Efesòtɔwo 1 - GƐ̃GBE BIBLIA 2014

Ègbè dodo

¹ Ènyè Paolò, àmè kè va zũ Kristò Yesù be *àmèdɔ̃dɔ̃ to Mawu be èjro jia ye le ŋlɔ̀ xoma kèa ɖoɖa mì, àmè kèwo ŋuti wo kɔ̀ lè Efesò, eye mì nyi ànùkuame kèwo wɔ̀ ɖèka kudo Kristò Yesùa.

² Màje kudo fàfa ne so Mawu mia Tɔ kudo Tɔhonɔ̀ Yesù Kristò gbɔ va na mì.

Mawu tusì na àmè kèwo wɔ̀ ɖèka ku Kristò

³ Woa na gogo Mawu, mia Tɔhonɔ̀ Yesù Kristò be Ètɔ, ɖo e ɖɔ mi kudo gbɔ̃gbɔ̃ mè be *sìtu kèwo lè jiŋùkusia to Kristò ji.

⁴ Đo, lè yebe lɔ̃lɔ̃ mèa, gbɔ̀xue be la ɖo xixea, Mawu cã mi dà ɖɛ xoxo, be mia va wɔ̀ ɖèka ku Kristò, àleke be mia nyi àɖèsãmewo ku àmè kèwo ŋuti ŋùmèkãkã ma nɔ̀ òa, lè yebe ŋùmè.

⁵ Sɔ zɔ̃ ɖo yebe èjro nyuɛ̃ jia, e ɖo è ɖɛ be mia zũ yèbe èviwo to Yesù Kristò ji.

⁶ Ɖo eŋuã ŋutia, e jè be mia kafu Mawu, ɖo màje kè be na mi to Èvia ɖève, Yesù Kristò jia ŋuti.

⁷ To Kristò be èku jia, Mawu jo mi, eye bè sɔ miabe ènuvuɛ̃wo kè mi. Nène a, Mawu ɖè yebe màje be gbɔsùsua fiɔ mi.

⁸ Ɛ̃ɛ Mawu na mi màje sùgbɔ, ènunya blibo kudo ènugɔ̃mè sèse àdodoe.

⁹ E na mi nya yebe ɖoɖo wawla kè ye ŋutɔ wɔ̀ dà ɖɛ be yèa va ɖè fiɔ lè Kristò mèa.

¹⁰ Ekèa ye nyi be ne gàmèa sùa, woa bɔ̀ ènu kèwo keŋu lè jiŋùkusi kudo ànyigbã jia ɖo du, ɖo Kristò gɔ̃mè.

¹¹ Ye ŋutɔ mè ke ye mi xɔ̀ miabe ècrɔ̃nu lè. Ekè wo jrà mi ɖo ɖɛ sɔ zɔ̃ ɖo àmè kè wɔ̀nà ènuwo keŋu lè ye ŋutɔ be èjro kudo ɖoɖo be sùsu ji.

¹² Nène a, Mawu cã mi, àmè kèwo lè ŋùɖo mè na Kristò xoxoxoa ɖɛ, be mia nɔ̀ àgbè, nɔ kafu yèbe gogo.

¹³ Lè yeke mèa, kè mìa cã mì sè nyàwo be ènyà kè nyi àŋɛ̀nyuɛ̃ kè gblɔ̃ be Mawu hlùɛ̃ mì gã, ɖo mì xɔ̀ Mawu ji sè ŋutia, e sɔ Gbɔ̃gbɔ̃ Kɔ̀kɔ̀ɛ kè be fìãa, do mì jèsìdo dà ɖɛ.

¹⁴ Gbɔ̃gbɔ̃ kèa ye nyi èkpeɖojinu na mi be mia cã mi la kpɔ gomè lè Mawu be ènu sia ènu kè bè fìã na mia mè màgblà màgblà. Èkpeɖojinu kèa la nɔ̀ mia si va sɛ̃ ɖo kaka gà kè mè ècrɔ̃nua la va sù mia si bliboa.

Paolò be kuefã

¹⁵ Ekèa ŋuti ye, ekè mù sè be mì xɔ̀ Tɔhonɔ̀ Yesù ji sè, eye mù sè àlekè mì lɔ̃ àɖèsãwo ɖoa,

¹⁶ nyè mu tɔtè àkpedodo ɖo mìa ta gbèɖe ò, eye mù le ɖo ŋùkuvi mì tɛ̀gbɛ̀ lè kuefã nyèwo mè.

¹⁷ Mù biɔna mia Tɔhonɔ̀ Yesù Kristò be Mawu, Àta kè tɔ̀ ye nyi gogoa, be ne na mì gbɔ̃gbɔ̃ kè la na mì ènunyaa, eye bèa ɖè Mawu fiɔ mì, ne mìa nya àmè kè be nyia.

¹⁸ Ne bèa hũ mìabe ènunya, ne mìa ŋɔjè ŋùɖo kè ŋuti be yɔ mì ɖoa mè, kudo àdɔ̀kùnu gbàkudo gogo kèwo ye lè ècrɔ̃nu kè be wla ɖɛ na yebe àɖèsãmewo,

¹⁹ kudo àlekè yebe ŋusɛ̃ màkpònua le wɔ̀ èdɔ lè mi, àmè kèwo xɔ̀ e ji sè a mè. Ŋusɛ̃ kèa, kè le wɔ̀ èdɔ lè mia mèa,

²⁰ sɔ̀ kudo ŋusɛ̃ kè wo sɔ fɔ̃ Kristò so àmè kukuwo dòmè, eye be na be nɔ̀ ànyi ɖo yebe ɖùsi mè lè jiŋùkusia.

²¹ Kristò ɖo ŋusɛ̃ ɖo Jiɖùɖuwo, ku hɔ̃hlɔ̃wo kudo ŋusɛ̃wo gbàkudo ègãnyinyi keŋu, ku nyikɔ sia nyikɔ kè wo yɔna ji, mu nyi lè xixe kèa mè kpò ò, vɔ̀a lè xixe kè gbãnàa cã mè.

²² Mawu sɔ ènu sia ènu do Kristò be àfɔ̀ gɔ̃mè, eye be sɔ ɛ̀ ɖo ènuwo keŋu be ètatɔ na èhabɔ̀bɔa.

²³ Èhàbɔ̀bɔ kèa ye nyi Kristò be ŋutilã, àmè kè be ɖɔɖɔ ɖɔna ènuwo keŋuã.