2Petrò 1 - GƐ̃GBE BIBLIA 2014

Ègbè dodo

¹ Xoma kèa so ènyè Simɔ̀n Petrò, Yesù Kristò be sumɔ̃vi kudo *àmèdɔ̃dɔ̃a gbɔ. Mù le ŋlɔ̀ ɛ̀ ɖoɖa àmè kèwo, to miabe Mawu ku hlùɛ̃tɔ Yesù Kristò be jɔ̀jɔɛwɔ̀wɔ jia, na woabe àlɔ̀ sù xɔ̀sè kè lè ètè sìgbè mia tɔ̀ nènea ji.

² Màje kudo fàfa ne jì ɖo e ji kpe è na mì, lè Mawu kudo Yesù, mia Tɔhonɔ̀ be nyanya mè.

Mawu be àmè yɔyɔ

³ Mawu sɔ ye ŋutɔ be ŋusɛ̃ na mi ènu kèwo keŋu mi hiã lè àgbè mèa fàa, ne mia teŋu nɔ̀ àgbè, la sumɔ ɛ̀. E wɔ̀ ekèa ne mia jèsi e ye kè yɔ mi, ne mia va kpɔ gomè lè ye ŋutɔ be gogo kudo àdɔ̀mè nyuɛ̃a mè.

⁴ Mawu to èmɔ kèa ji, na ènu nana xɔ̀asì àdodoe kèwo be fìã na mia, àleke be mìa teŋu to ènu nana kèawo ji, la si lè ènujroàmè vuɛ̃ kèwo crɔ̃na àmè lè xixe mèawo nu, eye mìa va nyi àmè kèwo ye la kpɔ gomè lè Mawu be jɔ̀jɔ̀ mèa mè.

⁵ Lè susu veve kèa ŋutia, mì jè àgbàgba mìa sɔ ènyuɛ̃wɔ̀wɔ bɔ̀ ɖo mìabe xɔ̀sè ŋuti. Nène a kea, ènunya ne bɔ̀ ɖo ènyuɛ̃wɔ̀wɔa ŋuti.

⁶ Đokoe ji ɖùɖu ne bɔ̀ ɖo ènunya ŋuti. Èjìdodo ne bɔ̀ ɖo ɖokoe ji ɖùɖu ŋuti. Mawume nyinyi ne bɔ̀ ɖo èjìdodo ŋuti.

⁷ Nɔ̀viwɔ̀wɔ ne bɔ̀ ɖo mawume nyinyi ŋuti, eye lɔ̃lɔ̃ ne bɔ̀ ɖo nɔ̀viwɔ̀wɔ ŋuti.

⁸ Đo ne nɔ̀nɔmè kèawo sù mìa si, eye wo xɔ̀ nɔ̀pe ɖo mìa mè keŋuã, wo la na mìabe wɔ̀nawo mè la kɔ̀, eye mì la ɖè àlè, sɔ jèsi mìabe Tɔhonɔ̀ Yesù Kristò.

⁹ Đo ne nɔ̀nɔmè kèawo mu sù àmè ɖe si òa, eŋuã, e lè sìgbè ŋùkuvi gbãgbãnɔ̀ kè le ji ènu ku àlɔ̀ a nène. Àmè kèa ŋlɔ̀be, be wo klɔ èvuɛ̃ kèwo yè wɔ̀ kpɔawo jo lè yè ŋuti vɔ̀.

¹⁰ Ye ŋutia nɔ̀vi nyèwo, mì do veve ènu wu sãa, la sɔ kã ɖo àlekè Mawu yɔ mì, eye be cã mìa ji, ɖo ne mì wɔ̀ ekèa, mì mu la gɛ̃ lè mìabe xɔ̀sèa mè gbèɖe ò.

¹¹ Nène a, wo la hũ èmɔ na mì sùsui, ne mìa ɖo mia Tɔhonɔ̀ kudo hlùɛ̃tɔ Yesù Kristò be fìɔdu kòkòɖàbìa mè.

¹² Togbɔ be mì nya ènu kèawo xoxo, eye mì likè goŋu-goŋu lè nyàwo kè mì xɔ̀a mè vɔ̀ cã a, mù ɖo è be ma nɔ̀ ɖo ŋùku woa ji na mì, wè sia wè.

¹³ Mù kpɔ be e sɔ̀gbè be kaka kè mù gbà lè àgbè a, e nyɔ be ma nɔ̀ ɖo ŋùku ènu kèawo ji na mì, la nɔ fɔ̃ mì.

¹⁴ Đo mia Tɔhonɔ̀ Yesù Kristò ɖè è fiɔ mù be mu la dìdì gbɔ̀xue mù la ku ò.

¹⁵ Eŋuã ŋutia, mù ji be ma kpɔ e gbɔ be, lè àpe èku yomè a, mìa teŋu nɔ ɖo ŋùku ènu kèawo ji eji-eji.

Àmè kèwo kpɔ Kristò be gogoawo

¹⁶ Ènyà kè mi gblɔ̃ na mì so àlekè mia Tɔhonɔ̀ Yesù Kristò la va kudo ŋusɛ̃a ŋutia, mu nyi ènyà kpàkpa kèwo wo kpà àɖàŋùtɔ̀awo mè ye mi ɖè è so va gblɔ̃ na mì ò. Mia ŋutɔwo ye kpɔ yebe nyiɖìɖi tututu, kudo ŋùkuvi, gbɔ̀xue gblɔ̃ ɛ̀ na mì.

¹⁷ Mi lè e tèpe wàlɛbɛ kè Mawu Àtaa sɔ bùbu kudo gogo na ɛ̀. Ègbè ɖì so Gogo kpatatɔa gbɔ, va na ɛ̀ be: “Èvi nyè ɖève ye nyi ekèa; mù kpɔna jìjɔɛ so e ŋuti!”

¹⁸ Mia ŋutɔwo ye sè ègbèɖìɖi kèa so jiŋùkusi, wàlɛbɛ kè mi lè Yesù gbɔ, lè èto kɔ̀kɔ̀ɛa jia.

¹⁹ Nène a, miawo mi va kã ɖo ègbèdoàsi kè Mawu be gblɔ̃ɖɛtɔwo gblɔ̃ ɖɛa ji wu ŋutɔ cã. Mì le ŋùkuvi ɖo e ŋuti nyuɛ̃ ɖe. E lè sìgbè kãligbɛ̃ kè le klɛ̃ lè vìvìti mèa nène, kaka va sɛ̃ wàlɛbɛ kè èŋù la kè, eye ŋùdekɛ̃nyɛ be wètrivia la to, sɔ kɔ̀ mìabe èjìwo mèa nène.

²⁰ Ènu veve kè e jè be mìa nyaa ye nyi be àmè ɖekpe mu sona kpò, ɖènà Mawu be ènyàgblɔ̃ɖɛ kè wo ŋlɔ̀ ɖɛa be gɔ̃mè lè ye ɖokoe si ò.

²¹ Đo ènyàgblɔ̃ɖɛ ɖekpe mu so àgbètɔ be jojro mè kpɔ ò; vɔ̀a Gbɔ̃gbɔ̃ Kɔ̀kɔ̀ɛ a na àgbètɔwo pò nupo lè Mawu be nyikɔ mè.