Yakobò 1 - GƐ̃GBE BIBLIA 2014

Ègbè dodo

¹ Yakobò, Mawu kudo Tɔhonɔ̀ Yesù Kristò be sumɔ̃vi, do ègbè ɖoɖa kɔ̀ta woèvè kèwo kãkã ɖo ànyigbã buwo jiawo!

Xɔ̀sè ku ènunya

² Nɔ̀vi nyèwo, ne mì jè tètèkpɔ hamèhamèwo mèa, mì xɔ̀ wo ku jìjɔɛ gãɖe, àlekè mì la teŋuã,

³ ɖo mì nya ɛ̀ be mìabe xɔ̀sè be dodokpɔ, hɛ̃nà àdòdò va.

⁴ Vɔ̀a, àdòdò ne wɔ̀ yebe èdɔa lè mia mè ɖɔɖɔ ɖe, ne mìa nyi àmè kèwo la zɔ̃ sù keŋu-keŋu, eye ne ènu ɖekpe mu gbà dɛ̃ mì ò.

⁵ Ne, lè mìa dòmèa, àmè ɖe hiã ènunyaa, ne biɔ Mawu bèa na ɛ̀. E kɔ̀nà àdɔ̀mè, nana ènu àmè ɖekpekpe fàa, eye mu dona ŋùkpɛ̃ àmè ò.

⁶ Vɔ̀ ne wò le fãkuea, e jè be wòa xɔ̀ Mawu ji sè. Mù gbà do àɖìka ò, ɖo àmè kè dona àɖìkaa lè kpò sìgbè àpù be àsrɔ̀ke kè àya pònà yìnà gbɔ̀nàa nène.

⁷ Àmè ŋua mu gbà susu be, yè la kpɔ ènu ɖe xɔ̀ so Mawu gbɔ ò;

⁸ àyè èvètɔ ye be nyi, eye mu linakè lè yebe èmɔwo ji ò.

Èhiã jèje ku èci kpɔkpɔ

⁹ Nɔ̀vi kè nyi èhiãmea ne jɔ̀jì be Mawu kɔ yè yì èji.

¹⁰ Nène a ke ye nɔ̀vi àdɔ̀kùnɔ̀ cã ne jɔ̀jì be Mawu bɔ̀bɔ̀ yè ɖo ànyi, ɖo àdɔ̀kùnɔ̀ be àgbè nu la va yì sìgbè ègbe be èsepòpo kpò nène.

¹¹ Ne èwè zɛ̃, eye dɔ̃ŋùkusu hũ sɛ̃sɛ̃ ɖe a, e ɖùnà ègbea, be yrɔ̀nà; funua, yebe èsepòpoa gɛ̃na, eye yebe nɔ̀nɔmè nyuɛ̃a crɔ̃na lè. Nène a ke ye àdɔ̀kùnɔ̀ cã la jè ànyi lè yebe àgbàgba jèjewo mè.

Dodokpɔ ku tètèkpɔ

¹² Sìtu ɖèɖe ye e nyi na àmè kè dona èjì lè tètèkpɔ mèa; ɖo ekè wo do è kpɔ vɔ̀a, e la xɔ̀ àgbè jègbà kè Tɔhonɔ̀ fìã na àmè kèwo lɔ̃nà ɛ̀awo.

¹³ Ne tètèkpɔ va na àmè ɖe a, mu gbà gblɔ̃ be: “Mawu ye tè mù kpɔ ò.” Đo èvuɛ̃ wɔ̀wɔ mu ɖona Mawu be susu mè ò, eye ye ŋutɔ mu tènà àmè kpɔ ò.

¹⁴ Vɔ̀a tètèkpɔ vana na àmè sia àmè, ne ye ŋutɔ be èjro dɔ̃ ɛ̀, eye be flù ìa.

¹⁵ Ne èjroa fɔ èfua, e jìnà èvuɛ̃, eye ne èvuɛ̃a sĩa, e jìnà èku.

Ènu nana nyuɛ̃wo keŋu sona Mawu gbɔ

¹⁶ Nɔ̀vi nyè ɖèvewo, mì mu gbà flù mìa ɖokoewo ò.

¹⁷ Ènu nana nyuɛ̃wo kudo ènu nana zɔ̃ sùwo kpata sona jiŋùkusi; Wo sona Mawu kè nyi jiŋùkusi kɔ̀kɔ̀ɛwo be ɖotɔ a gbɔ. Vɔ̀a Mawu mu trɔna ò, eye yebe nɔ̀nɔmè ɖekpe mu dona vìvìti ò.

¹⁸ Mawu kèa sɔ èjro fàa jì mi, to nyàwo be ènyàa ji be mia va nɔ̀ sìgbè ŋùkɔ̀gbeviwo nène na yebe ènu ɖoɖowo.

Àŋɛ̀nyuɛ̃ a sèse ku e ji wɔ̀wɔ

¹⁹ Nɔ̀vi nyè ɖèvewo, mìabe ŋùku ne nɔ̀ ènyà kèa ji. Àmè sia àmè ne sɔ̀gbè ne bèa ɖo èto ènyàa, vɔ̀ mu gbà ciji la pò nupo ò, eye mu gbà nɔ bijì cã kaba ò.

²⁰ Đo àmè kè bijìa mu wɔ̀nà ènu jɔ̀jɔɛ lè Mawu be ŋùmè ò.

²¹ Ye ŋutia, mì ɖè àsi lè àfɛ̃nu ɖe sia ɖe wɔ̀wɔ ku àgbè nɔ̀nɔ vuɛ̃ ɖe sia ɖe ŋuti. Mì bɔ̀bɔ̀ mìa ɖokoewo na Mawu, àleke be mìa teŋu xɔ̀ yebe ènyà kè be do ɖo mìa mè, kè la teŋu hlùɛ̃ mì gãa.

²² Mì wɔ̀ ɖo àŋɛ̀nyuɛ̃ a ji. Mì mu gbà nyi ènyà sètɔwo ɖèɖe kpò, la nɔ flù mìa ɖokoewo ò.

²³ Đo ènyàsètɔ kè mu wɔ̀nà ɖo e ji òa, ɖì àmè kè kpɔ yebe ŋùmè lè àpùpui mè.

²⁴ Zè ɖèka kè be trɔ joa, e ŋlɔ̀be àlekè be lèa xoxo.

²⁵ Vɔ̀, àmè kè bùnà *èse kè sù blibo, nana vòvoa, dona veve ènu, eye be wɔ̀nà ɖo ènyàa jia, Mawu la tu sì na ɛ̀ lè ènu sia ènu kè e la wɔ̀a mè. E ya mu lè sìgbè ènyàsètɔ kè ŋlɔ̀nàbe ènua nène ò.

²⁶ Ne àmè ɖe susu be yè nyi Mawu sɛ̃tɔ, eye mu trɔna àɖe lè ènu mè, zè adrɛ̃, gbɔ̀xue pònà nupo òa, e le flù ye ɖokoe eye yebe sɛ̃sɛ̃a nyi gbalo.

²⁷ Mawu sɛ̃sɛ̃ kè kɔ̀, eye èɖi mu lè e ŋuti, lè Mawu Àta be ŋùmè òa ye nyi ekèa be: woa do àlɔ̀ ècɔɛ̀viwo ku àsukusiwo lè woabe èfũwo mè, eye àmè bèa dɔ̃ ye ɖokoe jo so ènu kèwo pònà ɖi àmè lè xixe kèa mèawo gbɔ.