Òzeà 1 - GƐ̃GBE BIBLIA 2014

¹ Tɔhonɔ̀ be ègbèa ɖì na Òzeà, Berì be èvi, wàlɛbɛ kè Yeroboam, Yòas be èvia nyi Izràɛl be èfìɔa. Gà ŋua mè gbà le nyi Yudà be èfìɔwo: Òzias, Yotàm, Àkaz kudo Èzekìas be gàmè.

Òzeà be xòmèa

² Kpɔɖa, àlekè Tɔhonɔ̀ tɔ nupo pòpo na yebe dùkɔ̃a to Òzeà ji, le gblɔ̃ na ɛ̀ be: “Yì ne wòa ɖè nyɔ̃nù àhasìtɔ ɖe; ɖèvi kèwo be la jì na wòa la nyi àhasìviwo. Ɖo dùkɔ̃a le wɔ̀ àhasì lè vòduwo be sɛ̃sɛ̃ mè eye e ŋlɔ̀be ènyè Tɔhonɔ̀a.”

³ Nène a ye Òzeà yì ɖè Gòmer, Diblàyim be èvi nyɔ̃nù. E jì èvi ɖèka na ɛ̀.

⁴ Tɔhonɔ̀ gblɔ̃ na ɛ̀ be: “Ɖo nyikɔ na ɖèvia be Yizrɛ̀l ɖo mù la va sɔ̀sɔɛɖe kèa la biɔ àkɔ̃ŋùta Yehù be àxuea so èhlɔ̃dãdã kè jɔ̀ lè Yizrɛ̀l va yìa ŋuti. Mù la crɔ̃ fìɔɖùɖu lè Izràɛl.

⁵ Gbè ŋua gbèa, mù la ŋɛ̃ Izràɛl be àhùakɔ̃a be ŋusɛ̃ lè Yizrɛ̀l be bàlìa mè.”

⁶ Gòmer gbà fɔ èfu. E jì nyɔ̃nùvi ɖèka. Tɔhonɔ̀ gblɔ̃ na Òzeà be: “Wò la yɔ ɛ̀ be “Lɔ̃lɔ̃ màsù”. Nyàwoa, nyè mu la gbà ɖè lɔ̃lɔ̃ nyè fiɔ Izràɛlviwo ò. Nyè mu la gbà lɔ̃ wo ɖe ò.

⁷ Mù la kpɔ domè na Yudà be àxuea. Ènyè Tɔhonɔ̀, woabe Mawu a, mù la hlùɛ̃ wo gã. Nyè mu la zã àŋùdàti àlo èwui ò. Mu la nyi to àhùa mè kaka la nyi ku èsɔ kudo èsɔdotɔwo ò.”

⁸ Kè e sò ànɔ na Lɔ̃lɔ̃ màsùa, e gbà fɔ èfu. E jì ŋusùvi ɖèka.

⁹ Eye Tɔhonɔ̀ gblɔ̃ na Òzeà be: “Wò la yɔ ɛ̀ be 'Àmèjro-dù' ɖo mì Izràɛlviwo mì mu gbà nyi àpe dùkɔ̃ ò. Nyè mu gbà nyi ènu ɖe na mì ò.”