Hebrùwo 1 - GƐ̃GBE BIBLIA 2014

Mawu be ènyàa to Mawu be Èvia ji va

¹ Sã xoxoa, Mawu pònà nupo na mia tɔgbewo, eji-eji lè èmɔ hamèhamèwo nu, to yebe gblɔ̃ɖɛtɔwo ji.

² Vɔ̀ fifì, lè ŋùkèkè mlɛ̃ kèawo jia, e pò nupo na mi to Èvia ji. Mawu ɖo xixea to e ji, eye e ɖo è ècrɔ̃ɖùtɔ lè ènuwo keŋu nu.

³ Àmè kè le ɖè yebe Mawu nyinyi be gogoa be kɛ̃klɛ̃ fiɔa, e sɔ yebe ènyàa be ŋusɛ̃ le xixea ɖotè. Eye ekè e lè àgbètɔwo ɖì so woabe èvuɛ̃wo mè vɔ̀a, e nɔ̀ ànyi lè jiŋùkusi lè Mawu Èfìɔ ŋusɛ̃kpatatɔa be ɖùsi mè.

Mawu be Èvia wu àtikplɔtɔwo

⁴ Mawu na Èvia wu gã àtikplɔtɔwo, ɖo nyikɔ kè be na èa wu woa tɔ̀.

⁵ Đo Mawu mu gblɔ̃ na àtikplɔtɔ ɖe kpɔ be: “Wò nyi èvi nyè, mù jì wò egbè” ò. Sɔ yì e jia: “Mù la nyi ètɔ na ɛ̀, e la nyi èvi na mù.”

⁶ Vɔ̀ wàlɛbɛ kè Mawu le dɔ̃ yebe Ŋùkɔ̀gbevia ɖoɖa xixea mèa, e gblɔ̃ be: “*Àtikplɔtɔ nyèwo kpata ne sumɔ ɛ̀.”

⁷ Kù ɖo àtikplɔtɔwo ŋutia, e gblɔ̃ be: “Mawu sɔ àtikplɔtɔwo wɔ̀ àya. E wɔ̀ sumɔ̃viwo èzò be àɖewo.”

⁸ Vɔ̀ na Èvia a, e gblɔ̃ be: “O! Mawu, èfìɔzìkpe wòa la nɔ̀ ànyi kaka sɔ yì. Wò le ɖùfìɔ lè jɔ̀jɔɛwɔ̀wɔ mè.

⁹ Wò lɔ̃ ènu jɔ̀jɔɛ eye wò crì ènu vuɛ̃, ènu kèa ŋuti Mawu, àpo Mawu, ɖè wò ɖovò, kɔ̀ jìjɔɛ be àmì ɖo èta na wò. Èwò ye be cã lè hati wòwo dòmè.”

¹⁰ E gbà gblɔ̃ be: “Èwò Tɔhonɔ̀ ye ɖo ànyigbã so gɔ̃mèjèje a, eye jiŋùkusi nyi àpo àlɔ̀nu dɔ.

¹¹ Ènu kèawo la crɔ̃, vɔ̀ èwò yaa, wò lè. Èji kudo ànyigbã la doxo, sìgbè àvɔ xoxo nène.

¹² Wò la ŋlɔ̃ wo sìgbè àwù gã nène, eye wo la ɖɔ̀lì wo sìgbè àvɔ nène, vɔ̀, èwò yaa, ɖèka kpò wò lè, eye àpo àgbè nɔ̀nɔ mu ɖo ènuwuwu ò.”

¹³ Mawu mu gblɔ̃ na yebe àtikplɔtɔwo dòmètɔ ɖe kpɔ be: “Va bɔ̀bɔ̀ nɔ̀ ànyi lè àpe ɖùsi mè, kaka ma sɔ kɛ̃tɔ wòwo wɔ̀ àpo àfɔ̀ɖojinu” ò.

¹⁴ Eŋuã, nukɛ Mawu be àtikplɔtɔwo nyi ò? Gbɔ̃gbɔ̃ ye wo nyi, lè sumɔ Mawu; eye be dɔ̃na wo ɖoɖa, be woa do àlɔ̀ àmè kèwo ɖo la ɖù hlùɛ̃gã be ècrɔ̃a.