Zakarìa 1 - GƐ̃GBE BIBLIA 2014

Àkpa cucugbãa Tɔhonɔ̀ wɔ̀ yɔyɔ na Izràɛlviwo be woa ɖɔ̀lì èdɛ̃

¹ Lè Dàrius, Persìa be èfìɔ be èfìɔɖùɖu èpè èvègɔ̃a mè lè wètri ènyigɔ̃a mèa, Tɔhonɔ̀ pò nupo na Berekìa be èvi, gblɔ̃ɖɛtɔ Zakarìa kè nyi Idò be tɔgbeyɔvia.

² E gblɔ̃ na ɛ̀ be ne to na Izràɛlviwo be: “Mù do àdɔ̀mèze ɖo mìa tɔgbewo ŋuti ŋutɔ.”

³ Gblɔ̃ na wo be: “Tɔhonɔ̀ ŋusɛ̃kpatatɔa gblɔ̃ be: “Mì trɔ va gbɔ nyè ne ma trɔ xɔ̀ mì.

⁴ Mì mu gbà wɔ̀ sìgbè mìa tɔgbewo nène ò. Sãa, gblɔ̃ɖɛtɔ nyèwo do ègbè kèa àsi na wo be: “Mì ɖè àsi lè mìabe wɔ̀na kudo àgbè kpòtoewo ŋuti.” Vɔ̀ wo mu ɖo èto mù kaka la nya ènyà kè mù gblɔ̃a ò.

⁵ Egbèa, mìa tɔgbewo mu gbà lè ò, eye gblɔ̃ɖɛtɔawo cã ku keŋu-keŋu.

⁶ Co ènyà nyè kudo ègbè do àsi kèwo mù sɔ do àsi na gblɔ̃ɖɛtɔ nyèawo sù mìa tɔgbewo si. Nène a, wo ɖɔ̀lì èdɛ̃ eye wo gblɔ̃ be: “Tɔhonɔ̀, ŋusɛ̃kpatatɔa ɖo è be yèa wɔ̀ kudo mi sɔ zɔ̃ ɖo miabe wɔ̀na ku àgbènɔ̀nɔ ji. Eye e wɔ̀ ɛ̀ pɛpɛpɛ.”

Àvìmènu cucugbãa: Èsɔwo

⁷ Lè èfìɔ Dàrius be èfìɔɖùɖu èpè èvègɔ̃a mè lè wètri woeɖèka àlo lè Kebàlbe wètria mèa, Tɔhonɔ̀ be ègbè ɖì na Berekìa be èvi gblɔ̃ɖɛtɔ Zakarìa kè nyi Idò be tɔgbeyɔvia. Zakarìa gblɔ̃ be:

⁸ Èzã ŋua mèa, mù kpɔ ŋusù ɖe lè èsɔ jɛ̃ ɖe ji. E lètè lè àti do àmàwo be dòdòmè lè bàlì cicri ɖe mè. Èsɔ kèwo be èfuwo lè jɛ̃, kɔfè kudo ɣewo lè ŋùgbedòmè na ɛ̀.

⁹ Mù biɔ èsɔdotɔa be: “Àpetɔ, gɔ̃mèsèse kɛ ye lè èsɔ kèawo si ò?” Àtikplɔtɔ kè ɖo la ɖo ènyà ŋuti na mù a, gblɔ̃ be: “Mù la ɖè e gɔ̃mè na wò.”

¹⁰ Eye e gblɔ̃ na mù so àti do àmàwo dòmè, fikè be lèa be: “Tɔhonɔ̀ dɔ̃ wo be woa ɖìsà to ànyigbã a ji.”

¹¹ Nène a ye àmè kèwo le do èsɔawo gblɔ̃ na Tɔhonɔ̀ be àtikplɔtɔa be: “Mi sã to ànyigbã kpata ji. Ènu sia ènu lè e tèpe kpoo.”

¹² Eye Tɔhonɔ̀ be àtikplɔtɔa gblɔ̃ be: “Àhùadù Tɔhonɔ̀, èpè èkà takpo ci èwo (70) sɔ̃ŋu ye nyi ekèa ye wò le do àdɔ̀mèze ɖo Yèruzàlɛm kudo Yudà be èdù kpɔ̀tɛawo ŋuti. Kaka va ɖo gà kɛ mè ye gbɔ̀xue wò la va ku ŋuzĩzĩ na wo ò?”

¹³ Nène a, Tɔhonɔ̀ ɖo e ŋuti kudo àdɔ̀mè nyuɛ̃ na àtikplɔtɔ kè le pò nupo kudo èa. E gblɔ̃ ŋusɛ̃dodo be ènyàwo na ɛ̀.

Tɔhonɔ̀ la ku ŋuzĩzĩ na Yèruzàlɛm

¹⁴ Àtikplɔtɔ kè le pò nupo na mù a, biɔ mù be ma ɖè Tɔhonɔ̀ ŋusɛ̃kpatatɔa be ènyà gblɔ̃ be: “Mù lɔ̃ Yèruzàlɛm kudo Ziɔ̀n be ètoa, mà nya gblɔ̃.

¹⁵ Vɔ̀ mù le do àdɔ̀mèze ɖo dùkɔ̃ kèwo kã ɖo woa ɖokoe jia ŋuti ŋutɔ. Nyàwo, wàlɛbɛ kè nyè mu kpɔ bijì ŋutɔ ɖo Izràɛl ŋuti òa, dùkɔ̃ kèawo gbà trã yebe jɔ̀gbè vuɛ̃ a ɖoji.

¹⁶ Ekèa ŋuti ye mù gblɔ̃ be mù la gbìgbɔ̀ wɔ̀ àdɔ̀mè nyuɛ̃ na Yeruzàlɛm. Eye wo la trɔ tù àpe mawuxɔa kudo èdùa.”

¹⁷ E yomè a, àtikplɔtɔa gbà gblɔ̃ na mù be ma ɖè Tɔhonɔ̀ ŋusɛ̃kpatatɔ be ènyà kèa gblɔ̃: “Èdù nyèwo la trɔ ɖɔ kudo ènu nyuɛ̃wo. Mù la trɔ cã Yèruzàlɛm eye mù la trɔ do è ŋusɛ̃.”