Kolosètɔwo 1 - GƐ̃GBE BIBLIA 2014

Ègbè dodo

¹ Paolò, Yesù Kristò be *àmèdɔ̃dɔ̃, zɔ̃ ɖo Mawu be èjro ji, ku Timòteo, mia nɔ̀vi, le ŋlɔ̀ xoma kèa,

² ɖoɖa àɖèsãwo ku nɔ̀vi ànùkuamewo lè Kristò mè kèwo lè Kolosèa. Màje ku fàfa kè so Mawu, mia Tɔ gbɔa, ne nɔ̀ ku mì.

Paolò do àkpe na Mawu ɖo Kolosètɔwo ta

³ Mi le do àkpe na Mawu, mia Tɔhonɔ̀ Yesù Kristò be Ètɔ, wè sia wè, lè miabe kuefã mè, ɖo mìa ta,

⁴ so wàlɛbɛ kè mi sè mìabe xɔ̀sè ɖoɖo ɖo Kristò Yesù ji, ku mìabe lɔ̃lɔ̃ na àɖèsãwo keŋuã,

⁵ ɖo ŋùɖo kè wo jrà ɖo lè jiŋùkusi na mìa ŋuti. Ŋùɖo kè be ènyà mì sè sãa, lè nyàwo be àŋɛ̀a be dodo mè, ekè nyi àŋɛ̀ nyuɛ̃,

⁶ kè va mìa gbɔ sìgbè àlekè e lè, lè xixe bliboa keŋu mè, eye e sɛ̃ èku, eye be sĩa nène, sìgbè àlekè e lè mìa cã mìa dòmè, so àzã kè ji mì sè è, eye mì jèsi Mawu be màje, lè nyàwo a mèa nène,

⁷ sìgbè àlekè mì kpla so Epafrà, miabe èhadɔwɔ̀tɔ ɖève, kè nyi Kristò be sumɔ̃vi ànùkuame, lè mia tèpe, lè mìa gbɔa nène.

⁸ Àmè kèa, ɖè mìabe lɔ̃lɔ̃ lè Gbɔ̃gbɔ̃ mè fiɔ mi.

⁹ Ekèa ŋutia, mia cã, so àzã kè gbè mi sè ènyà kèa, mi mu dokpò kuefãfã ɖo mìa ta gbèɖe ò. Mi le biɔ Mawu be, mìa ɖɔ ku yebe èjro nyanya, lè Gbɔ̃gbɔ̃ mè be ènunya ku ŋɔŋɔ jè ènu mè keŋu mè.

¹⁰ Eye mìa zɔ̃ sìgbè àlekè e jè na Tɔhonɔ̀a nène, lè ènu kèwo keŋu jènà ŋùmè na ɛ̀a mè. Ne mìa sɛ̃ èku lè èdɔ nyuɛ̃ sia èdɔ nyuɛ̃ mè, eye mìa sĩ, lè Mawu nyanya àdodoe mè.

¹¹ Eye woa do mì ŋusɛ̃ lè èmɔwo keŋu ji, sɔ zɔ̃ ɖo yebe gogo be hɔ̃hlɔ̃ ji, na jìdo kudo àdòdò keŋu.

¹² Mìa nɔ̀ do àkpe na Àta ku jìjɔɛ, àmè kè wɔ̀ mì sù, be mìa nyi ècrɔ̃nuwo be matɔwo ku àɖèsãwo lè kɛ̃klɛ̃a mè.

¹³ E ɖè mi so vìvìti be ŋusɛ̃ mè, eye e sɔ mi ɖo yebe Èvi ɖève a be fìɔdua mè.

¹⁴ Àmè kè mè mi kpɔ jojo, kè nyi èvuɛ̃ be kèkè xɔ̀ lè.

Màmlã na Kristò, xixea be ètatɔ

¹⁵ Mawu be Èvi kèa ye nyi Mawu màkpɔmàkpɔa be ŋùfɛ̃, ènuɖoɖowo keŋu be ŋùkɔ̀gbevi.

¹⁶ Đo wo ɖo ènuwo keŋu lè e mè, ènu kèwo lè jiŋùkusi kudo ànyigbã jia, ènuzezewo kudo àvìmènuwo keŋu, èfìɔzìkpewo, àlo ègãnyinyi, jiɖùɖùwo, àlo hɔ̃hlɔ̃wo. Wo ɖo ènuwo keŋu to e ji, eye wo ɖo wo na ɛ̀.

¹⁷ E jɔ̀ gbɔ̀xue ènu keŋu jɔ̀, eye wo ɖo ènuwo keŋu to e ji.

¹⁸ Eye, e ye nyi èta na ŋutilã, kè nyi Èhabɔ̀bɔa. E ye nyi gɔ̃mèjèje, Ŋùkɔ̀gbevi so àmè kukuwo dòmè, ne bèa nyi cucugbã na ènuwo keŋu.

¹⁹ Đo, e jè ŋùmè na Mawu be yèbe nɔ̀nɔmè keŋu ne nɔ̀ yèbe Èvia cã si.

²⁰ Eye be gbà jè ŋùmè na ɛ̀ be yèa jrà ènu kèwo keŋu lè ànyigbã ji, àlo lè jiŋùkusiawo ku Yè ŋutɔ dòmè ɖo, to Èvia ji, ekè e na fàfa, to yèbe èku lè àtisòga ŋutia mè.

²¹ Mì àmè kèwo nyi àmèjrowo ku kɛ̃tɔwo na ɛ̀, lè mìabe susuwo ku èdɔ vuɛ̃wo mè sãa,

²² fifìa Mawu jrà mìa ku ì dòmè ɖo, to yebe èku ji, lè yebe ŋutilã be vevesèse mè, ne bèa ɖo mì kɔ̀kɔ̀ɛ ɖe, xaxa mà-ɖo, ŋùmè kãkã mà-ɖo, lè yebe ŋùmè.

²³ Gãkea e jè be mia le ènu kè mi xɔ̀sèa mè ɖo àsi, eye mia likè lè e mè. Mi mu gbà ɖè miabe susu lè ŋùɖo kè àŋɛ̀nyuɛ̃ a hɛ̃ va na mia ŋuti ò. Àŋɛ̀nyuɛ̃ kèa ye wo do na àmè kèwo kpata ye lè xixea mèa, e ye be sumɔ̃vi ènyè Paolò cã mù va trɔ zũ.

Àmèdɔ̃dɔ̃ be àvũdɛ̃drɛ̃

²⁴ Fifìa, mù le jɔ̀jì lè èfũ kèwo mù le kpe ɖo mìa taa mè, eye mù le wu ènu kèwo kpɔ̀tɔ̀ lè Kristò be àyàɖùɖuwo mèa nu, lè àpe ŋutilã mè, ɖo yebe àmèti kè nyi èhabɔ̀bɔa ta.

²⁵ Èhàbɔ̀bɔ kèa be sumɔ̃vi ye mù zũ, sɔ zɔ̃ ɖo èdɔ kè Mawu do àsi na mù ɖo mìa ŋutia ji, ne ma wu àŋɛ̀nyuɛ̃ a be èdɔa nu:

²⁶ àmlìmànu kè wo wla so xoxo hùenu, ku so àkɔ ɖe na àkɔ bu, vɔ̀a fifìa e ɖè è fìɔ yebe àɖèsãwo.

²⁷ Mawu jro be àmè kèawo woa nya àdɔ̀kùnu kè nyi yebe àmlìmànuwo be gogo lè àgbàlèwo dòmèa: ekè nyi Kristò lè mìa dòmè, gogo be ŋùɖoa!

²⁸ Àmè kè be àŋɛ̀ mi le do, sɔ le ɖo àfɔ̀ àfɔ̀ ji na àmè sia àmè, le fiɔ ènu àmè sia àmè, lè nyanya keŋu mè, ne mia sɔ àmè sia àmè ɖotè sùsui ɖe, lè ɖèka wɔ̀wɔ kudo Kristò mè.

²⁹ Ènu kèa ŋuti, mù le jè àgbàgba ɖo, eye mù le drɛ̃ àvũ, sɔ zɔ̃ ɖo yebe ŋusɛ̃ kè le wɔ̀ èdɔ lè mè nyè sɛ̃sɛ̃ ɖe a ji.