Filemɔ̀n 1 - GƐ̃GBE BIBLIA 2014

Ègbè dodo

¹ Ènyè Paolò, àmè kè wo le do ègàkpa mè ɖo Kristò Yesù ŋutia, ku mìa nɔ̀vi Timòteo gbɔ ye xoma kèa so. Mi le ŋlɔ̀ ɛ̀ ɖoɖa èwò, Filemɔ̀n, miabe èhadɔwɔ̀tɔ ɖève, mia nɔ̀vi nyɔ̃nù Apia, miabe èhadɔwɔ̀tɔ, Arkìpò

² ku èhamè kè bɔ̀nà lè àpo àxomèa.

³ Mawu, mia Tɔ ku Tɔhonɔ̀ Yesù Kristò ne ku ŋuzĩzĩ na mì eye bèa na mì màje kudo ŋuti fàfa.

Filemɔ̀n be lɔ̃lɔ̃ ku xɔ̀sè

⁴ Ne mù gbe le fãkue kpòa, mù ɖona ŋùku ji wò, eye mù dona àkpe na Mawu nyè wè sia wè.

⁵ Mù wɔ̀nà ekèa, ɖo mù sè be wò lɔ̃ Tɔhonɔ̀ Yesù, eye wò xɔ̀ e ji sè, eye wò lɔ̃ àɖèsãmewo kpata.

⁶ Mù le fãkue be xɔ̀sè kè bla mi ɖodua, bèa sɛ̃ŋu ɖo e ji na wò, àleke be mia ɖè ènu nyuɛ̃ kèwo lè ɖèkawɔ̀wɔ kudo Kristò mèawo fìɔ.

⁷ Nɔ̀vi nyè, mù kpɔ jìjɔɛ, eye àpe èjì jè e mè, ɖo àpo lɔ̃lɔ̃ na be àmè kèwo ŋuti wo kɔ̀awo kpɔ àgbɔ̃ jèpo.

Paolò ɖè kuku ɖo Onesimɔ̀ ta

⁸ Ye ŋutia, mù kpɔ èmɔ lè Kristò mè, la gblɔ̃ ènu kè e jè be wòa wɔ̀a na wò,

⁹ gãkea, ɖo lɔ̃lɔ̃ ŋutia, e jè be ma ɖè kuku na wò bòhũ. Ɛ̃ɛ, ènyè Paolò, àmè sĩsĩ kè nyi Kristò Yesù be *àmèdɔ̃dɔ̃, eye mù lè ègàkpa mè fifì ŋutɔ cã ɖo Yesù Kristò ŋutia,

¹⁰ mù le ɖè kuku ɖo èvi nyè Onesimɔ̀ ta. Đo mù va zũ ètɔ na ɛ̀, wàlɛbɛ kè mù lè ègàkpa mèa.

¹¹ Sãa, mu ɖè àlè ɖekpe na wò ò; vɔ̀ fifìa, e ɖè àlè na ènyè kudo èwò cã.

¹² Mù trɔ ɛ̀ le ɖoɖa wò. E wɔ̀ na mù sìgbè nyè ŋutɔ àpe èjì ye mù le dɔ̃ ɖoɖa wò nène.

¹³ E jro mù be ne ci gbɔ nyè, bèa nɔ do mù àlɔ̀, ɖo tèpe wò, wàlɛbɛ kè mù lè ègàkpa mè ɖo àŋɛ̀nyuɛ̃ a ŋutia.

¹⁴ Vɔ̀ nyè mu ji be ma zĩ ji wò, gbɔ̀xue wòa do mù àlɔ̀ ò. Mù ji be wòa wɔ̀ ɛ̀ kudo èjì fàa. Ye ŋuti nyè mu la wɔ̀ ènu ɖekpe kè mu nyi àpo èjro ò.

¹⁵ Èta mu nyɔ òa, ènu kè ŋuti Onesimɔ̀ jo lè gbɔ wò na hùenu vi ɖe a, ye nyi be e yomè a, bèa trɔ gbɔ̀ va nɔ̀ gbɔ wò tɛ̀gbɛ̀.

¹⁶ Fifìa, mu nyi kluvi gbalo kpò be gbà nyi ò, vɔ̀ bòhũa, e zũ àmè tɔ̀xɛ wu kluvi. E trɔ zũ nɔ̀vi ɖève, vevetɔa, na ènyè ŋutɔ. Vɔ̀a e gbà lè veve ɖe na wò ya wu, ɖo e nyi àpo kluvi, gbà nyi nɔ̀vi wò lè Kristò mè.

¹⁷ Nène a, ne wò bùnà mù sìgbè èxlɔ̃ nènea, eŋuã, xɔ̀ ɛ̀ àtuu, sìgbè àlekè wò la xɔ̀ nyè ŋutɔa nène.

¹⁸ Ne e nyi be e jè àgɔ̀ ɖe do wò, àlo e ɖù èfɛ̃ ɖe do wòa, bù ì na mù.

¹⁹ Ènyè Paolò ŋutɔ ye sɔ àpe àlɔ̀ ŋlɔ̀ ekèa be: mù la tu èfɛ̃a. Sĩ vɔ̀ a, nyè mu ji be ma ɖo ŋùku e ji na wò, be wò ŋutɔ cã wò ɖù ɖokoe wò be èfɛ̃ do mù ò.

²⁰ Nɔ̀vi nyè, ɖo ekèa ŋutia, na ma kpɔ àlɔ̀do vi ɖe so gbɔ wò, lè Tɔhonɔ̀a ŋuti jro. Na àpe èjì ne jè e mè lè Kristò mè.

²¹ Mù le ŋlɔ̀ xoma kèa ɖoɖa wò ku kãkã ɖo e ji be wò la ɖo èto mù, eye mù nyã nyuɛ̃ ɖe be, wò la wɔ̀ wu àlekè mù biɔ so àsi wòa ŋutɔ cã,

²² Sɔ yì e jia, jè àgbàgba ne wòa ji zɛ̃pe ɖe ɖɛ na mù, ɖo mù lè ŋùɖo mè be Mawu la ɖo mìa kpata mìabe kuefãwo ŋuti, eye be la na mù la gbɔ̀ va mìa gbɔ.

Ègbè dodo mlɛ̃awo

²³ Epafrà, àmè kè cã lè gàxɔ mè kudo mù ɖo Kristò Yesù ŋutia, do ègbè na wò.

²⁴ Nène a ke ye, àpe èhadɔwɔ̀tɔwo Markò, Aristarkò, Demas ku Lukà cã do ègbè ɖoɖa wò nyuɛ̃ ɖe.

²⁵ Mia Tɔhonɔ̀ Yesù Kristò be màje ne nɔ̀ ku mì.