Markò 1 - GƐ̃GBE BIBLIA 2014

Yòhanɛ̀s Mawusilènamètɔa be èdɔwɔ̀wɔ

¹ Àfi kè àŋɛ̀nyuɛ̃ kè pò nupo so Yesù Kristò Mawu be Èvia ŋutia tɔ e ji soa, ye nyi ekè.

² Wo ŋlɔ̀ ɖo gblɔ̃ɖɛtɔ Ezayà be xoma mè be: “Kpɔɖa, mù le dɔ̃ àpe àŋɛ̀dotɔa ɖoɖa wò, ne bèa jè ŋùkɔ̀ na wò, bèa jrà èmɔ ɖo na wò.

³ Ègbè ɖe le ɖì lè zògbèa ji be: 'Mì jrà èmɔ ɖo na Tɔhonɔ̀, mì jɔ̀ èmɔ kèwo ji be la toa!'”

⁴ Yòhanɛ̀s Mawusilènamètɔa lè zògbèa ji, le do èdɛ̃ɖɔ̀li be mawusilèle be àŋɛ̀a na nuvuɛ̃wo be sɔsɔkè.

⁵ Yudeatɔwo ku Yèruzàlɛmtɔwo kpata yìnà Yòhanɛ̀s gbɔ. Wo hũnà woabe nuvuɛ̃wo mè na ɛ̀, eye e lènà mawusi na wo, lè ètɔ̀ sàsra kè wo yɔna be Yɔrdàn a mè.

⁶ Yòhanɛ̀s dona àwù kè wo sɔ èsɔ-kponɔ̀ be èfu wɔ̀a, blana ègo ji ku èlãgbàze. E ɖùnà hùesuviwo, nùnà ègbe nyisì.

⁷ E tona mawunya na àmèwo, gblɔ̃nà na wo be: “Àmè kè gbãnà lè yo nyè mèa, wu mù. Nyè mu jè la bɔ̀bɔ̀, la tu yebe àfɔ̀kpawo be èkàwo ŋutɔ cã ò.

⁸ Èsì ye ènyè yaa, mù sɔ le lè mawusi na mì. Vɔ̀a, e yaa, Gbɔ̃gbɔ̃ Kɔ̀kɔ̀ɛ ye be la sɔ lè mawusia na mì.”

Yòhanɛ̀s lè mawusi na Yesù

⁹ Lè àzã ŋuawo jia, Yesù so Nazarɛ̀t, kè lè Galilea nyigbã jia, va Yòhanɛ̀s gbɔ, eye Yòhanɛ̀s lè mawusi na ɛ̀, lè Yɔrdàn be ètɔ̀ sàsraa mè.

¹⁰ Wàlɛbɛ kè Yesù le to lè ètɔ̀a mèa, jiŋùkusi hũ eye Gbɔ̃gbɔ̃ Kɔ̀kɔ̀ɛ a lè sìgbè àhɔ̃ne nène, ɖì ɖo e ji.

¹¹ Ègbè ɖe ɖì so jiŋùkusi, gblɔ̃ be: “Èwò ye nyi Èvi nyè ɖève a, mù sɔ jìjɔɛ nyè keŋu ɖo èwò mè.”

Satana tè Yesù kpɔ lè zògbè ji

¹² Eŋuã yomè a, Gbɔ̃gbɔ̃ a kplɔ̀ ɛ̀ yì zògbè ji, àfi kè àmè ɖe mu lè òa.

¹³ E nɔ̀ funua, ŋùkèkè èkà eye Satana tè è kpɔ. E nɔ̀nà ègbemèlãwo dòmè, eye Mawu be àtikplɔtɔwo sumɔna ɛ̀.

Yesù yɔ èɖɔkplɔ̀tɔ ènè

¹⁴ Kè wo le Yòhanɛ̀s do-gà vɔ̀a, Yesù yì Galilea. E le do Mawu be àŋɛ̀nyuɛ̃ a le gblɔ̃ be:

¹⁵ “Hùenua va ɖo vɔ̀. Mawu be fìɔɖùɖua cã lili. Mì ɖɔ̀lì èdɛ̃, ne mìa xɔ̀ àŋɛ̀nyuɛ̃ a ji sè.”

¹⁶ Yesù le zɔ̃ Galilea be ètɔ̀a to, va le yì gbè ɖèka. E kpɔ Simɔ̀n ku nɔ̀via Ãdre le dà èɖɔ, ɖo èɖɔkplɔ̀tɔwo ye wo nyi.

¹⁷ E gblɔ̃ na wo be: “Mì jè yo nyè mè, mù la wɔ̀, mì la nyi àgbètɔ kplɔ̀tɔwo.”

¹⁸ Eye, zè ɖèkaa, wo gble woabe èɖɔwo ɖɛ, eye wo jè e yomè.

¹⁹ Kè Yesù gbà zɔ̃ yì ŋùkɔ̀ vi ɖe a, e kpɔ Zebedeo be èvi èvè, Yakobò ku nɔ̀via Yòhanɛ̀s. Wo lè ètɔ̀jihũ mè, le tɔ̃ woabe èɖɔwo.

²⁰ Yesù yɔ wo, eye wo gble woa tɔ Zebedeo ku èɖɔkplɔ̀tɔwo ɖo ètɔ̀jihũa mè, eye wo jè Yesù yomè.

Ŋusù kè gbɔ̃gbɔ̃ vuɛ̃ le do nupo na a

²¹ Yesù ku yebe nukplaviwo yì Kapɛrnaum. Lè jɛ̃gbɔ̃zã gbèa, Yesù yì bɔ̀bɔ̀pe ɖe, le fiɔ ènu àmèwo.

²² Àmè kèwo le ɖo èto èa, wo kã yaa, lè yebe ènufiɔfiɔ ŋuti, ɖo mu lè sìgbè ènuŋlɔ̀tɔwo nène ò; vɔ̀ bòhũa, e fiɔna ènu ku àcɛ̀.

²³ Gà ŋua mèa, ŋusù ɖe kè gbɔ̃gbɔ̃ vuɛ̃ ɖe le ɖè èfũ na a, lè bɔ̀bɔ̀pea. E tɔ àpa dodo be:

²⁴ “Yesù Nazarɛttɔ̀! Nukɛ ye lè mia ku èwò dòmè ò? Wo va la crɔ̃ mi ye à? Mù jèsi àmè kè wò nyia nyuɛ̃ ɖe. Èwò ye nyi Mawu be àmè Kɔ̀kɔ̀ɛ a.”

²⁵ Yesù blù veve ɖe ɖo gbɔ̃gbɔ̃ vuɛ̃ a ji be: “Bɔ̀nu lè funu, ne wòa to lè ŋusù kèa mè.”

²⁶ Eye gbɔ̃gbɔ̃ vuɛ̃ a hũhũ ŋusùa sɛ̃sɛ̃ ɖe. E do àpa gãa ɖe, eye be to lè ŋusùa mè.

²⁷ Ènu kèa kpaca àmè kèwo lè funua kpata, eye wo biɔ woa nɔ̀nɔwo be: “Nukɛ ye nyi ekèa ò? Ènufiɔfiɔ yeye bu ye nyi ekèa. E ɖènà ègbè ku àcɛ̀ ɖo gbɔ̃gbɔ̃ vuɛ̃wo ji, eye gbɔ̃gbɔ̃ vuɛ̃awo sènà ètonu na ɛ̀.”

²⁸ Yesù be nyikɔ gbãkpe Galilea nyigbãa keŋu ji.

Yesù dà èdɔ̀ na àmèwo lè jɛ̃gbɔ̃zã gbè

²⁹ Kè Yesù to lè bɔ̀bɔ̀pea, ye ku Yakobò kudo Yòhanɛ̀s yì Simɔ̀n ku Ãdre be àxomè.

³⁰ Àvìvɔ le wɔ̀ Simɔ̀n Petrò be lɔ̃xo, eye be mlɔ̃ ànyi. Kè Yesù le ɖo àxuea mè troloa, wo to è na ɛ̀.

³¹ Yesù gogo èdɔ̀nɔ̀a, e le àlɔ̀ na ɛ̀, sɔ ɛ̀ sitè. Àvìvɔa jo lè e ji zè ɖèka, eye be xɔ̀ Yesù ku yebe nukplaviwo àmèjro.

³² Wètrɔ mè, wàlɛbɛ kè èwè ɖoxɔ̀ vɔ̀a, àmèwo kplɔ̀ èdɔ̀nɔ̀wo ku àmè kèwo gbɔ̃gbɔ̃ vuɛ̃ le ɖè èfũ na a kpata va Yesù gbɔ.

³³ Èdùamètɔwo keŋu va bɔ̀ ɖo àxue kè mè Yesù lèa be àgbo ji.

³⁴ Yesù dà èdɔ̀ vòvòvòwo na èdɔ̀nɔ̀ sùgbɔ, eye be nyà gbɔ̃gbɔ̃ vuɛ̃ sùgbɔ to. Vɔ̀a, mu na èmɔ gbɔ̃gbɔ̃ vuɛ̃awo be woa pò nupo ò, ɖo wo jèsì àmè kè be nyia.

Yesù do àŋɛ̀a lè Galilea be èdùwo mè

³⁵ Ŋùdekɛ̃nyɛ fùtùu, gbɔ̀xue xixea mè la kɔ̀a, Yesù to lè èdùa mè, yì àfi kè àmè ɖe mu lè òa, eye be le fãkue lè funua.

³⁶ Simɔ̀n ku àmè kèwo bɔ̀ ɖo e ŋutia, wo jè Yesù yomè, le ji ì.

³⁷ Kè wo kpɔ ɛ̀a, wo gblɔ̃ na ɛ̀ be: “Àmè sia àmè le ji wò.”

³⁸ Vɔ̀a, Yesù ɖo e ŋuti na wo be: “Mì na ne mia jo lè fikèa, yì àfi bu, lè kɔpe kèwo gogo fikèa mè, ne ma yì do àŋɛ̀nyuɛ̃ a lè funuawo cã, ɖo ènu kèa ŋuti mù to ɖo.”

³⁹ Eye e to Galilea nyigbãa keŋu ji. E dona àŋɛ̀a lè bɔ̀bɔ̀pewo, nyànà gbɔ̃gbɔ̃ vuɛ̃wo to le àmèwo mè.

Yesù dà èdɔ̀ na èkpònɔ̀ ɖe

⁴⁰ Èkpònɔ̀ ɖe va jè èklò ɖo Yesù be ŋùkɔ̀, le ji be ne kpe ɖo yè ŋuti. E gblɔ̃ na ɛ̀ be: “Ne wò jro a, wò teŋu dà èdɔ̀ na mù.”

⁴¹ Yebe ènu wɔ̀ ŋuzĩzĩ na Yesù, eye Yesù drɛ̃ àlɔ̀ tɔ ɛ̀ àsi, gblɔ̃ na ɛ̀ be: “Mù jro, àpo èdɔ̀a ne vɔ̀.”

⁴² Èkpòa bu lè ŋusùa ŋuti zè ɖèka, eye yebe ŋuti kɔ̀.

⁴³ Yesù do *èse na ɛ̀ veve ɖe, eye be ɖo è ɖoɖa.

⁴⁴ E gblɔ̃ na ɛ̀ be: “Mù gbà gblɔ̃ na àmè ɖe ò. Vɔ̀a, yì sɔ ɖokoewo fiɔ mawunɔa, ne wòa na ènu kè Mosè be *èse gblɔ̃a. Nène a, wò la ɖè è fiɔ àmè sia àmè be wo dà èdɔ̀ na wò.”

⁴⁵ Ŋusùa jo, vɔ̀a, e tɔ ènu kè Yesù wɔ̀ na ɛ̀a gbɔ̃gblɔ̃ lè àfi sia àfi. Eŋuã ŋuti ye Yesù mu gbà teŋu ɖona èdùwo mè, la ɖè yeɖokoe fiɔ ò. Vɔ̀a, E nɔ̀nà àzɔ̀ge, lè àfi kè àmè ɖe mu lè òa, eye àmèwo sona àfi vòvòvòwo vana e gbɔ.