Àɖàŋùɖètɔ 1 - GƐ̃GBE BIBLIA 2014

Ènu ɖekpekpe buna sìgbè àzìzɔ nène

¹ David be èvi, Yèruzàlɛm be èfìɔ, àɖàŋùɖètɔa be ènyà ye nyi ekèa.

² Ènunyatɔa gblɔ̃ be: Ènu ɖekpekpe buna sìgbè àzìzɔ nène, ènu gbalo mu jrànà ènu ɖe ɖo ò ènu gbalo mu hɛ̃nà ènu ɖe va ò.

Ènu yeye ɖekpe mu lè dɔ̃ŋùkusua gɔ̃mè ò

³ Àgbètɔwo hlɔ̃ le wɔ̀ èdɔ lè ànyigbã ji. Vɔ̀a, nukɛ ye wo le kpɔ so ekèa mè ò?

⁴ Jìjimè ɖe la va yì, jìjimè ɖe la va, eye xixea kpɔ̀tɔ̀ lè lekè be lèa.

⁵ Dɔ̃ŋùkusu tona, yì ɖona èxɔ̀, eye e zɔ̃nà èzã yì fikè be tona lèa.

⁶ Àya pònà yì àpùgo, eye e trɔna pònà yì èvègo. E trɔna, trona eye e gbà trɔna e yomè a, e gbà jènà tɔtrɔa gɔ̃mè.

⁷ Ètɔ̀ sàsrawo kpata yì kɔ̀nà ɖo àpù mè, co gãke àpù mu ɖɔ kpɔ gbèɖe ò. Ètɔ̀ sàsrawo srànà yì tèpe ɖe eye so funua, wo gbà trɔna va zè ɖèka.

⁸ Ènu kèa tì àmè, mi mu la teŋu gblɔ̃ ɛ̀ vɔ̀ ò. Ŋùkuviwo le kpɔ eye wo kpɔ̀tɔ̀ le ji la kpɔ wu nènea, ètowo le sènu eye wo le ji la gbà sè wu nènea.

⁹ Ènu kè nɔ̀ ànyi a, la kpɔ̀tɔ̀ nɔ̀ ànyi sɔ yì. Ènu kè wo wɔ̀ va yìa, wo la kpɔ̀tɔ̀ nɔ wɔ̀ ɛ̀ tɛ̀gbɛ̀ɛ. Ènu yeye ɖekpe mu lè dɔ̃ŋùkusua gɔ̃mè ò.

¹⁰ Wo la teŋu gblɔ̃ so ènu ɖe ŋuti be: “Mì kpɔ, ènu yeye ɖe ye!” Co gãkea, ènu kèa lè so xoxo, so blèmà ke, gbɔ̀xue mi va jɔ̀.

¹¹ Mi ŋlɔ̀nàbe ènu kè jɔ̀ va yìa. Eye àmè kèwo la va jè mia yomè a, woa cã la ŋlɔ̀be ènu kè jɔ̀ lè miabe ŋùgbedòmèa.

Ènunyatɔa le ɖè yebe àɖàŋù fiɔ

¹² Ènyè, ènunyatɔa, mù nyi Izràɛl be èfìɔ lè Yèruzàlɛm va yì.

¹³ Mù jè àgbàgba kù ènu kèwo le jɔ̀ lè xixea mèawo gɔ̃mè kudo ènunya. Èdɔ sɛ̃ŋu ɖe ŋutɔ ye e nyi Mawu do àsi na àgbètɔ.

¹⁴ Mù ɖè ŋùku kpɔ àgbàgba kèwo wo le jè lè ànyigbã a ji. Mù kpɔ be wo mu ɖo gɔ̀mèsèse ɖekpe ò. Ne wo pudù jè àya kè le pòa yomè a, e nyɔ sɔ wu.

¹⁵ Wo mu teŋu jɔ̀ ènu kè glɔ̃a cã ò. Wo mu teŋu hlɛ̃ ènu kè mu lè òa cã ò.

¹⁶ Mù gblɔ̃nà kòɖò na ɖokoe nyè be: “Mù na ènunya nyèa sĩ ɖo e ji wu Yèruzàlɛm be èfìɔwo kpata tɔ̀awo. Mù ɖo àɖàŋù drì eye mù mɔ̀nu jè àgbèa ŋuti.”

¹⁷ Mù kù ènu gɔ̃mè, nya ènu kè nyi ènunya ku ènu kè mu nyi ènunya òa, ènu kè nyi susu nyuɛ̃ lè susu gbegble gbɔ. Mù va sè ekèa gɔ̃mè, e cã nyi àya yomè jèje.

¹⁸ Ènu mè kùku tɔ̀xɛ hɛ̃nà ŋuzĩzĩ gãa mè nɔ̀nɔ vana. Àmè kè le ji ènunyaa le dà àyàɖùɖu ɖo yebe àyàɖùɖu ji.