Yonà 1 - GƐ̃GBE BIBLIA 2014

Yonà si lè Mawu be èdɔa nu

¹ Tɔhonɔ̀ be ègbè ɖì na Yonà, Àmìtayì be èvia be:

² “So, ne wòa yì Ninivè, èdù gãa mè, ne wòa do àpa ɖo e ta, ɖo, èdùamètɔwo be èvuɛ̃wɔ̀wɔ va ɖo ŋùku nyè mè.”

³ Ekè Yonà sitèa, e si le yì Tarsìs, jo lè Tɔhonɔ̀ be ŋùmè. Kè be ɖo Yafòa, e kpɔ àpùjihũ ɖe kè le yì Tarsìs be èdùa mè. E tu èhũ ɖo cia, eye be ɖo èhũa ku àmèwo, tùtà Tarsìs, jo lè Tɔhonɔ̀ be ŋùmè.

⁴ Vɔ̀a, Tɔhonɔ̀ na àya sɛ̃sɛ̃ɖe pò lè àpùa ji, àleke be àpùa wɔ̀ àdã gã ɖe, kaka àpùjihũa nyrɔ̃ kloe.

⁵ Àpùjihũ kùtɔawo vɔ̃, eye woa dòmètɔ ɖe sia ɖe do àpa yɔ yebe ènusɛ̃sɛ̃, eye wo fɔ̀ àgbã kèwo lè àpùjihũa mèa, kɔ̀ ɖo àpùa mè, ne èhũa bèa fò. Wàlɛbɛ ŋua, Yonà ya ɖì yì èhũa be gòglòpe, mlɔ̃ ànyi, eye be dɔ̃ àlɔ̃ boo.

⁶ Èhũ kùtɔawo be àmègãa zɔ̃ gogo Yonà, eye be gblɔ̃ be: “Nukɛ be àlɔ̃ ye wò le dɔ̃ ò? Sitè, ne wòa fã yɔ ènusɛ̃sɛ̃ wòa. Ta mu nyɔ òa, vòdu wòa la ku ŋuzĩzĩ na mi, ne mi mu gbà ku ò.

⁷ Ekèa yomè a, àmèawo gblɔ̃ lè woa nɔ̀nɔwo dòmè be: “Fifìa, mia do àkà, ne mia nya àmè kè le hɛ̃ gbledo kèa vaa.” Ekè wo do àkàa, àkaa jè Yonà ji.

⁸ Wo gblɔ̃ na Yonà be: “Tɔ̀ wò jɔ̀, gblɔ̃ ènu kè le hɛ̃ gbledo kèa va mia jia na mi. Èdɔ kɛ ye wò wɔ̀nà ò, eye fikɛ ye wò so ò? Èdù kɛ mètɔ ye wò nyi ò, eye èkɔ̀ kɛ ye wò pònà ò?”

⁹ Yonà ɖo e ŋuti na wo be: “Hebrùvi ye mù nyi, eye mù sɛ̃nà Tɔhonɔ̀ Mawu kè lè jiŋùkusi, ekè wɔ̀ àpù ku ànyigbãa.”

¹⁰ Ekè Yonà gblɔ̃ ènyà kèa, vɔ̃vɔ̃ gã ɖe ɖo àmèawo, eye wo gblɔ̃ be: “Nukɛ ye wò wɔ̀ ŋua ò?” Ɖoa, àmèawo nya be e le si jo lè Tɔhonɔ̀ be ŋùmè ye; e gblɔ̃ ɛ̀ na wo sã.

¹¹ Wo biɔ ɛ̀ be: “Fifìa ɖe, nukɛ ye mi la wɔ̀ na wò, la sɔ fa àpùa be àdãwɔ̀wɔ ò?” Ɖoa, àpùa gbà le wɔ̀ àdã kpe è.

¹² Yonà ɖo e ŋuti na wo be: “Mì sɔ mù dãŋùgbe ɖo àpùa mè, kpòa, àpùa la fa na mì. Ɖoa, mù nya be ŋuti nyè ye àpùa le wɔ̀ àdã sɛ̃sɛ̃ɖe lekea do mì ɖo.”

¹³ Wàlɛbɛ ŋua, àmèawo le kù èhũa tùtà àgo, vɔ̀a, wo mu teŋu le kpe e ji ò, ɖoa, àpùa gbà le wɔ̀ àdã wu sãa.

¹⁴ Ekèa na be wo fã yɔ Tɔhonɔ̀ be: “Tɔ̀ wò jɔ̀, Tɔhonɔ̀, mi ɖèkuku, mù gbà sɔ ŋusù kèa be àgbè pò mi, èhũ mà nyaɖewo ò. Ɖoa, Tɔhonɔ̀, àlekè bè jro wò ɖoa, ye wò wɔ̀nà.”

¹⁵ E yomè a, èhũkùtɔawo le Yonà, sɔ ɛ̀ dãŋùgbe ɖo àpùa mè, eye àpùa fa, zè ɖèka.

¹⁶ Ènu kèa na be, vɔ̃vɔ̃ gã ɖe ɖo àmèawo, eye wo gbà vɔ̃ Tɔhonɔ̀ ŋutɔ. Wo savɔ, eye wo fìã àjɔ̀gbè na Tɔhonɔ̀.