Yoɛ̀l 1 - GƐ̃GBE BIBLIA 2014

¹ Tɔhonɔ̀ pò nupo na Yoɛ̀l, Petùɛl be èvia.

² E gblɔ̃ be: Àmèsĩsĩwo, mì ɖoto ènyà kèa! Mì Yudàtɔwo kpata, mì pu èto ànyi ne mìa sè! Ènu kè le jɔ̀ fifìa, ekèa tɔ̀gbè ɖe jɔ̀ lè mìabe hùenu àlo mìa tɔgbewo be hùenu kpɔa?

³ Mì tù èxo kèa na mìabe èviwo eye mìabe èviwo ne to è na woabe èviwo eye woawo cã ne to è na ɖèvi kèwo la jɔ̀ ɖo woa yomè a.

⁴ Ènu ɖù àgblèmènukuwo kpata. Ènu kè ŋɔviwo ɖù kpɔ̀tɔ̀ ɖɛa, hùesuviwo ɖù ì. Ènu kè hùesuviwo ɖù kpɔ̀tɔ̀ ɖɛa, àtrãwo ɖù ì eye ènu kè àtrãwo ɖù kpɔ̀tɔ̀ ɖɛa, èbɔ̀wo ɖù ì.

⁵ Mì àhànùmunɔ̀wo, mì fɔ̃ eye mìa fã àvi, mì vɛ̃sunùtɔwo kpata mì hànu ɖo vɛ̃ yeye kè mì mu la tɛŋu kpɔ la nù òa ŋuti.

⁶ Ɖo lãklìviwo be àhùakɔ̃ va xa miabe ànyigbã. Ŋusɛ̃ lè woa si eye wo sùgbɔ eye woabe àɖuwo lè sìgbè jãŋùta-su be àɖu nène, eye woabe àglã lè sìgbè jãŋùta-nɔ tɔ̀ nène.

⁷ Wo fɔtɔ mìabe vɛ̃-gblewo, eye wo ŋɛ̃ mìabe vòtiwo wliwli, ɖù wo lè woabe àkpàwo kpata mè. Eye vɛ̃ti be àlɔ̀zɛ̃ ɣewo kpò ye kpɔ̀tɔ̀.

⁸ Mì hànu sìgbè tùgbɛ̀jɛ lè àlɔ̀ji kè yebe àgɔ̀sɔ ku gble ɖɛa nène.

⁹ Wo mu gbà hɛ̃nà àgblèmènuku kudo vɛ̃ va na Tɔhonɔ̀ be àxomè ò. Eŋuã ŋuti ye hũbonɔwo lè ŋuzĩzĩ mè sìgbè ècɔ ye ku na wo nène.

¹⁰ Ènu ɖù àgblèa kpata. Ànyigbã bliboa ci ŋuzĩzĩ mè. Ɖo àgblèmènuku mu lè ò eye vɛ̃ yeye cã mu lè ò, àmì yeye ɖe cã mu gbà lè ò.

¹¹ Lãmè gbɔjɔ na àgblèdàtɔwo vɛ̃-gbledàtɔwo lè ènuxàxa mè. Èlù ku èlùviwo mu gbà lè ò. Ɖo àgblèmènuku kèwo wo la yàa kpata gble.

¹² Vɛ̃kawo ku eye vòtiwo yrɔ̀. Yòvobòɖàtiwo, detiwo kudo àtɔklikotiwo àtikusɛ̃sɛ̃wo kpata ye pu. Jìjɔɛ ɖekpe mu gbà lè àgbètɔwo dòmè ò.

Àmè sia àmè ne blanu sɔ ɖèkuku na Tɔhonɔ̀

¹³ Hũbonɔwo, mì tà èfũlòvɔ ne mìa fã àvi. Mì, àmè kèwo le sumɔ lè Tɔhonɔ̀ be vɔsakpea be ŋùkɔ̀a, mì làmɔɛ̃ èzã bliboa! Ɖo àmè ɖekpe mu gbà le hɛ̃ àgblèmènuku àlo vɛ̃ be ènunana ɖe va mawuxɔa mè ò.

¹⁴ Mì na àmè sia àmè ne blanu, mì wɔ̀ gòdo gãaɖe. Mì bɔ̀ àmèsĩsĩwo kudo èdùmèviwo kpata ɖo Tɔhonɔ̀ miabe Mawu be gòxɔa mè ne mìa blìbɔ̀ na ɛ̀.

Tɔhonɔ̀ be ŋùkèkèa

¹⁵ Boboè! Ŋùkèkè bàɖà bàɖà ɖe gbãnà. Èŋù kè gbè Tɔhonɔ̀ la do àdɔ̀mèzea lili. E la va sìgbè gbledo kè la crɔ̃ ènuwo keŋuã nène.

¹⁶ Mu nyi miabe ŋùmè ye wo fɔ̀ miabe ènuɖùɖuwo jo lèa? Jìjɔɛ kudo àyosòso mu gbà lè miabe Mawu be gòxɔa mè ò.

¹⁷ Àgblènuku kèwo wo do a kpata ye nyìnyɔ̀ ɖo ànyigbã a mè. Àvàwo kpata ci gbalo, ɖo àgblèmènukuwo pu keŋu-keŋu.

¹⁸ Mì ɖoto lekè èlãwo le ŋɛ̃ ɖoa! Ènyìwo le dã, le ɖota àfi ɖekpekpe, ɖo ègbeɖùpe mu gbà lè na wo ò. Àlɛ̃wo ŋutɔ cã pò yùkpàa.

Gblɔ̃ɖɛtɔa be kuefã

¹⁹ Tɔhonɔ̀, mù le do àpa ɖoɖa wò, ɖo èzò bì ègbe-do-àmàwo keŋu eye ègbemè be àtiwo kpata fiɔ̃.

²⁰ Ègbemèlãwo cã le do àpa yɔ wò ɖo ètɔ̀wo pu kpakpla eye èzò fiɔ̃ ègbe-do-àmàwo kpata.