Ɛzrà 1 - GƐ̃GBE BIBLIA 2014

Sìrus na ègbè be woa trɔ tù mawuxɔa

¹ Lè Persìa be èfìɔ Sìrus be èfìɔɖùɖu be èpè cucugbãa mèa, Tɔhonɔ̀ ɖo e be ènyà kè yè gblɔ̃ to gblɔ̃ɖɛtɔ Yeremìa jia ne zɔ̃ sùu. E na èfìɔ Sìrus susu be ne gblɔ̃, gbà ŋlɔ̀ ènyà kèawo lè yebe fìɔdua kpata mè.

² Ènyà kè èfìɔ Sìrus gblɔ̃a ye kè: “Tɔhonɔ̀ jiŋùkusi be Mawu a sɔ ànyigbã ji be fìɔduwo kpata do ŋusɛ̃ nyè gɔ̃mè. E biɔ so àsi nyè be ma yì tù mawuxɔ ɖo Yèruzàlɛm, lè Yudà nyigbã ji.

³ Àmè kèwo nyi yebe dùkɔ̃mèvi lè mìa dòmèa, ne trɔ yì Yèruzàlɛm lè Yudà nyigbã ji. Eye mìa yì tù Tɔhonɔ̀ be mawuxɔa, Izràɛl be Mawu, Mawu kè wo sumɔna lè Yèruzàlɛm nyigbã jia. Eye woabe Mawu a ne nɔ̀ kudo wo!

⁴ Tèpe ɖekpekpe kè Izràɛlviwo lèa, àmè kèwo lè kudo woa ɖo la na wo sìka ku klòsalò. Wo ɖo la gbà na wo èlãwo ku ènunana buwo gbàkudo ènunana fà na Tɔhonɔ̀ be mawuxɔa, lè Yèruzàlɛm.”

⁵ Yudà ku Bɛnyamìn be kɔ̀ta be xòmègawo, hũbonɔwo ku Levìwo kudo àmè kèwo kpata Mawu fɔ̃ sùsu na be wo ɖo la yì tù mawuxɔa le Yèruzàlɛm, wo le jràɖo la so jè èmɔ̃.

⁶ Woabe àxuekɔ̀tɔwo do wo ŋusɛ̃ ku sìka kudo klòsalò be àgbãwo gbàkudo ènuzãzã xɔ̀asì buwo, èlãwo cã. Wo gbà na wo ènu fàa na mawuxɔa.

⁷ Èfìɔ Sìrus ŋutɔ na be woa trɔ bɔ̀ ènu kèwo ye èfìɔ Nèbukàdnezà na wo lɔ so mawuxɔa mè va so Yèruzàlɛm, va yì kɔ̀ ɖo yebe vòdukpawo mèa va.

⁸ E ɖègbè na àdɔ̀kùnuwo jikpɔtɔ Mìtredàt be bèa lɔ ènuawo na Yudà be èfìɔvi Cɛ̀cebasàr.

⁹ Wo lè leke: Sìka gbã-gbɛjɛ ègbã, klòsalò gbã-gbɛjɛ àkpe ɖèka, kàkla èwì vɔ àsiɖèkɛ;

¹⁰ sìka kɔpò ègbã, klòsalò kɔpò àlɔ̀ ènè ci èwo, ènuzãzã buwo àkpe ɖèka.

¹¹ Ènuwo kpata lè àkpe àtɔ̃ àlɔ̀ ènè, lè sìka ku klòsalò mè. Cɛ̀cebasàr lɔ wo kudo àhùalewo trɔ yì Yèruzàlɛm.