2Tɛsalonikà 1 - GƐ̃GBE BIBLIA 2014

Ègbèdodowo

¹ Ènyè Paolò kudo Silvanɔ̀ gbàkudo Timòteo ye le ŋlɔ̀ xoma kèa ɖoɖa Tɛsalonikàtɔwo be èhabɔ̀bɔ, kè lè Mawu, mia Tɔ kudo Tɔhonɔ̀ Yesù Kristò mèa.

² Màje kudo fàfa kè so Mawu, Ètɔ kudo Tɔhonɔ̀ Yesù Kristò gbɔa, ne nɔ̀ ku mì.

Kòjoɖoɖo lè Kristò be vava hùenu

³ Nɔ̀viwo, mi ɖo la nɔ̀ do àkpe na Mawu wè sia wè ɖo mìa ta. Ekèa jè, ɖo mìabe xɔ̀sè le sĩ ŋutɔ, eye àmè sia àmè, lè mìa dòmè, be lɔ̃lɔ̃ na mìa nɔ̀nɔwo le yì e ji kpe è.

⁴ Ekèa nana be, mia ŋutɔwo mi sɔna mì yinagò lè Mawu be èhabɔ̀bɔwo mè, ɖo mìabe jìdo kudo xɔ̀sè kè mì ɖo lè yomètĩtĩ kudo àyàɖùɖu kèwo mì kpɔnaawo ŋuti.

⁵ Ènu kèawo nyi sɔ̃nì na Mawu be kòjoɖoɖo jɔ̀jɔɛ, ne woa bù mì be, mì jè na Mawu be èfìɔdu, kè ŋuti mì le kpe èfũ ɖoa.

⁶ Đo e sɔ̀gbè lè Mawu be ŋùmè be, ne sɔ àyà tu èfɛ̃ na àmè kèwo le do àyà na mìawo,

⁷ eye bèa na jɛ̃gbɔ̃gbɔ̃ mì, àmè kèwo le ɖù àyà kudo miawo. Ekèa la jɔ̀, wàlɛbɛ kè Tɔhonɔ̀ Yesù la zè lè èzò be àɖe ɖe mè, so jiŋùkusi kudo yebe àtikplɔtɔwo ŋusɛ̃tɔwo.

⁸ Gbè ŋua gbèa, e la dɔ̃ èto na wo, àmè kèwo mu jèsi Mawu kudo àmè kèwo mu wɔ̀ ɖo mia Tɔhonɔ̀ Yesù be àŋɛ̀nyuɛ̃ a ji òawo, sìgbè lekè be jè a nène.

⁹ Àmè kèawo be ètodɔ̃ ye la nyi be, wo la crɔ̃ wo gbidi-gbidi, eye wo la nɔ̀ àzɔ̀ge na Tɔhonɔ̀, kudo yebe ŋusɛ̃ be gogoa.

¹⁰ Ekèa la va e mè lè Tɔhonɔ̀ be tɔtrɔ va be àzãa gbè. Nène a, Tɔhonɔ̀ la kpɔ gogo lè yebe àɖèsãwo dòmè, ne bèa gbà nyi ènu glòkpɔ lè àmè kèwo keŋu xɔ̀ e ji sèawo dòmè. Mì la nɔ̀ woa dòmè, ɖo mì xɔ̀ ènyà kè mi gblɔ̃ na mìa ji sè.

¹¹ Ekèa ŋuti ye mi fãnà yɔ Mawu gbè sia gbè ɖo mìa ta. Mi biɔna ɛ̀ be, ne na mìa jè na èdɔ kè be yɔ mì na a. To yebe ŋusɛ̃ jia, mi le biɔ be mìabe èjro na ènyuɛ̃wɔ̀wɔ keŋu ne zɔ̃ sù, ne wo mu gbà kpɔ ènyà ɖe so mìabe xɔ̀sèdɔwo ŋuti ò.

¹² Nène a, mia Tɔhonɔ̀ Yesù be nyikɔ la kpɔ gogo lè mìa mè, eye mìa cã mì la kpɔ gogo lè e mè. Ekèawo keŋu nyi miabe Mawu kudo Tɔhonɔ̀ Yesù Kristò be màje.