Àvìmènu 1 - GƐ̃GBE BIBLIA 2014

Kpɔ̀kplɔ̀sɔyìemè

¹ Yesù Kristò be àvìmènu kè be xɔ̀a, lè xoma kèa mè. Mawu sɔ na ɛ̀, ne bèa ɖè ènu kèwo la jɔ̀ sɔ̀sɔɛɖea fiɔ yebe sumɔ̃viwo. Kristò to yebe àtikplɔtɔ ji, na yebe sumɔ̃vi Yòhanɛ̀s ŋɔjè ènu kèawo mè.

² Yòhanɛ̀s ɖù ɖase so Mawu be ènyàa kudo Yesù Kristò be ɖasea ŋuti, sìgbè àlekè e kpɔ ènuwo keŋuã nène.

³ Sìtu ɖèɖe ye e nyi na àmè kè le hlɛ̃ xoma kèa. Sìtu ɖèɖe ye e nyi na àmè kèwo le sè ènu kèwo wo ŋlɔ̀ ɖo e mè, eye wo le wɔ̀ ɖo woa jiawo, ɖo hùenu kè ènu kèawo la jɔ̀ a lili.

Yòhanɛ̀s do ègbè ɖoɖa èhabɔ̀bɔ adrɛ̃awo

⁴ Ènyè Yòhanɛ̀s ye le ŋlɔ̀ ènyà kèawo ɖoɖa mì, èhabɔ̀bɔ adrɛ̃ kèwo lè Azìa be nutowo mèa. Mì xɔ̀ màje so Mawu kè lè fifì, ekè nɔ̀ ànyi sãa, eye be gbãnà a, kudo gbɔ̃gbɔ̃ adrɛ̃ kèwo nɔ̀tè ɖo yebe èfìɔzìkpea be ŋùkɔ̀a gbɔ.

⁵ Yesù Kristò, nyàwo be ɖàsèfo kè nyi àmè cucugbã kè Mawu gbìgbɔ̀ jì so àmè kukuwo dòmè, eye be nyi ànyigbã ji be èfìɔwo be èjiɖùtɔa, ne ku ŋuzĩzĩ na mì, eye bèa na mì fàfa. Na Yesù Kristò kè lɔ̃ mi, eye be hlùɛ̃ mi gã so miabe èvuɛ̃wo mè kudo yebe èhũ,

⁶ wɔ̀ mi, Mawu be fìɔdua matɔwo, mawunɔwo ne mia sumɔ Mawu, Ètɔa, gogo kudo ŋusɛ̃ so fifì kaka sɔ yì. * Àmèn.

⁷ Kpɔɖa, e gbãnà lè lilikpowo mè. Ŋùkuwo keŋu la kpɔ ɛ̀! Àmè kèwo tɔ ɛ̀ èhũaawo ŋutɔ cã! Ànyigbã ji be kɔ̀tawo kpata la làmɔɛ̃ ɖo e ŋuti! Ɛ̃ɛ nyàwo ye! * Àmèn.

⁸ Tɔhonɔ̀ Mawu gblɔ̃ be: “Ènyè ye nyi Alfà ku Òmegà.” Àmè kè lè, eye e nɔ̀ ànyi, eye e gbãnà a, Àmè kè nyi Ŋusɛ̃kpatatɔa.

Wo ɖè Kristò fiɔ

⁹ Ènyè Yòhanɛ̀s, mìa nɔ̀vi, àmè kè nɔ̀ Yesù yomè ku mì, mù le kpe èfũ ku mì lè vevedonu mè ɖo fìɔdua ŋuti. Mù nɔ̀ ètɔ̀dòmèkɔ̃ɛ̃ kè wo yɔna be Patmɔs-a ji ɖo Mawunyaa ŋuti, ne ma ɖù ɖase na Yesù.

¹⁰ Lè Tɔhonɔ̀ be àzãa gbèa, Gbɔ̃gbɔ̃ Kɔ̀kɔ̀ɛ a ɖo mè nyè. Mù sè ègbè sɛ̃sɛ̃ ɖe ɖì lè ŋùgbedòmè na mù sìgbè èkpɛ̃ be ɖìɖi nène

¹¹ be: “Ènu kè wò le kpɔa, ŋlɔ̀ ɛ̀ ɖo xoma mè, ne woa sɔ ɛ̀ ɖoɖa èhabɔ̀bɔ adrɛ̃ kèwo lè Efesò, Smirnà, Pɛrgamɔ̀, Tiatirà, Sardɛ̀s, Filadɛlfìa ku Laodikèa.”

¹² Mù trɔ be ma kpɔ àmè kè le pò nupo na mùa; ekè mù trɔa, mù kpɔ sìka-kãligbɛ̃ti adrɛ̃,

¹³ eye, lè kãligbɛ̃ti adrɛ̃awo be dòdòmèa, àmè ɖe ɖì àgbètɔ be èvi, e do àwù dìdi ɖe, sɔ sìka-gojibla-nu bla àkɔta.

¹⁴ Yebe èta kudo èɖà ɣe peŋu-peŋu sìgbè ɖèti-fu nène, eye yebe ŋùkuviwo lè sìgbè èzò hɛ̀ɛ be àɖe nène.

¹⁵ Yebe àfɔ̀wo lè klɛ̃ sìgbè gàjɛ̃ kè wo do èzò mè eye be bìa hɛ̀ɛa nène, eye yebe ègbè lè sìgbè ètɔ̀ sàsra sùgbɔ be ègbè ɖìɖi nène.

¹⁶ E le wètrivi adrɛ̃ ɖo yebe ɖùsi-lɔ mè, eye èwui ènu-vè ɖaɖa lè to lè ènu mè na ɛ̀. Yebe ŋùmè le dàzò sìgbè èwè jàse nène.

¹⁷ Ekè mù kpɔ ɛ̀a, mù jè ànyi lè yebe àfɔ̀ gbɔ sìgbè àmè kuku nène. Eye e sɔ yebe ɖùsi-lɔ ɖo ji nyè, gblɔ̃ be: “Mù gbà vɔ̃ ò. Ènyè ye nyi Cucugbãa ku Mlɛ̃a.

¹⁸ Mù lè àgbè. Mù ku va yì, fifìa mù lè àgbè kaka sɔ yì. Èku kudo èkuwo de be ŋusɛ̃wo lè àsi nyè.

¹⁹ Fifìa, ŋlɔ̀ ènu kèwo wò kpɔawo, ekèwo lè fifì, kudo ekèwo la va jɔ̀, e yomè awo ɖɛ.

²⁰ Wètrivi adrɛ̃ kèwo wò kpɔ lè àpe ɖùsi mèa, ku sìka kãligbɛ̃ti adrɛ̃awo be gɔ̃mè ɖèɖe ye nyi ekèa: 'Wètrivi adrɛ̃awo ye nyi èhabɔ̀bɔ adrɛ̃awo be àtikplɔtɔwo, eye kãligbɛ̃ti adrɛ̃awo nyi èhabɔ̀bɔ adrɛ̃awo.'”