Yudà 1 - GƐ̃GBE BIBLIA 2014

Ègbè dodo

¹ Xoma kèa so ènyè Yudà, Yesù Kristò be sumɔ̃vi, kè gbà le nyi Yakobò be nɔ̀via gbɔ. Mù le ŋlɔ̀ ɛ̀ ɖoɖa àmè kèwo Mawu yɔ, eye wo le nɔ̀ àgbè lè Mawu Àta be lɔ̃lɔ̃ mè, àmè kèwo ji Yesù Kristò le kpɔa.

² Mawu ne na mì ŋuzĩzĩkuku, fàfa kudo nɔ̀vi lɔ̃lɔ̃ lè gbɔsùsu mè.

Àjè-ènufiɔtɔwo

³ Èxlɔ̃ nyè ɖèvewo, mù ɖo è veve ɖe be ma ŋlɔ̀ xoma ɖoɖa mì, so àmè hlùɛ̃gã kè nyi mia kpata tɔ̀a ŋuti. Mù va jro ŋutɔ be ma ŋlɔ̀ xoma ɖoɖa mì, sɔ do mì ŋusɛ̃, ne mìa wɔ̀ àvũ na xɔ̀sè kè Mawu na mì zè ɖèkaa, na hùenuwo keŋu, na àmè kèwo nyi ye tɔ̀awoa.

⁴ Đo àmè vuɛ̃ ɖewo va ɖo mìa dòmè, wo trɔna Mawu be àdɔ̀mènyuɛ̃a wɔ̀ àgbè vlo kè mè wo lèa, eye wo gbena miabe Àpetɔ ɖèka tigɔ̃, kè nyi Tɔhonɔ̀ Yesù Kristò. Wo ŋlɔ̀ àmè kèawo be hùɛgbledo ɖɛ xoxo.

⁵ Ènu kè mù le ji la gblɔ̃a, mì nya ɛ̀ xoxo, gãke mù le ɖoŋù na mì be, ekè Tɔhonɔ̀ Mawu hlùɛ̃ Izràɛlviwo so Ejiptè-nyigbã ji vɔ̀a, e crɔ̃ àmè kèwo kpata mu xɔ̀ e ji sè ò a.

⁶ Mì ɖoŋù Àtikplɔtɔ kèwo to àcɛ̀ kè Mawu na woa ŋutia, wo tàsi woa tèpea ɖɛ, ye ŋuti Mawu do wo gà ɖo vìvìti cicri mà-vɔ gbèɖe mè, na kòjoɖoɖo be àzã gã ŋua gbè.

⁷ Mì gbà ɖoŋù Sodɔ̀m ku Gòmɔrà kudo èdù kèwo trɔ do woa: èdù ŋuawo mè tɔwo wɔ̀ gbòlò sìgbè Àtikplɔtɔ ŋuawo ke nène, eye wo wɔ̀ àfɛ̃nu hamèhamèwo. Ènu kèa ŋuti ye Mawu sɔ èzò màvɔ le dɔ̃ èto na wo, ne bèa nyi kpɔwɔɛ na àmè sia àmè.

⁸ Fifìa, lè nɔ̀nɔmè ŋua ke mèa, nènemeawo kuna ènu bàɖà wɔ̀wɔ be èdrɔ̃, sɔ pònà èɖi woabe àmètia, wo crìnà Mawu be èfìɔ nyinyi, dona vlo ènuɖoɖo kèwo lè jiŋùkusia.

⁹ Wàlɛbɛ kè àtikplɔtɔ gãa Mikàɛl le dɔ̃ Mosè be àmè kpòtia kudo legbaa, mu do jì gblɔ̃ bùsu-nya ɖe na ɛ̀ ò, vɔ̀ e gblɔ̃ kpò be, “Tɔhonɔ̀ ne kã ŋùkumè na wò!”

¹⁰ Vɔ̀ àmè kèawo zũnà àmè ɖo ènu kè wo mu nya òa ŋuti, eye ènu kè gɔ̃mè wo sè kpò sìgbè èlã màɖo-susuwo nènea, la na be wo la crɔ̃.

¹¹ Hèlu na wo! Đo wo le zɔ̃ lè Kaɛ̃ be èmɔ ji, eye wo kpàsà Balam, àmè fùflu be àjɔ̀a do, eye wo crɔ̃, ɖo wo jè àgla sìgbè Korà nène.

¹² Àmè kèawo nyi èɖi lè mìabe lɔ̃lɔ̃-nuɖùɖuwo mè, àfi kè wo ɖùnà ènusu lè, sɔ nyìnà woa ɖokoewo, ŋùkpɛ̃ màɖo. Lilikpo màɖo-èsì kèwo àya sɔna, yìnà, gbɔ̀nàawo ye wo nyi, àti kèwo ji èkusɛ̃sɛ̃ mu nɔ̀nà lè ènuku hùenu ò, kèwo ku zè èvè, eye wo hɔ̃ jo lè èkè jiawo.

¹³ Wo lè sìgbè àpù-srɔ̀ke jè àgla kèwo kplɔ̀nà woa ŋutɔ be ŋùkpɛ̃nuwo va kɔ̀ ɖo àgoa nène. Wo lè sìgbè wètrivi kèwo le dã, eye Mawu jrà wo ɖo ɖɛ na vìvìti cicri kè vɔ̀vɔnu mu lè na òa nène.

¹⁴ Ekèa ŋuti Enɔ̀k, àmè kè so Adàm be kɔ̀ta adrɛ̃gɔ̃ a mèa, gblɔ̃ ènyà ɖɛ ɖo, be: “Kpɔɖa Tɔhonɔ̀ gbãnà ku yebe àtikplɔtɔ kɔ̀kɔ̀ɛawo be àhùakɔ̃ èkà èwì vɔ àtɔ̃ (1000),

¹⁵ ne bèa ɖo kòjo na àmèwo keŋu. E la gblehùɛ do àmè vuɛ̃wo ne woabe èdɔ bàɖà kè wo wɔ̀ lè woabe àglajèje ɖo Mawu ŋuti, kudo woabe nupo pòpo kpòtoe kè èvuɛ̃wɔ̀tɔ màɖo-bùbuwo pò ɖo e ŋutia.”

¹⁶ Àmè kèawo nyi àmè kèwo lìnà lihũi lihũi gbè sia gbè eye wo xànà ènu, wo nɔ̀nà àgbè, zɔ̃ ɖo woa ŋutɔ be ŋùbia ji. Wo gblɔ̃nà jajratɔwo be ènyà eye wo kafuna àmè tɔ̀hɛwo ne woa teŋu kpɔ àjɔ̀ ɖe lè e mè.

Àfɔ̀ ɖo àfɔ̀ ji ku ètopòɖo

¹⁷ Vɔ̀ mì, àmè ɖèvewo, mì ɖoŋù àŋɛ̀ kè mia Tɔhonɔ̀ Yesù Kristò be *àmèdɔ̃dɔ̃wo do na mìa.

¹⁸ Wo gblɔ̃ na mì be: “Lè hùenu mlɛ̃awoa, àmè kòtɔwo la va, àmè kèwo nɔ̀nà àgbè, zɔ̃ ɖo woa ŋutɔ be èjro vuɛ̃wo jia.”

¹⁹ Woawo ye hɛ̃nà màmawo va àmè dòmè, àgbètɔ be susu kpò ye wo ɖènà. Mawu be Gbɔ̃gbɔ̃ a mu lè woa mè ò.

²⁰ Vɔ̀ mìa, èxlɔ̃ nyèwo, mì nɔ yì ŋùkɔ̀ lè mìabe xɔ̀sè kè nyi kɔ̀kɔ̀ɛa mè. Mì nɔ fãkue ku Gbɔ̃gbɔ̃ Kɔ̀kɔ̀ɛ a be ŋusɛ̃.

²¹ Eye mìa nɔ̀ Mawu be lɔ̃lɔ̃ mè. Mì tɔtè kpɔ mia Tɔhonɔ̀ Yesù Kristò, àmè kè lè yebe àdɔ̀mè nyuɛ̃ mèa, la na mì àgbè màvɔ.

²² Mì ku ŋuzĩzĩ na àmè kèwo le do àɖìkàawo,

²³ mì dɔ̃ wo to lè èzò mè, sɔ hlùɛ̃ wo gã. Mì ku ŋuzĩzĩ na àmè kpɔ̀tɛawo cã, vɔ̀a mì nɔ̀ ŋùzɔ̃, eye mì crì woabe ènuvuɛ̃ be àgbè, kaka jè woabe àwùwo ŋutɔ cã ji.

Sìtu

²⁴ Fifìa, àmè kè teŋu ɖia mì lè ànyi jèje mè, eye be la na mì la nɔ̀tè, ŋùmè kãkã màɖo, kudo jìjɔɛ lè yebe gogo be ŋùkɔ̀a,

²⁵ Mawu ɖèka, miabe Hlùɛ̃tɔ Yesù Kristò, mia Tɔhonɔ̀a, tɔ̀ ye nyi gogo, ègãnyinyi, ŋusɛ̃, ègbè ɖèɖe lè hùenu kèwo va yì, fifì ku tɛ̀gbɛ̀dò. * Àmèn.