2Èfìɔ 1 - GƐ̃GBE BIBLIA 2014

Àkazìa be wɔ̀na màjègàwo

¹ Kè èfìɔ Àkab kua, Mòabviwo sitè ɖo Izràɛl be fìɔdua ŋuti.

² Gbè ɖèka, èfìɔ Àkazìa lè yebe fìɔsa mè lè àsãŋua ji lè xɔ̀mè. Eye e gɛ̃ so àsãŋua ji to flɛsɛ̀. Ekèa na lãmè gbegble va e ji. Eye e dɔ̃ àmèwo ɖoɖa Ekrɔ̀n dùgã mè, ne woa yì kã ènu lè vòdu Baal Zebùb gbɔ. E gblɔ̃ na àmèdɔ̃dɔ̃awo be: “Yì biɔ vòdua sè be mù la gã lè àfɔ̀kua mè mà a?”

³ Vɔ̀ Tɔhonɔ̀ be àtikplɔtɔ va gblɔ̃ na Èli kè so Ticèbea be: “So jè èmɔ̃ ne wòa yì dogò Sàmarìa-fìɔa be àmèdɔ̃dɔ̃awo. Gblɔ̃ na wo be: “Mawu ɖekpe mu lè Izràɛl nyigbã jia? Nukɛ ŋuti ye mì la va yì biɔ ènyà sè lè Ekrɔ̀n be vòdu Baal Zebùb gbɔ ɖo ò?”

⁴ Eye e gblɔ̃ Tɔhonɔ̀ be ènyà kèawo na Izràɛl-fìɔa be: “Sɔ kù ɖo ènu kè wò wɔ̀a ŋutia, wò mu la sitè lè fikè wò mlɔ̃ a gbèɖe ò. Eye èku ke wò la ku!” E yomè a, Èli gbà jo.

⁵ Àmèdɔ̃dɔ̃awo trɔ gbɔ̀ va èfìɔ gbɔ trolo. Eye e biɔ wo sè be: “Nukɛ jɔ̀ ye mì trɔ gbɔ̀ trolo ò?”

⁶ Wo ɖo e ŋuti be: “Àmè ɖe va dogò mi, gblɔ̃ be: “Mì yì gblɔ̃ na ɛ̀ be: 'Mawu ɖekpe mu lè Izràɛl nyigbã jia? Nukɛ ŋuti ye wò le dɔ̃ àmèwo be woa yì biɔ ènyà sè lè Ekrɔ̀n be vòdu Baal Zebùb gbɔ ɖo ò? Ɖo ekèa ŋutia, wò mu la sitè lè fikè wò mlɔ̃ a ò. Eye èku ke wò la ku!'”

⁷ Èfìɔ Àkazìa biɔ wo sè be: “Leke àmè kè va dogò mì, gblɔ̃ ènyà kèawo lè ɖo ò?”

⁸ Wo ɖo e ŋuti na ɛ̀ be: “E do èlãgbàze wu eye e sɔ àgbàze-gojiblanu bla ègo.” Eye èfìɔa gblɔ̃ be: “Èli so Ticebè ye!”

Èfìɔa jro la le Èli

⁹ Èfìɔ Àkazìa dɔ̃ àhùaga ɖèka kudo gbãdãgbã èkà ci èwo ne woa yì le Èli. Wo yì èto kè ji Èli bɔ̀bɔ̀ nɔ̀ ànyi ɖoa. Àhùagaa gblɔ̃ na Èli be: “Mawu be àmè, èfìɔ le biɔ so àsi wò be wòa ɖì va!”

¹⁰ Èli ɖo e ŋuti na ɛ̀ be: “Ne mù nyi Mawu be àmèa, èzò ne gɛ̃ so jiŋùkusi ne bèa fiɔ̃ mìa kpata!” Eye èzò gɛ̃ so ji, fiɔ̃ àhùagaa kudo gbãdãgbã èkà ci èwoawo.

¹¹ Èfìɔa gbà dɔ̃ àhùaga bu kudo gbãdãgbã èkà ci èwo ɖoɖa Èli. Àhùaga gblɔ̃ na Èli be: “Mawu be àmè, ɖèbla ɖì va. Èfìɔ ye le biɔ so àsi wò!”

¹² Èli ɖo e ŋuti be: “Ne mù nyi Mawu be àmèa, èzò ne gɛ̃ so jiŋùkusi ne bèa fiɔ̃ mìa kpata!” Eye Mawu be èzò gɛ̃ so ji, va fiɔ̃ àhùagaa ku gbãdãgbã èkà ci èwoawo.

¹³ Zè ètɔ̃gɔ̃a, Àkazìa gbà dɔ̃ àhùaga bu ku gbãdãgbã èkà ci èwo ɖoɖa. Wo yì ètoa ji. Eye kè wo ɖo funua, àhùagaa jèklò lè ŋùkɔ̀ na Èli eye e ɖèkuku na ɛ̀ be: “Mawu be àmè, mù ɖèkuku na wò, na mia nɔ̀ àgbè, nyè kudo tɔ̀ nyèawo.

¹⁴ Mù nya be èzò gɛ̃ so ji va fiɔ̃ àhùaga èvè kèwo jè ŋùkɔ̀ na mù a kudo gbãdãgbãwo. Vɔ̀ tɔ̀ wò jɔ̀ ɖè àsi lè àgbèa ŋuti na mù.”

¹⁵ Eye Tɔhonɔ̀ be àtikplɔtɔa ɖè gblɔ̃ na Èli be: “Yì kudo è, mù gbà vɔ̃ ò.” Èli ɖì yì kudo wo eye e yì kè ɖo èfìɔa ŋuti.

¹⁶ E gblɔ̃ na Àkazìa be: “Wò dɔ̃ àmèwo be woa yì Ekrɔ̀n be vòdu Baal Zebùb gbɔ. Mawu ɖekpe mu lè Izràɛl ne woa teŋu biɔ ɛ̀ ènyà sèa? Ekèa na be wò mu la gbà sitè lè àba wòa ji ò, eye wò la ku sɔ̀sɔɛɖe!”

¹⁷ Èfìɔ Àkazìa ku sìgbè lekè Tɔhonɔ̀ gblɔ̃ to Èli jia nène. Mu jì èvi ò. Nɔ̀via Yòram ye ɖùfìɔ ɖo e tèpe lè Yòsafat be èvi Yòram be fìɔɖùɖu be èpè ètɔ̃gɔ̃a mè lè Yudà.

¹⁸ Wo ŋlɔ̀ Àkazìa be ŋutinya kpɔ̀tɛawo ɖo “Izràɛl-fìɔwo be hùenu èxotùnya xomawo” mè.