2Timòteo 1 - GƐ̃GBE BIBLIA 2014

Ègbè dodo

¹ Paolò, Kristò Yesù be *àmèdɔ̃dɔ̃, to Mawu be èjro ji, zɔ̃ ɖo àgbè be fìãfiã kè lè Kristò Yesù mèa ji.

² Mù le ŋlɔ̀ xoma kèa ɖoɖa Timòteo, èvi nyè ɖève. Màje ku ŋuzĩzĩkuku kudo ŋuti fàfa, kè so Mawu, Àta, ku mia Tɔhonɔ̀ Yesù Kristò gbɔa, ne nɔ̀ ku wò.

Àkpe dodo na Mawu

³ Mù le do àkpe na Mawu, àmè kè mù le sumɔ sìgbè tɔgbe nyèwo nène, lè jìjigbè kɔ̀kɔ̀ɛ mè. Mù le ɖoŋùku ji wò, wè sia wè, lè kuefã nyèwo mè, èzã ku kedè.

⁴ Ne mù ɖo ŋùku àpo àɖàsìwo jia, e jrona mù veve ɖe be ma kpɔ wò, ne ma ɖɔ ku jìjɔɛ.

⁵ Mù le ɖoŋù xɔ̀sè àdodoe wòa ji, xɔ̀sè kè nɔ̀ màma wò, Loyis ku ènɔ̀ wò Enikè si cucugbãa, eye mù xɔ̀sè be, e gbà lè wò cã àsi wò.

⁶ Ye ŋutia, mù le ɖoŋù na wò be, wòa na Mawu be ènu nana kè lè mè wò, to àpe àsi ɖoɖo èta na wò jia, ne nɔ̀ àgbè lè mè wò.

⁷ Đo, mu nyi vɔ̃vɔ̃ be gbɔ̃gbɔ̃ ye Mawu na mi ò; vɔ̀a ŋusɛ̃ ku lɔ̃lɔ̃ kudo ɖokoe ji ɖùɖu be gbɔ̃gbɔ̃ ye be na mi.

⁸ Ye ŋutia, èŋù mu gbà kpɛ̃ wò, ɖo Tɔhonɔ̀ be ɖase kudo ènyè kè nyi yebe gàmènɔ̀tɔa ŋuti ò. Vɔ̀a kpe èfũ ku mù ɖo àŋɛ̀nyuɛ̃ a ta, zɔ̃ ɖo ŋusɛ̃ kè Mawu na wòa ji.

⁹ Mawu hlùɛ̃ mi gã, eye be yɔ mi be mia nyi ye tɔ̀. Mu wɔ̀ ekèa ɖo miabe èdɔwɔ̀wɔwo ŋuti ò, vɔ̀a ɖo ye ŋutɔ be ɖoɖo ji. Màje ye be na mi, to Kristò Yesù mè gbɔ̀xue xixea jɔ̀.

¹⁰ Eye fifìa, e ɖè è fiɔ to mia Hlùɛ̃tɔ Kristò Yesù be vava ji, Àmè kè gũ èta na èku. Eye e hɛ̃ àgbè kudo màku gbèɖe va kɛ̃klɛ̃ nu, to àŋɛ̀nyuɛ̃ a ji.

¹¹ Àŋɛ̀nyuɛ̃ kèa ŋuti Mawu ɖo mù àŋɛ̀dotɔ ku *àmèdɔ̃dɔ̃ kudo ènufiɔtɔ.

¹² Ènu kèa ŋuti ke ye mù lè kpe èfũ kèawo ɖo. Vɔ̀a èŋù mu kpɛ̃ mù ò. Đo mù nya àmè kè ji mù xɔ̀sèa, eye mù ɖo jìdo be, e ɖo ŋusɛ̃ la kpɔ ènu kè wo sɔ do àsi na mùa ji, kaka va na kòjo ɖo zã gbèa ji.

¹³ Ènyà àdodoe kèwo wò sè so ènu nyèa, le wo ɖo àsi ne woa nyi kpɔwɔɛ na wò. Likè lè xɔ̀sè kudo lɔ̃lɔ̃ kè lè Kristò Yesù mèa mè.

¹⁴ Gbɔ̃gbɔ̃ Kɔ̀kɔ̀ɛ kè lè mia mèa ne do wò ŋusɛ̃ be wòa le ènufiɔ-àmè nyuɛ̃ kè wo do àsi na wòa ɖo àsi.

¹⁵ Wò nya ekèa be, àmè kèwo keŋu lè Azìaa, trɔ lè yo nyè mè, Figɛlò ku Hɛrmɔgenè cã lè woa dòmè.

¹⁶ Tɔhonɔ̀ ne ku ŋuzĩzĩ na Onesiforò be àxuedoa, ɖoa, eji-ejia e dona mù ŋusɛ̃, eye gàmènɔ̀tɔ ke mù nyia mu kpɛ̃ŋù na ɛ̀ ò,

¹⁷ vɔ̀a wàlɛbɛ kè e va Romàa, e ji mù ku vevedonu, eye be kpɔ mù.

¹⁸ Tɔhonɔ̀ Yesù ne na bèa kpɔ ŋuzĩzĩkuku so Mawu gbɔ lè kòjoɖoɖo zãa gbè. Eye èdɔ sùgbɔ kèwo be wɔ̀ na mù lè Efesòa, wò nya wo nyuɛ̃ ɖe.