Fìlipìtɔwo 1 - GƐ̃GBE BIBLIA 2014

Ègbè dodo

¹ Paolò ku Timòteo, Yesù Kristò be sumɔ̃viwo le ŋlɔ̀ xoma kèa ɖoɖa àɖèsãmewo keŋu lè Fìlipì, lè ɖèkawɔ̀wɔ mè kudo Kristò Yesù, na Fìlipì be èhamèa jikpɔtɔwo kudo àlɔ̀dotɔwo.

² Mawu mia Tɔ ku mia Tɔhonɔ̀ Yesù Kristò ne na mì màje kudo ŋuti fàfa.

Àkpedodo ku kuefã

³ Mù dona àkpe na Mawu nyè, wè sia wè, ne mù le ɖo ŋùkuvi mìa jia.

⁴ Gà ɖekpekpe gàmè, ne mù le fãkue ɖo mìa taa, mù fãna ɛ̀ ku jìjɔɛ.

⁵ Đo èmɔ kè nu mì do mi àlɔ̀ lè, na àŋɛ̀nyuɛ̃ a be kãkã, so ŋùkèkè cucugbãa ji, kaka va na fifìa ŋuti.

⁶ Mù kã ɖo ekèa ji be, Mawu, àmè kè tɔ èdɔ nyuɛ̃ kèa ji lè mìa dòmèa, la le è ɖotè, kaka na Yesù Kristò be tɔtrɔ va be àzãa gbè.

⁷ E sɔ̀gbè be, ma susu ekèa ɖo mìa keŋu ŋuti. Mìabe ènu lè èjì mè na mù, ɖo mì kpɔ gomè lè màje kè Mawu na mùa mè, egbè kè wo le mùa kudo gà kè mè mù vò sãa, lè ɖè kunù na àŋɛ̀nyuɛ̃ a kudo kãkã ɖo e jia.

⁸ Mawu nya be mù le to nyàwo, ekè mù le tɛ ègbè ɖo e ji be mù lɔ̃ mì ku Yesù Kristò be lɔ̃lɔ̃ a.

⁹ Kuefã nyèa ye nyi be: mìabe lɔ̃lɔ̃ ne dri kpe è, lè ènu mè kɔ̀kɔ blibo kudo nyanya àdodoe mè.

¹⁰ Ne mìa teŋu cã ènu kè nyi nyuɛ̃a. Nène a, mì la nyi àmè kɔ̀kɔ̀ɛ kèwo ŋuti wo mu la kpɔ àgɔ̀jènu ɖe lè ò, wàlɛbɛ kè Kristò la trɔvaa,

¹¹ eye mì la ɖɔ ku jɔ̀jɔɛnyinyi be èku kè sɛ̃na to Yesù Kristò jia, na Mawu be gogo kudo kafu.

Èkàdodo ku Kristò mè ye àgbè lè

¹² Nɔ̀viwo, mù jro be mìa nya be: ènu kè kpe mùa, jɔ̀ ɖo ji nyè, ne àŋɛ̀nyuɛ̃ a bèa yì ŋùkɔ̀.

¹³ Àmè kèwo lè kpɔ èfìɔsa jia, ku àmè kpɔ̀tɛawo kpata nya be Kristò be sumɔ̃vi kè mù nyia, ye ŋuti mù lè ègàkpa mè ɖo.

¹⁴ Àpe ègàkpa mè nɔ̀nɔ na be nɔ̀vi sùgbɔ gbà dojì ɖo Tɔhonɔ̀ ŋuti wu, àleke be wo le do Mawu be àŋɛ̀a ènu ɖekpe màvɔ̃.

¹⁵ Lè nyàwo toto mèa, àmè ɖewo lè woa dòmè, le do Kristò be àŋɛ̀a, lè ŋùbia kudo àjrè mè. Gãkea, àmè buwo le do è kudo èjro nyuɛ̃.

¹⁶ Àmè kèawo le do è kudo lɔ̃lɔ̃, ɖo wo nya be Mawu sɔ èdɔ do àsi na mù, be ma wɔ̀ àvũ na àŋɛ̀nyuɛ̃ a.

¹⁷ Àmè ŋuawo mu le do Kristò be àŋɛ̀a kudo nɔ̀nɔmè nyuɛ̃ ò. Wo le do è ku ŋùbìa, eye wo le susu be yèwo la na vevesèse nyèa la yì e ji, wàlɛbɛ kè mù kpɔ̀tɔ̀ lè ègàkpa mèa.

¹⁸ Nukɛ ye eŋuã wɔ̀ ò? Gãkea, lè èmɔ sia èmɔ nua, ne wo do àŋɛ̀a lè susu vlo mè, àlo lè nyàwo toto mèa, Kristò kpò ye nyi àŋɛ̀ kè wo le do a. Ye ŋutia, èjì jɔ̀ mù.

¹⁹ Mù kã ɖo e ji be, ekèa la nyi àpe hlùɛ̃gã, to mìabe kuefãwo kudo Yesù Kristò be Gbɔ̃gbɔ̃ be àlɔ̀do mè.

²⁰ Àpe èjro veve, kudo àpe ŋùɖo ye nyi be èŋù mu la kpɛ̃ mù ò, vɔ̀a, àpe kãkã ɖo e ji lè blibo fifì, sìgbè lekè be lè gà sia gàmèa nène, eye wo la kafu Kristò lè àpe àmèti bliboa mè, lè àpe àgbè nɔ̀nɔ mè loo, àlo lè àpe èku mè.

²¹ Đo a, lè tɔ̀ nyè gomè yaa, àgbè nɔ̀nɔ nyèa, Kristò ye, eye èku nyi àlè na mù.

²² Vɔ̀a ne àgbè nɔ̀nɔ nyè, lè ŋutilã mè na èdɔ nyè sɛ̃ èkua, nyè mu nya ekè mù la cã lè e mè ò.

²³ Mù jã lè èvè dòmè: e jro mù be ma yì Kristò gbɔ; ekèa nyɔ na mù wu.

²⁴ Vɔ̀ gãkea, ɖo mìa ŋutia, e gbà nyɔ be ma kpɔ̀tɔ̀ nɔ̀ àgbè.

²⁵ Mù nya, eye mù ɖo jìdo be mù la nɔ̀ ànyi, mù la nɔ̀ mìa gbɔ, na mìabe ŋùkɔ̀yìyi, na mìabe jìjɔɛ lè xɔ̀sè mè.

²⁶ Nène a, ne mù gbìgbɔ̀ trɔ va mìa dòmèa, ɖo ŋuti nyèa, mì la kpɔ èmɔ la go lè mìabe àgbè nɔ̀nɔ ku Yesù Kristò mè.

²⁷ Vɔ̀a mì nɔ̀ àgbè kè la sɔ̀ kudo Kristò be àŋɛ̀nyuɛ̃ a, àleke be, ne mù va kpɔ mì loo, àlo ne nyè mu va òa, ma sè so mìa ŋuti be mì lètè goŋu-goŋu, lè èdu nɔ̀nɔ be susu ɖèka mè, be mì le wɔ̀ àvũ ɖodu kudo èjì ɖèka lè xɔ̀sè, kè àŋɛ̀nyuɛ̃ a nana a mè.

²⁸ Mì mu gbà na ènu kè àmè kèwo sitè ɖo mìa ŋutia, wo le wɔ̀a, ne do vɔ̃vɔ̃ na mì ò. Mì dojì; ekèa nyi jèsìdo be wo le yì cɔ̃crɔ̃ mè, be mìa yaa, mì lè àmè hlùɛ̃gã be èmɔ ji, eye ekèa so Mawu gbɔ.

²⁹ Đo a, Mawu be àdɔ̀mènyuɛ̃ kè be wɔ̀ na mìa, mu nyi be mìa xɔ̀ Kristò ji sè ɖèɖe kpò ò. Vɔ̀a be mìa ɖù àyà cã ɖo e ta.

³⁰ Fifìa, mì le wɔ̀ àvũ. Àvũ kèa ye mì kpɔ, mù wɔ̀ va yì. E ye ji ke mì nya be mù gbà lè.