Yosùa 1 - GƐ̃GBE BIBLIA 2014

Yosùa ɖɔ̀lì Mosè

¹ E va jɔ̀ be ekè Tɔhonɔ̀ be sumɔ̃vi Mosè kua, Tɔhonɔ̀ pò nupo na Nun be vi ŋusù, Yosùa, kè nyi Mosè be àlɔ̀dotɔa gblɔ̃ be:

² “Àpe sumɔ̃vi Mosè a ku; eŋuã fifìa, sitè gbà! Ne èwò ku dùkɔ̃a mìa sò Yɔrdàn be ètɔ̀ kè lè ŋùkɔ̀ na mìa, yì ànyigbã kè mù sɔ le na mìa Izràɛlviwoa ji.

³ Àfi ɖekpekpe kè mìabe àfɔ̀wo la toa, mù sɔ ɛ̀ na mì vɔ̀ sìgbè àlekè mù fìã ɛ̀ na Mosè a nène;

⁴ So kaka zògbèa ji ku Libàn be ètoa gbɔ kaka va ɖo ètɔ̀ sàsra gã Efratàa to, Hitìtɔwo be ànyigbã kpata, kaka yì àpù gã kè lè èwèɖoxɔ̀pea, ekèa ye la nyi mìabe ànyigbã.

⁵ Àmè ɖekpe mu la teŋu wɔ̀ kãlì lè ŋùkɔ̀ na wò lè àpo àgbènɔ̀zã kpata mè ò. Mù la nɔ̀ ku wò sìgbè àlekè mù nɔ̀ ku Mosè a nène; nyè mu la gble wò ɖɛ ò, eye àpe àlɔ̀do mu la hùe do wò ò.

⁶ Wɔ̀ kãlì ne wòa dojì, ɖo èwò ye la sɔ ècrɔ̃-nyigbã kè be àjɔ̀gbè mù fìã na woa tɔwo be ma sɔ na woa, na èdùkɔ̃ kèa.

⁷ Ɛ̃ɛ, wɔ̀ kãlì eye wòa dojì sɛ̃sɛ̃ɖe; ɖia ne wòa wɔ̀ ɖo èse blibo kè àpe sumɔ̃vi Mosè do na wòa ji. Mù gbà trã yì ɖùsi àlo èmìɔ̃ mè lè èse ŋua ŋuti ò, àleke be ènu sia ènu bèa zɔ̃ sù na wò lè àfi ɖekpekpe àfi kè wò la yìa.

⁸ Èse xoma kèa be nyàwo mu gbà bu lè ènu mè na wò ò; wò la nɔ dèŋùgblè so e ŋuti èzã ku kedè àleke be wòa teŋu nɔ wɔ̀ ɖo ènu kè wo ŋlɔ̀ ɖo e mèa ji, ɖo nènea ye wò la sɔ sìtu ɖo èmɔ̃ wòwo ji, eŋuã, wò la kpɔ nyɔna.

⁹ Mu nyi ègbè mù do àsi na wò be wòa wɔ̀ kãlì ne wòa dojìa? Mù gbà hũhũ kaka ne wòa vɔ̃ ò, ɖo Tɔhonɔ̀, àpo Mawu a la nɔ̀ ku wò lè àfi ɖekpekpe kè wò la yìa.”

Ɖoɖo ku jàjràɖowo na Yɔrdàn be ètɔ̀a be sòso

¹⁰ E yomè a, Yosùa do ègbè kèa àsi na dùkɔ̃a be ŋùkɔ̀nɔ̀tɔwo:

¹¹ “Mì to àsàɖaa mè eye mì gblɔ̃ ènyà kèa na dùkɔ̃a: 'Mì jrà èmɔ̃ zɔ̃zɔ̃ be ènuwo ɖo ɖɛ, ɖo lè ŋùkèkè ètɔ̃ yomè a, mì la sò Yɔrdàn be ètɔ̀ kèa ne mìa yì xɔ̀ ànyigbã kè Tɔhonɔ̀ mìabe Mawu sɔ na mìa.'”

¹² Eye Yosùa gblɔ̃ na Rubɛ̀n-viwo, Gad-viwo ku Manasè be kɔ̀ta be àkpa mamã mè be:

¹³ “Mì ɖoŋùku ègbè do àsi kè Mosè, Mawu be sumɔ̃via sɔ na mìa ji be: Tɔhonɔ̀, mìabe Mawu a na mì jɛ̃gbɔ̃pe; e sɔ ànyigbã kèa na mì.

¹⁴ Mìa srɔ̃wo ku mìabe èviwo kudo mìabe èlãhawo la ci ànyigbã kè Mosè sɔ na mì lè Yɔrdàn godoa ji. Vɔ̀a, mìa kãlìwɔ̀tɔwo kpata, mì la blakpà, la nɔ̀ ŋùkɔ̀ na mìa nɔ̀viwo, sɔ do wo àlɔ̀,

¹⁵ kaka va na gà kè mè Tɔhonɔ̀ la na jɛ̃gbɔ̃gbɔ̃ mìa nɔ̀viawo cã sìgbè àlekè e na mìa nène, ne woa cã woa xɔ̀ ànyigbã kè Tɔhonɔ̀, mìabe Mawu a sɔ na woa. E yomè a, mì la trɔ jo yì xɔ̀ mìabe ànyigbã, ànyigbã kè Tɔhonɔ̀ be sumɔ̃vi Mosè na mì lè Yɔrdàn godo lè èwèzɛ̃pe a.”

¹⁶ Wo ɖo e ŋuti na Yosùa be: “Mi la wɔ̀ ɖo ènu kèwo kpata wò gblɔ̃ na mia ji eye mi la yì àfi ɖekpekpe kè wò la dɔ̃ mi ɖoɖaa.

¹⁷ Mi la sètonu na wò sìgbè àlekè mi sètonu lè ènu sia ènu mè na Mosè a nène. Ɛ̃ɛ, Tɔhonɔ̀, àpo Mawu a la nɔ̀ ku wò sìgbè àlekè e nɔ̀ kudo Mosè a nène.

¹⁸ Àmè ɖekpekpe àmè kè la sitè ɖo àpo ègbè ɖèɖea ŋuti eye mu la wɔ̀ ɖo àpo ènyà kèwo wò la gblɔ̃ na mi, lè ègo sia ègo mèa, ji òa, jè na èku. Ɛ̃ɛ wɔ̀ kãlì eye wòa do jì!”