Sèfanìa 1 - GƐ̃GBE BIBLIA 2014

¹ Wàlɛbɛ kè Yosìas kè nyi Amɔ̀n be èvia le ɖùfìɔ lè Yudà be ànyigbã jia, Tɔhonɔ̀ be ègbè ɖì na Sèfanìa, Kusì be èvia. Kusì nyi Gèbalìa be èvi. Gèbalìa nyi Àmarìa be èvi. Àmarìa nyi Ezekìas be èvi. Tɔhonɔ̀ be ègbèa le gblɔ̃ be:

Tɔhonɔ̀ be kòjoɖo-zãgbè

² “Mù la crɔ̃ ènu sia ènu lè ànyigbã ji!” Tɔhonɔ̀ ye gblɔ̃ ɛ̀.

³ “Mù la crɔ̃ àgbètɔwo ku èlãwo keŋu, mù la crɔ̃ àyamè xèviwo ku àpùmè-lãwo, mù la tutu àgbètɔwo jo lè ànyigbã ji!” Tɔhonɔ̀ ye gblɔ̃ ɛ̀.

Tɔhonɔ̀ ɖokòjo na Yudà ku Yèruzàlɛm

⁴ Mù la do àlɔ̀ ɖoɖa Yudà gbɔ, mù la do àlɔ̀ ɖoɖa Yèruzàlɛm be dùmètɔwo gbɔ, mù la gũ ènu ɖekpekpe kè la kpɔ̀tɔ̀, so vòdu Baal sɛ̃sɛ̃ mèa jo lè tèpe kèa, sɔ kpe ɖo bòkɔnɔ ku vòdunuwɔ̀tɔ vuɛ̃wo be nyikɔwo ŋuti,

⁵ àmè kèwo dona èta gũ lè èxɔ̀wo ta, sumɔna wètriwo be àhùakɔ̃wo, àmè kèwo dona èta gũ, eye wo tànà ènu lè Tɔhonɔ̀ be nyikɔ mè, vɔ̀ gbà tànà ènu lè vòdu Mɔ̀lɔk cã be nyikɔ mèa,

⁶ àmè kèwo trɔ lè Tɔhonɔ̀ yomè, eye wo mu jina Tɔhonɔ̀, àlo biɔna yebe kpɔ̀kplɔ òa.

⁷ Mì bɔ̀nu lè Tɔhonɔ̀ be ŋùkɔ̀, ɖoa, Tɔhonɔ̀ be ŋùkèkèa lili. Tɔhonɔ̀ jràɖo la savɔ. E kɔ̀ àmè kèwo be kpeawo ŋuti.

⁸ Tɔhonɔ̀ gblɔ̃ be: “Lè Tɔhonɔ̀ be vɔsa gbèa, mù la dɔ̃to na àmègãwo, àmè kèwo nyi èfìɔviwoa ku àmè kèwo keŋu dona èdù bu mètɔwo be àwùawo.

⁹ Gbè ŋua gbèa, mù la dɔ̃ èto na àmè kèwo keŋu tìnàkpo, flana kpoku, eye wo sɔna èhlɔ̃dãdã ku àmèfùflu be ènuwɔ̀wɔwo ɖɔna woabe àpetɔwo be àxuewo tãŋu.”

¹⁰ Tɔhonɔ̀ gblɔ̃ be: “Gbè ŋua gbèa, àbòbo la ɖì so tɔ̀mèlãwo be àgboa nu; àlenana la ɖì so Èkɔ Yeyea mè; eye zigìdi gã ɖe la ɖì lè ètokɔ̃ɛ̃wo ji.

¹¹ Mì na àle, mì, àmè kèwo nɔ̀nà èdùa be bàlì mèawo, ɖoa, mìabe àsìsàtɔwo keŋu la crɔ̃! Àmè kèwo keŋu dona klòsalò be àjɔawo nu la ci!

¹² Ɛ̃ɛ, gà ŋua mèa, mù la sĩ kãligbɛ̃, la kãkã Yèruzàlɛm be èdùa mè, eye mù la dɔ̃ èto na hùɛ̃yi kèwo vò fɛ̀ɖɛ̀, ɖo woabe àdɔ̀kùnuwo ji, sìgbè leke vɛ̃ ɖona èɖi lè gɔ̃mèa nène, eye wo le susu be: 'Tɔhonɔ̀ mu teŋu wɔ̀ ènu ɖekpe, èvuɛ̃, àlo ènyuɛ̃ ò.'

¹³ Ɛ̃ɛ, àmèwo la hlà woabe àdɔ̀kùnuwo, la gbã woabe àxuewo, wo la tù àxuewo, vɔ̀ wo mu la nɔ̀ àxueawo mè ò. Wo la dà vɛ̃-gblewo, vɔ̀, wo mu la nù woabe àhà ò.

Tɔhonɔ̀ be àzãa

¹⁴ Tɔhonɔ̀ be ŋùkèkè gãa lili E gogo eye be la va ɖo zãɖe kèa. Tɔhonɔ̀ be àzã gã ŋua be àbòbo la ɖì ku vevesèse lè funu, eye kãlìwɔ̀tɔ ŋutɔ cã la fã biɔ xɔ̀namè.

¹⁵ Gbè ŋua gbè la nyi àfɔ̀ku gbè, èhlòmè sãkɔ̃ ku àkpɔ̃ ciji be ŋùkèkè, zigìdi ku ènu gbegble be ŋùkèkè, vìvìti ku vɔ̃vɔ̃ be ŋùkèkè, èjiɖoɖo ku lilikpo yìbɔ vĩ be ŋùkèkè,

¹⁶ àhùa-kpɛ̃ kuku, ku àhùa-pa be ŋùkèkè, èzè ku àbòbo kèwo la ɖì ɖo àgbògbò be èdùwo ta, wo la ɖì ɖo yebe kɔ̃nàwo be mɔjikpɔxɔ̀ gãwo ta.”

¹⁷ Tɔhonɔ̀ gblɔ̃ be: “Mù la dɔ̃ àkpɔ̃ ciji va àgbètɔwo ji, eye wo la nɔ zɔ̃ sìgbè ŋùkuvi gbãgbãnɔ̀wo nène! Ɖoa, wo wɔ̀ èvuɛ̃ ɖo Tɔhonɔ̀ ŋuti. Wo la kɔ̀ woabe èhũ ɖɛ sìgbè hũhũ nène, eye woabe àdɔ̀gbo la to sìgbè ègbeɖiɖɔ nène.

¹⁸ Woabe klòsalò mu la teŋu hlùɛ̃ wo gã ò, eye woabe sìka mu la teŋu xɔ̀ na wo, lè Tɔhonɔ̀ be àdɔ̀mèze-zã gbè ò. Lè yebe ŋuhuã be èzò bìbi ɖo vɔ̃vɔ̃a mèa, xixe kplògòdòa keŋu la fiɔ̃, ɖoa, e la gũ ènu àgbèagbèwo keŋu lè ànyigbãa ji.