያነ እሱዋ እሱዋ አማኖን ምንያ ኦግያ ኮዮስ። 20 ካ ግሾ ጋዳ ፆሳ ኦሱዋ ይሶፋ። ኡባ ካ ሜተቴስ፥ ሽን ሀራ አስ ናጋራን ብስያ ካ ሙስ ኢታ። 21 ነ እሻይ በቶና መላ አሾ ሞና ዎይኮ ኡሹ ኡዮና ዎይኮ ነ እሻ ብያ ሀራባ ኦና አጎይ ሎኦ። 22 ህዛ፥ ሀ ነ አማኑዋ ነ ግዶንነ ነ ፆሳ ግዶን ናጋ። ልከ ግድ ቆፕዳባ ኦያ ዎደ እያ ካሀይ ሞቶና ኡራይ አንጀትዳይሳ። 23 ሽን ስሸ ምያ ኡራስ እያ ሙሳይ አማኖን ግዶና ግሾ ፕርደቴስ። አማኖይ ባይና ኦሰትዳ ኦሶ ኡባይ ናጋራ። |
The Word for the World International and The Word for the World Ethiopia