Romàtɔwo 1 - GƐ̃GBE BIBLIA 2014

Ègbè dodo

¹ Ènyè Paolò, Yesù Kristò be sumɔ̃vi kè Mawu ŋutɔ yɔ, ne bèa nyi *àmèdɔ̃dɔ̃ kè wo ɖè ɖovò na Mawu be àŋɛ̀nyuɛ̃ a dodoa, ye le ŋlɔ̀ xoma kèa ɖoɖa mì.

² Àŋɛ̀nyuɛ̃ kèa, Mawu gblɔ̃ ɛ̀ ɖɛ, to yebe gblɔ̃ɖɛtɔwo ji lè ŋɔ̀ŋlɔ̃ kɔ̀kɔ̀ɛawo mè.

³ Àŋɛ̀nyuɛ̃ a pò nupo so Èvia kè wo jì lè Èfìɔ David be xòmè mè, lè ŋutilã mèa ŋuti.

⁴ Vɔ̀a, lè Gbɔ̃gbɔ̃ Kɔ̀kɔ̀ɛ tɔ̀ gomèa, wo ɖè è fiɔ ku ŋusɛ̃, be e nyi Mawu be Èvi, to yebe fɔ̃fɔ̃ so èku mè. E ye nyi Yesù Kristò, mia Tɔhonɔ̀a.

⁵ Àmè kè ji Mawu to, na mù màje be ma nyi *àmèdɔ̃dɔ̃ na Yesù be gogo, àleke be ma kplɔ̀ àmèwo kpata, lè èdùwo keŋu mè, ne woa xɔ̀ e ji sè, eye woa sè ètonu na ɛ̀.

⁶ Mìawo cã, mì lè àmè ŋuawo dòmè. Mì, àmè kèwo Mawu cã, ne mìa nyi Yesù Kristò tɔ̀awo.

⁷ Mù lè ŋlɔ̀ xoma kèa ɖoɖa mì, mì, àmè kèwo keŋu lè Romà, mì, àmè kèwo Mawu ɖève, yɔ, ɖè ɖovò, be woa nyi yèbe dùkɔ̃awo. Màje ku ŋuti fàfa ne so Mawu, mia Tɔ ku Tɔhonɔ̀ Yesù Kristò gbɔ, va na mì.

Paolò ku Romà be Kristòtɔ̀wo

⁸ Cucugbãa, mù le do àkpe na Mawu nyè ɖo mìa keŋu ta, to Yesù Kristò ji, ɖoa, lekè mì xɔ̀ Mawu ji sè ɖoa, ɖì, gbãkpe àfi sia àfi lè xixea mè.

⁹ Mawu kè mù sɛ̃nà lè gbɔ̃gbɔ̃ mè, to Èvia be àŋɛ̀nyuɛ̃ a be kãkã mèa ye nyi ɖàsèfo nyè, be mù ɖona ŋùkuvi mìa ji,

¹⁰ gà sia gàmè, ne mù le fãkuea, mù ɖènà kuku na Mawu be ne ɖè èmɔ na mù fifì, ne ma teŋu va kpɔ mì jro.

¹¹ E nyi àpe èjro veve ɖe be mia dogò àgbãŋùgbà, àleke be mia ma ènu nana ɖe kè so Gbɔ̃gbɔ̃ a gbɔa, ne bèa do mì ŋusɛ̃.

¹² Sɔ wu ekèa, mù jro be ma nɔ̀ mìa dòmè, ne mia do ŋusɛ̃ mia nɔ̀nɔwo, lè xɔ̀sè ɖèka, kè mè ènyè kudo mì mi lèa.

¹³ Nɔ̀viwo, mù jro be mìa nya be mù ɖo è veve ɖe ŋutɔ, be ma va mìa gbɔ, gbɔ̀xue, mu jè e ji na mù kpɔ, kaka va na fifì ò. Mù jro be ma kpɔ èdɔ nyèa be àlè ɖe lè mìa gbɔ, sìgbè lekè mù kpɔ ɛ̀ lè àmè kèwo mu nyi Yudàvi òawo be èdù kpɔ̀tɛawo mèa nène.

¹⁴ Đo e nyi àpe èdɔ do àsi be ma do àŋɛ̀nyuɛ̃ a na àmèwo kpata: Grikwo ku àmè màkɔ̀ ŋùkumèwo, xomanyatɔwo ku àmè mànyaxomawo keŋu.

¹⁵ Nène a, e nyi àpe èjro veve ɖe be ma do àŋɛ̀nyuɛ̃ a na mì, àmè kèwo lè Romàawo cã.

Àŋɛ̀nyuɛ̃ a ɖo ŋusɛ̃

¹⁶ Àŋɛ̀nyuɛ̃ a mu kpɛ̃nà ŋù na mù ò, ɖo e nyi Mawu be ŋusɛ̃. E hlùɛ̃nà àmè kèwo keŋu xɔ̀nà e ji sèawo gã; cucugbãa, Yudàviwo, e yomè a, àmè kèwo mu nyi Yudàvi òawo cã.

¹⁷ Đo wo ɖè Mawu be jɔ̀jɔɛ nyinyia so e mè, ku xɔ̀sè, ɖo xɔ̀sè ŋuti, sìgbè àlekè wo ŋlɔ̀ ɛ̀ ɖɛa nène be: “Àmè kè lè jɔ̀jɔɛa, la nɔ̀ àgbè to xɔ̀sè ji.”

Àmè ɖekpe mu lè jɔ̀jɔɛ lè Mawu be ŋùmè ò

¹⁸ Wo ɖè Mawu be àdɔ̀mèzea fiɔ nyàwo so jiŋùkusi, ɖo àgbètɔwo be Mawu màsi ku jɔ̀jɔɛ màwɔ̀ keŋu ŋuti. Wo sɔ ènu màjɔ̀ màjɔ wɔ̀wɔ xe èmɔ na nyàwo totoa.

¹⁹ Ènu kè àgbètɔwo la teŋu nya so Mawu ŋutia, wo nya ɛ̀ xoxo: ɖoa Mawu ŋutɔ ɖè è fiɔ wo.

²⁰ So kaka wàlɛbɛ kè wo ɖo xixea, lekè yebe blibo sùsu màkpɔ ku ŋùkua ɖè Mawu be ŋusɛ̃ kòkòɖàbìa ku yebe Mawu nyinyia fiɔ ɖoa, ze peŋu lè ènu kèwo be ɖo, kèwo mè mi sèawo mè. Nène a, àgbètɔ ɖekpe mu gbà teŋu do tàflacɛ be yè mu nya ènu kèawo ò.

²¹ Togbɔ be wo jèsi Mawu cã a, wo mu nana ɛ̀ gogo kè jè a, àlo dona àkpe na ɛ̀ sìgbè lekè be jè a nène ò. Đo ekèa tèpea, ènu màɖè àlèwo ŋuti kpò wo bùnà. Susu mu gbà lè woa si ò, àleke be woabe èjìwo ci vìvìti mè.

²² Woa ŋutɔwo be yèwo nya ènu, vɔ̀a, wo zũ sùkunɔ̀wo.

²³ Gogo kè wo ɖo la sɔ na Mawu màkumàkua, wo sɔ le na àti kpàkpa ku kpèli kèwo ɖo àgbètɔ kè kunaa, èxèwo, èlã àfɔ̀ ènèwo, àlo èlã kèwo tana lè pòdo jiawo be nɔ̀nɔmè.

²⁴ Ekèa ŋuti ye Mawu ɖè àsi lè woa ŋuti na ènu kè jro woabe èjìwoa, eye wo sɔ woabe ŋutilã wɔ̀ àfɛ̃nu ku ŋùkpɛ̃nuwo kudo woa nɔ̀nɔwo.

²⁵ Wo sɔ àjèɖàɖa ɖɔ̀lì ku Mawu be nyàwo a, wo do ènu ègũ, eye wo sɛ̃ ènu kèwo Mawu ɖoawo ɖo ènuawo ɖotɔ kè nyi Mawu kè jè na gogo tɛ̀gbɛ̀a tèpe. * Àmèn!

²⁶ Ekèa ŋuti ye Mawu ɖè àsi lè woa ŋuti, eye èjro pòɖiwo ɖùnà woa ji, eye wo wɔ̀nà ŋùkpɛ̃nuwo. Woabe nyɔ̃nùwo dɔ̃na ku nyɔ̃nù buwo, ènu kè sitè ɖo jɔ̀jɔmè be ɖoɖowo ŋutia.

²⁷ Nène a ke ye, woabe ŋusùwo cã sitè ɖo jɔ̀jɔmè be ɖoɖowo ŋuti, gblena nyɔ̃nùwo ɖɛ, cina klìklìklì ɖo woa tɔ̀ ŋusùwo ŋuti, àleke be ŋusù ku ŋusù wɔ̀nà ŋùkpɛ̃nu. Ekèa ŋutia, wo xɔ̀nà woabe ènu dàda wɔ̀wɔwo be ètodɔ̃ sìgbè lekè be jè a nène lè woa ɖokoewo mè.

²⁸ Ekè mu jè ŋùmè na wo be woa xɔ̀ ènunya àdodoe kè kù ɖo Mawu ŋuti ɖo woa ɖokoe mè òa, Mawu cã ɖè àsi lè woa ŋuti ɖo woa ŋutɔwo be susu màsɔ̀gbèa mè, nènea wo wɔ̀nà ènu kèwo mu jè klua òa.

²⁹ Wo ɖɔ ku ènumàjɔ̀màjɔ wɔ̀wɔ sɔ̃ŋu, èvuɛ̃ jɔ̀jɔ, èŋù kɛ̃klɛ̃ ku èvuɛ̃ ji na àmè. Èbuwo cã nyi ŋùbìa, àmè wùwu, àjrè wɔ̀wɔ, àmè fùflu, ŋuhuã, ŋusù ku nyɔ̃nù be èjro pòɖiwo ku àmè gɔ̃mè ɖùɖu.

³⁰ Wo nyi àmènyagblɔ̃tɔwo, Mawu be kɛ̃tɔwo, ènyàjitɔwo, ègòyitɔwo, àdãkãtɔwo, àmè kèwo bùnà ènuvuɛ̃ wɔ̀wɔ be èmɔnu yeyewo ŋuti, àmè màsè ètonu na woabe àjìtɔwo;

³¹ àmè mànyanuwo, àmè kèwo mu wɔ̀nà ɖo woabe fiãfiãwo ji ò, àmè màku ŋuzĩzĩ na woa haviwo ku ètamèsɛ̃tɔwo.

³² Ekè wo nya nyuɛ̃ ɖe be, lè Mawu be èsea nua, àmè kèwo wɔ̀nà ènu kèawoa jè na èku cã a, wo wɔ̀nà wo, eye, sɔ kpe èa, wo dɔ̃na àmè kèwo cã wɔ̀nà ènu kèawoa ji.