Obadìa 1 - GƐ̃GBE BIBLIA 2014

¹ OBADÌA be àvìmènu kpɔkpɔ. Ènyà kè Tɔhonɔ̀ Mawu gblɔ̃ so Edɔ̀m be èdùa ŋutia ye nyi ekèa. Mì sè ènyà kè so Tɔhonɔ̀ gbɔ eye àtikplɔtɔa sɔ yì dùkɔ̃ pòpuawo mèa be: “Sitè! Ne wòa ɖè àhùa kpe na èdùa! Yì sɔ àhùa ɖo e ŋuti!”

Edɔ̀m be èdùa be gbãgbã

² “Ɛ̃ɛ, ma ɖiɖi wò lè dùkɔ̃wo dòmè! Àmè sia àmè la crì wò kaɖi kaɖi.

³ Ègòyiyi mà-ɖo kɔpe wòa ye le blè wò. Èwò kè sò kɔpe ɖo àkpãwo be dòdòmè ke eye wò nɔ̀nà fikè wo mu teŋu kè ɖo ŋuti wò lè kaba òa; eye wò gblɔ̃nà lè ɖokoe wò mè be: “Àmè kɛ la teŋu kpe ji nyè ò?”

⁴ Ne wò gbà le zrò sìgbè èhɔ̃ nène ŋutɔ cã eye wò yì ɖo àtɔ̃ɛ ɖo wètriviwo mè ŋutɔ cã, mù la ɖiɖi wò so kaka funua ke! Tɔhonɔ̀ ye gblɔ̃ ɛ̀.

⁵ Nyàwo! Ne fìãfìwo va kɔ̀ ɖo ji wò, èzã mè be èhɔ̃gbãtɔwo, eye wò bɔ̀nu kpoa, wo mu la lɔ ènu kèwo keŋu wo teŋuã? Ne vɛ̃kusɛ̃sɛ̃-fiɔ̃lawo gɛ̃ ɖo àpo vɛ̃-gble mèa, wo mu la gble ènu ɖe ɖɛ sɔ wu vɛ̃kpowo ò.

⁶ Nène a ye wo la fɔtɔ mì Esaò be jìjimèviwo. Mìabe àdɔ̀kùnu wawlawo la to va gàglàgbè.

⁷ Wo la nyà wò lè ànyigbã wòa ji ɖo àpo èhadodowo la sà wò; àmè kèwo nyi èhlɔ̃ wòwo la sɔ wò wɔ̀ kluvi. Àpo èhadodo xoxowo la tre èmɔ̃ na wò. Ɖo wo le gblɔ̃ be: “Susu ɖɔ̀hũi ɖe cã mu gbà lè e si ò.”

⁸ Tɔhonɔ̀ gblɔ̃ be: Àzã ŋua ji ye mù la crɔ̃ ènunyatɔwo lè Edɔ̀m eye mù la ɖè ènunya jo lè Esaò be ètoa ji.

⁹ Oò Temàn be èdù! Àpo kãlìsuwo la ɖo tìtɔ̀titɔ gã ɖe mè, ɖo wo la wù àpo ŋusùtiwo kpata.

Edɔ̀m nyigbã be ànyi jèje

¹⁰ Ɖo mì wɔ̀ ènuvuɛ̃ ɖo mìa nɔ̀vi Yakɔb be jìjimèviwo ŋuti. Ekèa na be mì la ɖɔ kudo ŋùkpɛ̃. Eye, wo la crɔ̃ mì gbidi-gbidi.

¹¹ Wàlɛbɛ kè yebe kɛ̃tɔwo ɖè yebe àhùakɔ̃a ɖo ènu eye wo xɔ̀ yebe èdùa, mì kpɔ ye tèpe lè jìjɔɛ mè. Wàlɛbɛ kè ye àmèjroawo ma Yèruzàlɛm be àdɔ̀kùnuwoa, mìa cã mì nɔ̀ woa dòmè.

¹² Wò mu la kè kpɔ jìjɔɛ wàlɛbɛ kè ye nɔ̀vi wò Yudàviwo lè ŋuzĩzĩ mè ò. Yebe glìkpowo mu ɖo la nɔ do ènukòkoe na wò kaka ye wò la ji la zũ wo lè ènuxàxa mè ò.

¹³ Wò mu la kè yì yebe ànyigbã ji lè cɔ̃crɔ̃ be hùe ŋua nu ò. Yebe vuɛ̃ mu la do jìjɔɛ na wò kaka ye wò la yì lɔ yebe àdɔ̀kùnuwo ò.

¹⁴ Wò mu ɖo la yì do èxa, sɔ wù yebe àmè kèwo teŋu sia, àlo trɔ ɖè wo do àsi na yebe kɛ̃tɔwo lè ŋùkèkè vuɛ̃ ŋuawo ji ò.

¹⁵ Ɛ̃ɛ ɖo ŋùkèkè kè ji ye Tɔhonɔ̀ la ɖo kòjo na dùkɔ̃wo kpataa, gogo. Wo la wɔ̀ kudo wò sìgbè àlekè wò cã wò wɔ̀ kudo wo va yìa nène. Wò la xɔ̀ ènu kè wò wɔ̀a be fɛ̃tu ɖɔɖɔ.”

Izràɛl be jiɖùɖu ŋùkèkè

¹⁶ “Ɛ̃ɛ, kè e nyi be mìa Izràɛlviwo, mì ɖɔ àdɔ̀mèze nyèa kpɔ lè èto kɔ̀kɔ̀ɛ nyèa ji kpɔ vɔ̀a, èdùkɔ̃ kpɔ̀tɛawo kpata la ɖɔ ɛ̀ kpɔ kaka e la te woa ŋuti, eye wo la crɔ̃ keŋu-keŋu.

¹⁷ Vɔ̀a, Ziɔ̀n be èto kè mù la kpã ŋùkɔ̀a ji ye àmè kèwo la kpɔ̀tɔ̀a la si va yì ci. Yakɔb be àxuedo a la trɔ xɔ̀ ènu kèwo keŋu wo xɔ̀ lè woa si sãa.

¹⁸ Yakɔb be àxuedo a la trɔ sìgbè èzò nène eye Yosɛ̀f be àxuedo a la trɔ sìgbè èzò be àɖe nène. Eye wo la bì Esaò be àxuedo a la fiɔ̃ ɛ̀ sìgbè ègbe pupu nène. Esaò be jìjimèvi ɖekpe mu la kpɔ̀tɔ̀ ò. Nène a ye Tɔhonɔ̀ gblɔ̃ yeŋu.”

Ènyà mè ɖèɖe

¹⁹ Eye Yudà be àxuedo a la xɔ̀ Esaò be ètoa kpata lè àpùgo. Àmè kèwo lè gbàjà jia, la xɔ̀ Filistìtɔwo be ànyigbã. Izràɛlviwo la xɔ̀ Efràyim kudo Sàmarìa be ànyigbãwo eye Bɛnyamìn be àxuedo a la xɔ̀ Gilead-nyigbãa.

²⁰ Izràɛlvi kèwo si àhùa yì èvègoa, lè sìgbè àhùakɔ̃ nène. Wo la nɔ̀ Kanàn-nyigbã ji kaka kɔ̀ ɖo Sàrɛptà. Yèruzàlɛmvi kèwo si àhùa yì ci Sèfaràd-nyigbã jia, la xɔ̀ èdù kèwo lè àpùgoa.

²¹ Eye àmè kèawo kpata la nɔ̀ Ziɔ̀n be ètoa ji sɔ kplɔ̀ Esaò be èdùa. Eye Tɔhonɔ̀ ŋutɔ la kplɔ̀ yebe fìɔdua.